「大家跟住我行!」這位仁兄好像叫法拉利。

「頭先M佢叫我地帶大家去慈中!本身其實運動場都幾適合,但係佢諗過嗰邊係唔會有糧食補給,所以撤銷咗呢個念頭,依家慈中係最近,而且最多補給嘅地方!大家快啲上車,我地即刻去嗰邊!」法拉利開始了他的指揮。

「冇問題,我地呢幾日嘅補給都係呢邊搵嘅,好安全而且又冇感染者同其他倖存者。去得過。」我把情況告知法拉利。我看他的神情其實也不太淡定,這支強心針,應該效用不錯。

「咁行啦!」法拉行豁然開朗。

「但⋯阿M佢地,點算?」我問出了不該問的問題。



「相信佢,相信佢地。一定冇事嘅。唔使擔心。」阿男安慰着我,他也知道我和M的關係。那種如難姊難弟的經歷。

依家弟弟生死未卜,做姐姐又邊有可能完全冇感覺?

佢就連未知係唔係最後嘅遺言都選擇咗同我講,要我轉告俾佢最珍視嘅人。

仲要保護到我,喺咁危急嘅關頭都獻身,唔介意俾感染者摧殘。

佢切切實實完成咗對我嘅承諾。



「阿M交得佢條命,同埋佢嘅最後一句說話俾你。你知道咩事啦。你係佢所交托嘅人,一定要保住條命啊!Never Give Up!」阿男不忍心見到我如此落魄。

「佢一定會冇事,吉人自有天相。」我給了十足的信心。

「到啦!大家快啲!」又是這個法拉利。

我地行入商場,已經唔想再理其他事。只係一心搵一個安全嘅地方,俾一眾陌生但係又熟悉嘅同學留低好好休息。

「呢邊!」這慈雲山中心的第一層就已經很好運地沒有感染者的蹤影。



我地嘅旅遊巴就直接完成咗熄匙嘅動作,然後好草率咁停泊咗喺商場入口。

亦都係我地藏身地點嘅10米內。有任何嘅外來人士嚟到呢度都多數會經呢個出入口進入商場,我地能夠利用優勢提早作出防禦。

車就更加唔使講,一撻翻着條匙就一定會有大量噪音生產,唔係自己人就一定開唔走。

我地搵到一個角落,完全適合我地大家一齊躲藏。

「落閘!即刻!」我們不知道是如何完成落閘這個看似不思議的壯舉。對的,在這種世界,成功落閘已是一個需要慶祝的動作。

我地將閘門落下之後,先仔細執觀察四周。

有五間鋪頭喺我地嘅生存空間之中。

第一間係八仔。



第二間係泰式茶餐廳。

第三間係電訊公司。

第四間係台式加港式嘅茶餐廳。

第五間就係麵包鋪。

八仔嘅食物,只係經過我地嘅手,照痕跡嚟睇冇任何嘅倖存者嚟過。

泰式茶餐廳就比較上少啦,因為我地之前已經嘗試過喺呢間鋪頭搜尋物資。

而呢間兩溝嘅茶餐廳,食物存貨份量都頗多,應該提前入咗唔少貨。



麵包鋪呢⋯我就不予置評,依然係夠用嘅資源。

只係我對麵包有少少反感。

長留嘅話,暫時都可以接受。

最衰呢度咁細地方,一但要走,就一定走唔到。

感染者大舉進攻,就會一次過將我地盡收腹中。

「轟隆!」天此時發表了他的意見。

並且下起了雷陣雨。

「喂,老天爺,你係咪想同我地講,佢地贏咗啊?你係感動到落淚?定係傷感到落淚啊?」我有點怨恨地問天。



「轟隆轟隆!」再次有雷聲臨境。

「咁即係點啊?」真是受不了這種煎熬。

「冇點啊⋯我依家咪翻嚟囉~My friend~」門外傳來了聲音。
已有 0 人追稿