第二章
「遊戲開始,《十大作家,誰是兇手》,喺你哋十一個之中,有一個人將被選中為兇手。只要揾出兇手,殺死佢就能勝出。」機械聲說。

「What?」魏匡誇張地問。
「估錯嘅人會死,請謹慎行事。詳細規則可參閱派對室內的小冊子,希望大家九死一生。」

「若然?」我看着她問,她是今日召集人,這段錄音應該是她做出來的吧。
「吓?唔關我事㗎,我入嚟淨係排咗膠凳,連裝飾都係Party Room提供,我真係無搞過任何嘢。」若然心急如焚地搖手,應該是真的不關她事。
「你自己講完都覺得唔合理啦,房係你book嘅,人又係你叫嘅。在座嘅各位都係寫小說嘅,應該都知邏輯呢樣嘢。」金生說。





「但係我真係無搞過任何咪呀,廣播器之類嘅嘢,我淨係排過凳,放低咗幾枝水咋。」
「玩還玩唔好整啲嘅嘢呀,又話兇手又殺人,雖然聽落去就知係假,但始終都唔太好啦。」飯妹少有地說話。
「我就覺得呢間房有古怪,原來一直都係你搞鬼。」希哥站起來說。

「Hey大家會唔會激動咗少少?可能若然真係無做過任何事呢?」Zoey站起調停紛爭。
「咁你點解釋到嗰把陰裡怪氣嘅電子聲,同埋呢副掛喺牆嘅恐怖畫呀?」希哥反問。
Zoey呆着不懂回答,安靜地坐回我旁邊,氣勢盡失。我安撫似的,把手搭上她肩膀。
「唔一定所有事都有答案有解釋,其實離奇嘅事一直都喺你身邊發生。」劉加皓說,可真是一鳴驚人。

離奇的事?我見過最離奇的,大概就是知道從小把我撫養成人的母親是別人家的小三,而我則是羞於見光的私生子。還有個小我三歲的妹妹。我絕對無法忘記一直以來告訴我,我爸爸早已去了「賣咸鴨蛋」的母親,在我十五歲那年帶我到生父的葬禮。





「呢度係現實唔係小說世界,邊有咁多怪事呀。」希哥不屑地說。
「夠啦!」金生拿起他的工事包走去木門前「我嚟呢度本身係諗住會有啲有價值嘅交流,但睇嚟我係浪費咗我嗰半日假。」
他把手放在門把上,打算離開。
「開咗度門,就等同釋放潘朵拉的盒子,把詛咒同惡夢帶到外界。」機械聲說。

我轉頭看着童若然,她皺着眉環顧四周,似是真的不清楚這件事。
「發瘟!」金生翻白眼,沒有一分猶豫就拉開木門踏了出去。
我以為的血腥情節並沒有出現,沒有大鋸橫過他的頭顱,沒有千刀刺進他身體。金生只是平淡地走出房間,傳來腳踏上樓梯的沉實聲響。連機械聲也沒有再出現,所有事都猛然停止。
已有 0 人追稿