「晴B你想去邊到先啊?」

「我要去信和!我要去信和!」Claudia好似小朋友咁講。

「正一幼稚精!」我細細聲咁話佢。

「你講咩話?」Claudia聽到,即刻刻面咁問。

「冇野啦!行啦我地!」



「YEAH!!」Claudia好似小朋友咁歡呼。

我地經彌敦道一直走,沿途見到既唔再係一啲特色既小店同MK仔。而係一間間既金鋪同藥房,同埋一大推住手推車既強國大媽。究竟我地本土核心價值同文化係咪已經逐漸被蠶食緊????以前聽過Shine既《去吧!旺角揸Fit人!》,裡面歌詞所提及到既建築物已經逐一地消失。到底,呢個係咪我地香港人熟悉既旺角呢?

記得以前讀中學嗰陣,如果放學唔使練波練水既話就會約Winnie去旺角拍下拖行下街。雖然嗰段日子冇咩錢,又唔可以學啲富二代咁呢到去嗰到去,不過嗰段日子真係好簡單好開心。到左而家,陪伴我行旺角變左Claudia呢個女朋友,唔知以後我地會唔會一家三口,拖住我地既小朋友去行街呢?

行行下我地已經到左信和,首先我地就係地庫嗰層開始行

我同Claudia十指緊扣,慢慢地係地庫層到徘徊。行行下就停低左係一間二手CD鋪門口到。



「喂你睇下間CD鋪仲係到喎!」Claudia話。

「邊間啊?」我問。

「呢間囉!我細個嗰陣我媽媽成日帶我黎呢到買CD架!同埋佢以前好鐘意黎呢到買王菲同鄭秀文既CD,之後會買埋比卡超既漫畫同卡通片比我睇架!」Claudia用手指指比我睇。

「係啊!不如我地入去睇下啦!」

「好啊!」



入到去之後,我同Claudia就係到四圍睇碟。而CD鋪個阿叔就係到掛住睇報紙

我就買左幾隻George Michael同張學友既CD比爹哋媽咪,之後買左比卡超同KERORO既卡通片比妹妹。再買左多啦A夢同陳柏宇最新演唱會既DVD比自己

「你睇唔睇岩啊?」我就問Claudia。

「買左海賊王啊哈哈!你呢?」

「買左比卡超同KERORO比妹妹啊!」

「你咁孝順既?都話你係一個好哥哥黎啦!咩都以妹妹行先。」

「咁我呢世人得呢個妹,除左你之外最錫就係佢啦!」

「你阿妹咪姐係我阿妹!」



我地比左錢之後就繼續行,行到去一間賣日本雜誌既鋪頭就停低左

「喂不如我地入去睇下啦。」

「好啊!」

我地入到去之後,Claudia就拎左本日本女性時裝雜誌比我睇

「你鐘意日系打扮架?」我問Claudia。

「係啊我鐘意日系韓系既打扮架,因為睇落會可愛啲。同埋如果太暴露既話會比人望住好唔舒服。」

「呢款路線最fit你啦,可愛得黎又有種文青feel。不過你著咩衫都係咁靚。」



「口甜舌滑!你地啲男仔唔係鐘意啲女仔著得好sexy咩?」

「咁我都唔想自己女朋友成日比啲其他人圍住咁望既,同埋我覺得你就算著得好普通都打低晒其他女仔啦!不如去食下野啦!」

「岩岩食完咋!今晚要同Miki食飯啊!」

「哈哈!去睇下衫?」

「都唔好!淨係想同BB你行下!」

「咁行啦我地!」

上返去地下,見到有間賣中古Rolex同Panerai既錶行。我就同Claudia停低左。





你地問我係咪買Rolex比我地自己同Claudia??我梗係冇咁多錢啦,就算買都要等我考左律師牌先啦!今次黎只係想八掛下而家啲錶有冇貴左?

「做咩睇Rolex既?」

「冇啊!八掛下而家啲錶去到錢啊!」

「以為你送比我添?」

「好!而家送隻比你!」我講笑咁講。

「你傻架咩?而家發左達啊?不過如果你想送隻撈比我呢,就等你考左律師牌先送比我啦!不過你隻GMT綠針都幾靚啊!幾錢姐?」

「唔係好多姐?7蚊雞!」



「7蚊雞?」Claudia黑人問號。

「即係7萬蚊。之前係日本旅行買既。你嗰隻呢?」我指住佢隻369。

「我媽咪送比我啊!不過我唔係成日戴,平時都係戴返Apple Watch。今日見係同B你出街先戴咋!人地想同B你情侶錶啊!」

原來Claudia個傻妹為左同我戴情侶錶先會戴佢最貴既369,多謝你啊 !

我隻GMT同Claudia既369:



呢個時候,Miki wtsapp我地係邊。原來佢同Leon都係旺角行緊街,估唔到佢地已經係我地隔離。

「Hi 梁生梁太!全油尖旺都知你地最SWEET啦!」Miki話。

「咩梁太啊!我地未結婚架!你係咪咒我老先!」

「唔敢唔敢!係呢你地今日去左邊到玩先?」Miki問。

「我地做返啲小朋友要做既野囉!」

「咩小朋友啊,你今日係做我既保姆!」Claudia話我。

「哈哈都話左Aaron你係好仔黎架啦!我地不如早少少去間餐廳啦!遲到就唔好啦!」

「間野係邊架?」我同Claudia問。

「間野叫SKY726啊,都係彌敦道咋。好似過多兩個街口就到啦!行啦我地!」

我地四個就去左到SKY726, 之後我同Claudia就嘩左一聲。

因為呢間餐廳既有工業式既style之餘,又可以望到成個旺角既view。令到我地好似身處係美國曼哈頓咁。

「聽講呢間野最出名係燒慢煮黑醋春雞同德國豬手,我地各叫一份啦!」

我同Claudia都冇意見,所以都係由Leon同Miki拍版。始終佢地兩個係老手。

「係呢你地兩個幾時係埋一齊架?」Leon打趣咁問。

「廿四個鐘頭之前既事囉!呢條友無啦啦係大庭廣眾下向我表白囉!搞到我幾唔好意思!」Claudia怕醜咁講。

「咩唔好意思啊你而家就係屬於我架啦哈哈!冇得反口啊!」

「咪幾好!我地既組爸組媽真係變左梁生梁太啦!」

「我地拍拖姐但冇話應承嫁比佢喎!」

「你安安分分做我既梁太啦!」

「想我嫁比你好難啦!」Clauida打我。

「應承人啦Claudia!」

「係囉難得組爸咁有誠意!」

「係都你地兩個拉埋天窗先啦!」

「哈哈講呢啲!」

原來Waiter已經放左我地份晚餐係枱面

我就負責切同分比Claudia食,而Leon就負責切同分比Miki食。可能下一次就係帶我地既小朋友出黎食飯。

「BB分比你食啦!」我話。

「好啊!我都喂BB你食啦!」Claudia話。

「你兩個好肉麻啊!」

「係呢食完飯有冇下場先?反正我今晚留係Miki屋企到訓。你地有冇野做啊?」

「不如今晚上Aaron屋企玩啦!佢屋企又大又靚!仲有PS4同Switch啊! 」Claudia提議。

「唔好啊!!!!」我扮小朋友喊住咁扯Claudia件衫尾

「嗱而家我地三票對一面,你輸左要聽我地話,服從我地既指令!不得上訴!」Claudia打我。

「係啊我識左你咁耐我都冇上過組爸屋企喎!帶我地上去啦!」

「唔差左帶埋我上去啦!」

「。。。。。。。。」

「係呢你地兩個係咪都係搭車黎架?」

「No!我地有揸車啊!」

「搞錯啊出旺角都揸車?你地真係有錢!」

「因為我地今日要帶我表弟表妹出街啊,為左方便啲要揸車囉!」

「原來咁快做保姆!幾時見家長姐?」

「高度機密!」

「好叻咩?」

「事不宜遲我地食完就出發啦!」

我地三個食完就返左去Langham到攞車。
已有 0 人追稿