《遊夢玩家》［夢想］［網遊］［電競］（全程廣東話）: 第一章 夢想由DSE結束開始
DSE，香港中學文憑考試，係一個人生嘅分叉口，唔知道你會失望定係會以勝利嘅姿態去迎接DSE之後嘅人生。
樂天明並無考慮太多，只見成績從佢手中攞到之後，佢只係回想起父母之前同佢講嘅一句話：「你真係決定咗？」好明顯佢嘅父母一開頭都係懷疑佢到底做唔做到玩網絡遊戲之餘可以養活到自己，但之後樂天明並無多想，憑着佢堅定嘅意志，佢決定咗接住落嚟要成為一位網遊職業選手。
係乘搭巴士前往工作地方附近嘅網吧途中，佢正關注緊路途上唔同嘅宣傳廣告牌或者巴士上嘅廣告貼紙，第九屆CODE online職業聯賽總決賽將會係今晚舉行， 樂天明當然冇辦法唔關注呢一個佢覺得最為盛大嘅一場賽事。
「雖然近年玩家係少咗，不過職業聯賽依然係遊戲界裏邊係數一數二嘅盛事，莫講話總決賽啦！今場總決賽依然係有由聯盟戰神陳霆洪帶領Dynasty-王朝，話晒佢地都係⋯⋯」聽住手機裏邊嘅主持喺度簡介今場比賽依然係有聯盟戰神出現嘅時候， 樂天明成個人對今日比賽戰神將會打出咩嘢戰術充滿住興奮同好奇。
不過係觀看今晚呢一場盛大嘅盛會之前總係會有一啲責任要履行，就係返工！始終唔返工就養唔起自己，佢落車睇一睇自己身上嘅手機時鐘。閉！就嚟要遲到！
匆匆忙忙最後都係趕到M記嗰度換好制服就開始做嘢，但佢一啲都唔覺得辛苦，始終今日都係一個喜慶嘅日子。
「喂！ 銳邦，話時話你有冇打機㗎？識咗你咁耐⋯⋯」係工作嘅途中樂天明左問右問問吓一啲有冇識得呢一個遊戲有一齊工作嘅人。
「走開，咪阻住我做嘢！」 樂天明問咗一個同佢差唔多年紀嘅人，佢叫蕭銳邦，之前兩人都係就讀同一間中學，不過名叫蕭銳邦嘅男仔後尾就變咗一個夜青嘍。
「唔係呀，CODE Online⋯⋯」樂天明迫不及待好想問吓佢到底知唔知道今晚嘅盛事，點知⋯⋯
「我X交叉你個YZ，再香蕉咁嘈啊嗱！」佢凶神惡煞嘅樣樂天明都係唔敢再問佢啦。
不過總係有啲同事知道呢個遊戲嘅，雖然唔多，但其實樂天明聽到嘅並唔係一啲有關於今晚盛事嘅期待，更多嘅好似係對呢個遊戲嘅批評。
「話時話呢而家呢隻遊戲越嚟越冇水準⋯⋯」
「啲遊戲選手一個二個冇嚟正經，淨係識得喺度sell隻game。」
樂天明希望佢聽到嘅都只不過係一個幻覺。
CODE online，係一款MMORPG遊戲，起初因為其開放性、公平性同創意性飽受香港眾多網遊玩家嘅喜愛，更因為職業聯賽，令到唔少傳說誕生咗出嚟，特別係Dynasty-王朝嘅陳霆洪更加係樂天明同一眾玩家嘅偶像，當然唔止得佢，聯盟法王、聯盟預言家、三大精算師等一眾傳奇都係因為依個遊戲先被發掘佢最大嘅遊戲潛能。
樂天明完全唔抵得自己心中嘅遊戲俾人咁樣批評，結果佢沖左上去同嗰兩個人理論，最後都係俾經理鬧左一餐，而且俾人罰要打掃乾淨好間M記先好走。
途中嗰兩位店員當然就好唔憤氣，明明係 樂天明上前同佢哋理論，點解最後會變咗佢哋都要受罰。 樂天明雖然好唔甘心但都知道其實係自己嘅錯，所以最後都勉為其難將所有責任咩晒上身，自己打掃到好晏先至離開M記。
本身樂天明預好咗放工之後喺商場沖去網吧應該仲講得切睇總決賽，但就咁樣俾人罰一罰，佢完全唔記得晒時間，去到好夜先至幾番起要去睇總決賽，佢一路狂奔，承載着嘅係佢對遊戲嘅熱誠，係佢對職業選手偶像嘅崇拜。最後佢沖左去商場附近名為遊夢網吧，因為呢度距離商場最近。
「唔該13號一粒鐘先啦！」佢望住滄桑嘅網吧店員，店員無奈咁問咗佢一句：「嚟睇總決賽㗎？」
「係呀！」樂天明條件反射咁樣搭咗，店員依然無奈咁樣同佢講話：「冇必要睇啦！」
「係咪完咗啦？結果係咩啊？」 樂天明迫不及待咁希望知道個比賽結果但店員問非所答咁樣答咗句：「結果啊，垃圾game⋯⋯每年都係咁樣打法有啲悶喎⋯⋯根本就係做假⋯⋯」
「我⋯⋯」 樂天明其實心裏一早就知道係呢個答案，因為⋯⋯
連續四年總決賽都係由聯盟戰神帶領嘅Dynasty-王朝對上聯盟法王王安帶領嘅Federation-聯邦，每次結果都係一樣，雖然未必次次都係同一個人贏，但都係同一個方式贏，大家已經睇到十分無趣。
「無限暴擊呀嘛⋯⋯依家打到好似周街啲人都識晒啦，有幾出奇啫⋯⋯」店員口快地講咗呢一句話。
「你！有本事你嚟呀！」 樂天明惱羞成怒都爆咗呢一句話，最後佢都係講咗句唔好意思，但亦都冇理由就咁樣放棄左佢嘅目標。
轉個頭佢就已經又諗通左：「如果現時要係咁淒慘嘅話，點解唔可以令到佢再次發光發熱？」
「都唔知道你喺度噏乜嘢？」店員見到佢自言自語都唔鬼理佢。
「唔該通宵啊！」 樂天明擺咗張$50係店員面前嘅枱面。
「垃圾game你就咪鬼練啦⋯⋯」店員諷刺左一句。
「你唔需要過問！」 樂天明眼神非常堅定就連店員都嚇咗一嚇，就收咗佢啲錢，開着左13號機。
樂天明亦都坐咗埋去開咗CODE online嘅伺服器撳咗佢嘅登入帳號同密碼，周圍嘅人都開始議論紛紛。
「垃圾game仲玩？」
「貪型咋掛？」
「想做垃圾玩家？」
樂天明最後都係冇同佢哋鬥嘴，默默地戴上耳機開始佢嘅旅途。呢一個成為職業玩家嘅旅途。
此時此刻店員正喺度了解眼神如此堅定嘅依個男仔。
「PVP50%勝敗率⋯⋯呢個細路都唔錯⋯⋯」