《疫戰都市》-《這個殺手不太濫》: 第三十一章 - 森羅萬象

「我爸爸結識媽媽嘅目的竟然係為咗謀奪研究成果.......咁我媽媽究竟係點死嘅？」金不換有點愕然。
「我妹最後懷住悲憤同內疚嘅心情生咗你，可惜之後患咗極嚴重嘅產後抑鬱，嚮你出世後半年就自殺死咗。」
「件事後來點樣？」
「就喺我爸爸進行緊第三期研究嗰陣，當時我因為一早接受咗基因改造而擁有特殊能力，所以被軍方招攬作為研究對象。由於我自細係一個武痴，亦精通世界上各種武術，包括詠春、太極拳、空手道、劍道、合氣道、跆拳道、自由搏擊、綜合格鬥同泰拳，所以軍方搵咗一套已經失傳，類似中國氣功嘅古武術俾我練習，用嚟測試我作為超級士兵嘅能力，順便研究一下古武術點樣可以運用喺戰場格鬥上去提昇戰鬥力，依套古武術就係森羅萬象。最後我知道屋企發生咗慘劇後，決定返去調查，結果係我妹同我講出事件真相。」段連城一臉欷歔地說。「為咗報仇，我決定一個人去搵高城府，但佢最後人間蒸發。」
「結果你收養咗我？」
「冇錯。因為我妹飲咗支基因改造藥物，所以你一出世就已經遺傳咗藥物嘅功效，成為改造人，亦即係馭者。由於我唔想你一出世就成為其他人嘅研究對象，所以我決定帶走你，並且親自教授你所有我識得嘅武功，包括森羅萬象。為咗隱藏你身世，我甚至連你父母係邊個都冇向人提起。之後發生嘅事，你應該清楚.......」
段連城為剛死去的何大義蓋上眼睛，雙手合十，然後再說：「當我帶你離開段家大屋後，為怕有朝一日被高城府搵到你，索性將你隱姓埋名，等冇人知道你係我外甥，我以金不換為你起名字，目的係希望你唔會利慾薰心，被金錢同權力所利用。當我一邊修煉森羅萬象，一邊揾隻禽獸下落嘅時候，我無意之間從黑幫人物口中打聽到一個擁有異能嘅人物，佢就係機關內嘅頭號殺手人中虎，面相同高城府一模一樣，可惜呢個人作惡多端，早已經被其他仇家所殺，命喪黃泉。」

此刻，在外面刺探的人以詭譎的身法離開，那人就是韓風。