在機關的本部,這裡被多輛從國安局調動過來的裝甲車重重包圍。負責內裡運作的一些殺手由於缺乏支援和補給,紛紛棄械投降。負責今次清場行動的主管隸屬國安局的最高指揮中心,由一名主管級人馬領軍,此人綽號烈火,名叫李雄心。當烈火把所撿獲的武器點算完畢後,命令所有投降的殺手進入地牢,並且吩咐下屬逐一核對投降者的人數和名單。當中有幾個資深的嘍囉好像認識李雄心本人,欲上前解釋。
「請問你係烈火哥嗎?我哋呢度班兄弟個個都好祟拜你呀,可以升職上國安局為國家效力,雖然我哋跟隨八腳馬,但係你哋風雷火雨四傑先至係我哋做細嘅典範呀,今次實屬一場誤會,請你高抬貴手……」其中一個嘍囉以擦鞋的嘴臉說。
「唔怕老實話你知,你哋全部都會好快升。」烈火說畢,然後戴上氧氣面罩。
「升去邊?係咪國安局?」
「升上神台。」烈火說話的同時,舉起手上的火焰發射器燒向一眾嘍囉,一班嘍囉立即全身著火,在高溫和火焰燃燒之下身體瞬間化成焦炭,慘死現場。
「你哋一齊向上級作證,機關內有多名武裝份子拒絕投降,終於被我哋以重火力擊斃。」烈火向一眾戴上氧氣面罩的國安局同袍說。

在軍方醫院內,金不換和五十嵐飛燕一起渡過美妙的日子,好像危機已經悄然而去。
「今晚係留院檢查嘅最後一晚,醫生話我哋聽日可以出院,妳開心嘛?」金不換買了一些零食,在休息室內與五十嵐飛燕分享,休息室內的牆壁皆是巨型電視屏幕,製造出如同森林的虛擬室外環境,雙方邊談邊吃,彼此有說有笑,氣氛融洽,二人在這個共同的空間吃出個滋味來。
「我覺得留喺醫院呢段日子最開心,唔駛過住已往打打殺殺嘅生活,又可以每日同自己喜歡嘅人見面。」同樣帶點不捨的五十嵐說。




「咁依度邊個係妳最喜歡?」
「唔......醫生......姑娘......物理治療師......佢哋都唔算得上係。」
「剩番一堆病人......啱嘛?」
「喺我面前就有一個合適嘅病人,不過人哋個心唔知嚮唔嚮我呢度........」五十嵐說話時眼睛偷望著對方。
「其實......以前嘅野,已經過咗咁耐.......我相信呢個病人已經放低咗心入面個包袱,等緊重新上路。」
「上路......呢度附近我真係唔識路喎,除非有人肯同我一齊行啦.......」
「唔知我哋幾時可以再喺埋一齊?」
「你咁樣算係求愛嗎?我哋仲未算正式拍拖喎。」
「如果妳願意嘅話,我哋隨時都可以正式開始。」
「咁樣啦,我聽日要上國安局大樓向文治提供新證據,協助調查我爸爸嘅命案,我哋聽晚約嚮國立博物館睇展覽好嗎?人家去國安局順道同你打聽一下特赦令係咪已經辦妥。」




「好,不見不散。」
「為隆重其事,你要記得為自己裝扮一下,我唔要每次見到你都係著住嗰件招牌殺手皮褸。」
「一定。」

這天,五十嵐飛燕跟文治的秘書約好了下午會面的時間,自己準時到達國安局的會客廳。可是進入與她會面的卻是另一名男子。
「妳好,我個名叫雷鳴。」此刻,雷鳴伸出手欲跟五十嵐飛燕互相握手。突然,一陣莫名的恐懼感打從五十嵐心底冒出來。
已有 0 人追稿