【甜/真人真事】我是他的常餐情人: 五十一

第51章
係同佢落去買dinner嘅途中，我已經同Tony講咗今晚會同Sara食飯，同屋企人講咗今晚會過Tony度訓，今晚我唔再打算拎起個電話，我要度過一個只有佢嘅夜晚、要好好咁記住佢嘅體溫。

「喂..」佢一手托起我patpat，我嚇一嚇雙手抱緊佢隻腳都橋住佢條腰，佢大步流星地抱住我行去張床度，再小心翼翼地彎腰將我放落張床度。

「抱你去休息下咋傻妹.」唔知係咪知道我此時此刻心情未到，佢好似心有靈犀咁錫咗我一啖抱住我話休息，放低我之後又自顧自咁除面衫面褲掀起被上床。

我翻轉身背對住佢，佢從後抱住我，搵到最契合嘅角度就無再有咩大動作，過咗一陣仲傳嚟佢均勻嘅呼吸聲，其實我無同佢講過我唔習慣係人地嘅擁抱入眠，更加唔好講佢規律地打係我頸嘅氣息其實令我近乎僵直，所以佢咁樣我係處於大腦運轉唔到嘅狀態。

過咗一陣，我嘗試係佢懷抱入面掙脫少少出嚟，將佢手放係我后頸下面枕住，咁我個身至少可以輕微郁動，然後用手輕輕拉高被，再過咗一陣我慢慢地轉身望住佢，好耐我都無咁樣嘅機會近距離咁望佢，諗翻對上一次可能係我同佢發生關係之前同佢OT嘅時候，點解好多時，人同人係肉體親密之後心會變得更加遙遠呢？



呢個時候我又問咗自己一個不斷困擾我嘅問題，到底再俾我揀一次，係安分做佢同事默默仰望佢，定好似而家咁將關係拉入困局，再無辦法名正言順咁同佢對望？