【甜/真人真事】我是他的常餐情人: 六十三

第63章
「咁你記唔記得我幾時生日？」假如你都有少少少少對我上過心，就會記得，畢竟上年生日蛋糕你都有份買，

「你到時早啲講我都會幫你慶祝。」提早講即係唔會記得正日係幾時啦。

「你唔係應該同啊嫂staycation咩？到時我生日都會有人陪。」佢係咪有病，正日唔交人到底知唔知規矩。

「佢地唔係話你同條仔散咗咩，唔需要我膊頭攬攬？反正我條女都成日唔係香港。」佢唔係度，所以你連生日都要偷食，點解我以前唔覺得你咁差勁？我點解會鐘意一個咁嘅人。

「我地無分手，多謝關心。」對住佢總有啲口硬，我唔想佢覺得我點都要搵翻佢，我刻意扮到我好多好多人陪好似咁樣就會好過啲。


「咁你又俾咁多仔埋你身？又去食飯又剩。」佢陰陽怪氣咁講，
「我以前都係咁架啦，同事食飯有咩唔可以。」

「咁係咪食食下飯又同人地哋講唔好再送你搭車，唔想自己一個？」佢真係好仆街，總係欺騙自己扮到唔係一個對我好特別嘅人，咁就唔需要對我有愧疚，我唔理解點解我明明同佢講過我鐘意佢，佢都可以咁講。

又或者佢對我真係一啲感情都無，因為但凡有多少感覺嘅人，都唔會捨得咁傷對方嘅心。

「你唔好再msg我呢啲無聊嘢啦唔該。」我無再多餘嘅力氣同佢周旋，就等我係你心目中嘅形象跌到谷底，咁我自覺不能翻身就唔會再耗費心思係你度，不得不放棄。

Sara問過我咁捨得放低未，我答佢，係不得不放低。


得一個人嘅獨角戲，太累了。