【甜/真人真事】我是他的常餐情人: 六十八

第68章

我承認帶Keith去一間係Issac屋企附近、佢帶我去嘅鋪頭係我私心，即使佢同我完咗我都係不由自主地重複又重複行我哋以前行過嘅路，我用同另外一個人嘅回憶覆蓋佢同我嘅過去，咁樣我下一次經過就唔會淨係諗起佢。我甚至有私心會突然之間見到佢，咁我就可以話佢知，係啊我仲有好多選擇，而我唔會再俾你得到我。

「Den，你睇下嗰邊張櫈嗰嗰似唔似Issac？」Keith突然好興奮咁拍住我講，

我定眼一望，幾乎一秒我就可以確定係佢，放假嘅日子居然俾我求仁得仁見到佢，佢係路邊一間鋪門外坐住，好似等緊嘢食咁。

「咁我哋不如叫埋佢去食糖水啦？」Keith愛熱鬧嘅性格係呢個時候發作，好似唔記得咗佢同我係date緊，我任由佢半拉我去對面街小跑到Issac面前。



「er..唔好啦掛」我細細聲咁講，然後又諗唔到咩理由可以拒絕。

「Issac哥！放假都一支公咁悶嘅~」佢拍咗下Issac膊頭，呢個時候茶餐廳職員拎咗一大袋外賣出嚟。

Issac抬頭見到我同Keith，目光落喺keith仲拉住我手腕嘅手上面，佢定眼望咗我一下。

「額，我哋係附近食完嘢，咁啱嘅。」我習慣性咁解釋。
「無啊我落嚟買外賣咋嘛。」佢輕描淡寫咁望住Keith講，然後目光又同我對上，買外賣咁大袋，咁睇嚟佢都唔係放假一支公咁悶啊。

「BB，我買咗你鐘意飲果隻茶啊~」不遠處傳嚟一個女仔嘅聲，向聲音來源一望見到有過幾面之緣嘅Issac女朋友拎住兩杯奶茶行過嚟，我記得佢話女朋友成日唔係香港，咁一翻到嚟癡住都好正常。



我唔再同佢糾纏，對佢嚟講跟本一啲影響都無，
所有嘢翻天覆地嘅從來都只係我一個。