【二月廿九番外篇】《沒有穿越的平行時空》: 第六章 相識
第六章 相識
Ryan拉著Yeesa的手，帶她逃離現場。不幸地，黑幫誤認他們是另一幫的人，對他們窮追猛打。
Ryan見追趕他們的人有武器，情況非常危急，於是帶Yeesa去他所住的大廈。和Yeesa一樣，Ryan也是住在舊樓，而且門口有大閘。他們進入大廈後，立即關好大閘，並隨即上了一層樓梯。黑幫猛烈拍打大閘，大聲叫囂，叫他們開門。
Ryan︰「一係上我屋企坐陣先啦，佢哋一陣間就會走㗎喇！」
Yeesa︰「你住呢度嘅咩？」
Ryan︰「唔係我點開門呀！」
Yeesa有些猶疑。雖然Yeesa對Ryan有一種似曾相識的感覺，但他們確實互不相識，不可隨便上陌生男人的家。
Ryan︰「點呀？」
Yeesa︰「唔使喇，我企喺度等陣得喇。」
Ryan︰「唉，一係上多兩層嘅樓梯坐陣先喇！」
※※※※※※※※※※
二人坐在Ryan家對出的樓梯位置。
Yeesa︰「頭先唔該晒！」
Ryan︰「客咩氣吖，唔通扮睇唔到咩！」
Ryan拿了樽裝水給Yeesa，Yeesa接過後立刻飲用。剛才走了幾條街的路，正好降降溫，抖抖氣。
面對突如其來的二人獨處，Yeesa有一種心跳加速的感覺，Ryan也是。
Ryan︰「你叫咩名呀？」
Yeesa︰「Yeesa，你呢？」
Ryan︰「我叫Ryan。」
Ryan從袋中取出零食，是他工作的那間日式超市快將過期的零食。Yeesa有些猶疑。
Ryan︰「我話就嚟過期嗰啲呀，冇嘢㗎，食啦！」
Yeesa有些餓，見零食未到期，便拆開食用。
Ryan︰「係呢，其實，你係咪識我㗎？」
雖然問題有些奇怪，但Ryan也勇敢地問道。
Yeesa︰「其實我唔識你㗎，但係……」
Ryan︰「但係咩呀？」
Yeesa︰「我唔知點講好呀，我講咗出嚟你都未必會信。」
Ryan︰「我問得嘅話就梗係信你啦！」
Yeesa︰「唉，我講啦，我冇特別意思㗎。其實最近我唔知係太攰定係點，出現咗啲類似幻覺嘅嘢，但又好真實，好似親歷其境一樣。而且，我喺我睇到嘅影像裡面，我見到你。」
Ryan聽到這裡，不禁笑了出來。
Yeesa︰「你笑咩者，唔係你諗嗰啲嘢呀，我都話冇特別意思咯！」
Ryan︰「係，我冇諗埋一邊，只係覺得你好得意者！」
Yeesa和Ryan互相望著對方，雙方好像也有少許感覺。
此時，樓下的黑幫又再歇斯底里地敲打樓下大閘，打斷了他們的氣氛。
突然，Yeesa開始感到肚痛。
「你又話啲嘢食冇過期嘅。」Yeesa按著自己的肚子說。
Ryan︰「吓！」
Yeesa︰「我唔得喇，你住邊層呀？」
最終Yeesa都要上Ryan屋企解決。
※※※※※※※※※※
Yeesa從廁所出來，手仍然按著肚子。
Yeesa︰「食親你啲嘢都出事㗎喎！」
Ryan︰「會唔會係你自己腸胃唔好呀，我都冇事！」
此時，樓下終傳來警車聲，黑幫應該會離開。
Yeesa︰「喂，樓下啲人散晒我就會走㗎喇！」
Ryan︰「哦，我都攰喇，我沖個涼先，你自便啦！」
Ryan洗澡後出來，發現Yeesa還未走，原來她在客廳的梳化上睡著了。Ryan見狀，隨意拿了一件外套，幫她蓋好，以免她著涼。Ryan望著Yeesa的睡相，非常可愛，看來Ryan已對Yeesa動心。
Ryan心想，不知她會睡多久，如果被母親和妹妹見到，不知如何是好。事實上，Yeesa真的太累，竟然真的睡到第二朝。
Ryan媽看見Ryan帶女孩上屋企，還要過夜，心裡非常高興，因為Ryan已很久沒拍拖，而且他年紀也不輕，是時候要想成家立室的事。由於Ryan趕時間返工，也沒有作太多解釋便離開。
相反，Ryan的妹妹芷晴很不高興哥哥帶女孩子上屋企。她見到自己的外套披在Yeesa身上，更加是無名火起，大力將水杯放在餐桌上。響聲終弄醒Yeesa。
Yeesa醒來，看見自己仍在Ryan家，而且已是早上，又見到一個陌生女子，覺得非常尷尬。Yeesa和芷晴打招呼，芷晴沒有回應，「嬲爆爆」地嘭門，離開家門上學。
沒多久，Ryan媽由廚房出來，看見Yeesa已醒來，立即拉著她，邀請她留下吃早餐。Yeesa感到盛情難卻，便留下來吃早餐。
Ryan媽︰「Ryan今朝同我講咗喇，佢話呢區呢，話就話有警察行更，但到你真係要搵個警察就影都冇㗎！」
Yeesa笑而不語。
Ryan媽：「你同Ryan識咗好耐喇？佢好少帶女仔上屋企！」
Yeesa︰「其實我同佢唔係好熟㗎喳！」
Ryan媽：「係咩！」
Ryan媽以強烈渴求媳婦的眼神望著Yeesa，令Yeesa相當尷尬。
Ryan媽去執拾碗碟，但不幸扭傷腳。Yeesa立即扶Ryan媽坐好，並問Ryan媽有沒有藥酒。雖然Yeesa只是剛認識Ryan媽，但Ryan媽是長輩，Yeesa仍然關懷地幫Ryan媽搽藥酒。Yeesa就是一個會關心人、想身邊人都開心的女孩。
芷晴打電話給哥哥，質問那個女孩是誰，以及為何要用她的外套。Ryan不想多作解釋，並提醒她已將補習費放在她的書包內。雖然Ryan自己並不是賺到很多，但也盡量滿足妹妹學習的需要，Ryan也是一個想身邊所有人都好的男生。
※※※※※※※※※※
Ryan下班回家，Ryan媽當然纏著Ryan不放，狂問Yeesa的來歷。Ryan對母親和妹妹說出他和Yeesa的相識經過。
芷晴：「好地地一個女仔，點會隨便上陌生男仔屋企過夜！」
Ryan媽：「都話咗Yeesa太攰，唔小心瞓著咗咯。」
Ryan︰「依家你哋知道晒啦，佢唔係我女朋友嚟㗎！」
Ryan媽：「計我話，呢個女仔係你鍾意嗰類型，同埋最重要呢，就係佢對長輩好好。今朝我扭親隻腳，佢即刻走過嚟扶我，仲要幫我捽埋藥酒。你話喇，呢啲女仔喺邊度搵吖！」
芷晴：「總之我就覺得佢麻麻地啦，佢竟然用埋啲咁舊嘅橋去識阿哥。」
Ryan媽：「芷晴，唔可以咁話你阿哥個女朋友㗎！」
Ryan︰「都話唔係女朋友咯！」
Ryan媽：「係唔係都好，拿拿臨約佢出嚟，當面同佢講聲多謝，同埋約佢上嚟食餐飯啦！」
Ryan︰「係喇係喇！」
其實Ryan根本沒有Yeesa電話，想約也約不到。
這幾天，一到特價時段，他都特別留意超市出面的情況，期望Yeesa會來買特價壽司，可惜事與願遺。Ryan 痛恨當時忘記了抄牌，記得時Yeesa已經睡著了。
※※※※※※※※※※
自從Yeesa上次上了神聖幾何的直播節目，雖然未能解釋到她所遇到的怪事，但講出了自己的經歷，心情也改善不少，晚上發惡夢的頻率也降低了，心理上真的有所幫助。
Yeesa見心情好多，今晚放工後，又到超市買特價壽司，可惜今次她又爭輸了。她心想：「唉，次次都買唔到，上次買到又揀中盒勁多wasabi。唉，睇嚟黑氣都係要跟住我！」
就在此時，Ryan遞給她一盒雜錦壽司。