【二月廿九番外篇】《沒有穿越的平行時空》: 第九章 催眠
第九章 催眠
在Ryan房裡的電腦，正播放著神聖幾何在YouTube上的網台節目：
「從科學角度嚟講，人類行為係一堆物理活動，人類好多時都係base on因果論，好多嘢有原因去support，但係如果呢啲原因背後可能仲有其他嘢去影響我哋嘅決定，人類究竟係咪真係有自由意志去選擇……」
Ryan一邊觀看著會長余家聰所講關於自由意志的節目，一邊搖頭說：「都唔知佢講乜，唔怪得冇人睇！」之後更悶到睡著了……
某日下午，嘉嘉來書店探Yeesa班。
嘉嘉：「點呀你，依家命中注定嘅有兩個男人喎，點揀呀？」
Yeesa︰「咩呀，咩命中注定呀？我只係見到呢兩個男人嘅畫面者，唔代表啲咩。」
嘉嘉：「你都有好幾年冇拍過拖，估唔到一嚟就有兩個俾你揀！」
Yeesa︰「夠喇，唔講喇！」
嘉嘉：「仲記唔記得嗰個surprise party呀？」
Yeesa︰「記得，我訂晒汽球㗎喇！」
嘉嘉：「唔係講呢啲呀，你要搵多一兩個幫手。就搵Ryan同嗰個余家聰啦，我都想一次過見晒呢兩個男仔。」
Yeesa︰「唉，遲啲先算啦。嗰個余家聰，真係成個會長咁樣高高在上，佢係唔會睬我㗎！」
嘉嘉：「我唔理呀，至少都要捉一個過嚟俾我見呀！」
※※※※※※※※※※
Ryan不放心Yeesa自己一個去神聖幾何進行催眠，想陪同Yeesa一同前往。巴西龜跟Yeesa說，學會眾人商量過後，覺得Ryan有機會對催眠造成影響，所以他們不想Ryan同來。家聰為了整個催眠程序均能順利進行，他決定關羽、Alien、耶穌和巴西龜都要避席，期望跳掣和Yeesa能更專心，家聰自己也只會在旁進行觀察和支援。
不過，家聰同意Yeesa可找一至兩位好朋友同行，釋除Yeesa的疑慮，令Yeesa可以更放鬆。Fiona和嘉嘉知道Yeesa要做催眠去解決之前閃影的事，都搶著要來，順便幫Yeesa看看那個會長余家聰究竟是一個怎麼樣的人。
Yeesa、Fiona、嘉嘉、跳掣和家聰都齊集在神聖幾何。家聰留在直播室，觀察著整個催眠過程。Yeesa坐在梳化，跳掣在旁主持催眠。而Fiona和嘉嘉則在Yeesa的另一邊陪伴在側。
跳掣開始進行催眠。其實催眠並不如電視劇所形容，可以完全操控人的思想。反而是讓被催眠者掌握控制的能力，令其五官感覺變得更敏銳，提升集中力和記憶力。
沒多久，Yeesa已開始進入高度集中的狀態。除了跳掣，在場另外三人都不敢胡亂發出聲響。
跳掣：「Yeesa，你依家喺閃影嘅畫面入面，見到另一個嘅自己喺日本嘅街頭行緊，咁嗰陣係日頭定夜晚？」
Yeesa︰「夜晚。」
跳掣：「你留意一下你另一個自己，同埋其他行人，佢哋身上著緊嘅係咩季節嘅衫？」
Yeesa︰「冬天，好肯定，因為落緊雪，成條街都係雪。」
跳掣：「咁，附近見唔見到有咩景物、建築物、地標之類嘅嘢？」
Yeesa︰「唔……有電車，係喺路面行走嘅電車。啊，我見到PARCO，對面就係我見到新聞報導嘅螢光幕。」
跳掣：「當時嘅螢幕播緊啲咩？你盡量將你見到嘅嘢講出嚟。」
Yeesa︰「我見到螢幕上面嘅時間，係……係22:32。新聞報導全部都係講日文，我聽唔明，但係字幕寫住「交通事故外國人1人死亡」，之後我就見到……見到又有另一個嘅自己，喺意外現場被救護員救出。流咗好多血，而且呢個自己已經暈咗，冇咗知覺。」
Yeesa當時情緒激動，握著跳掣的手，跳掣也作出適量的安撫。
跳掣：「唔使擔心，你見到嘅未必會成真，我哋想知道你見到嘅畫面嘅所在地。你仲有冇見到啲特別嘅嘢？」
Yeesa︰「冇喇，當時嘅我已經好焦急，周圍用英文問路人螢幕新聞報導嘅係咩地方，但完全冇人去理佢。吖，螢幕有啲嘢，我之前冇留意到！」
跳掣：「係咩？」
Yeesa︰「札幌呀，螢幕寫住札幌呀，左上角寫住「札幌市 -8°C」
跳掣：「Yeesa，你做得好好，唔使驚。盡量睇多啲唔同嘅畫面，記低一啲細節……」
跳掣未講完，Yeesa便張開眼，結束了這次催眠。
嘉嘉：「唔使驚喇，冇事㗎喇，番返嚟香港喇！」
Fiona和嘉嘉一同攬著Yeesa。雖然Yeesa再次經歷了閃影的畫面，但有好朋友陪伴在側，心情沒有過份地高低起伏，心情很快便得到緩和。家聰叫Yeesa先休息十分鐘，而神聖幾何的其他成員也於催眠完結後返回基地。
※※※※※※※※※※
巴西龜：「Yeesa，你見到嘅畫面，係咪喺呢度呀？」巴西龜用Google Map開了實境圖片，讓Yeesa確認地點。
Yeesa︰「係呀，係呢度呀！點解你哋咁快就搵到嘅？」
跳掣：「都係你叻女囉，見到螢光幕寫住札幌，又見到PARCO，咁就唔難搵啦！」
巴西龜：「我哋確定到地點，而且係一個真實嘅地方，並唔係虛構，咁就証明Yeesa所見到嘅嘢，真係有可能會發生。」
Yeesa立即擔心起來，生怕自己將來真的會在北海道遇上交通意外死亡。
家聰吸一口香煙後，道︰「之前我都講過，個天俾呢個能力你，等你可以見到呢啲畫面，就係想你去改變佢……」
巴西龜插口，道：「所以你唔使咁擔心㗎，我哋成個學會嘅人都會撐你。」
家聰斜視著巴西龜，埋怨他打斷自己的話。巴西龜立即用手勢「耍冧」。
家聰：「札幌市晚上會有負8度嘅日子，集中喺11月尾至3月頭。照目前嚟睇，極有可能係2月28號或者3月1號。」
Yeesa︰「點解你咁認為？」
家聰：「你有預知嘅能力，並唔係偶然，所以你睇到嘅影像，應該唔會係隨機。不過唯一未確定到，就係年份。」
Yeesa一直很留心家聰的說話，又想拿起水杯喝水，所以一不留神，撞跌了水杯。家聰見狀，立即接著水杯，以免水杯跌落地板而弄破，Yeesa也做著同一個動作。亦即是說，Yeesa握著家聰的手。
此時，雙方好像有觸電的感覺。家聰的手錶隨即響起，證明家聰的心跳突然加速。就在手錶響起之時，Yeesa再次閃起家聰的畫面。
Yeesa︰「唔好郁，我見到啲嘢！」
家聰知道Yeesa又有閃影，所以他選擇不動，維持著這動作，即是家聰的手握著水杯，Yeesa的手握著家聰的手。
Yeesa︰「係日頭嚟㗎，我見到我被人追，你拖住我逃走，走到去一條橋上面停低。條橋係一條行車天橋，又有行人路，呀，我見到條橋叫做『上白石橋』。之後你俾電話我睇，個日期係，吓！2020年2月29日！」
眾人聽到是2020年，都相當驚訝。Yeesa閃起的畫面，是三年後，証明到她有預知能力，預知到三年後發生的事。
Yeesa︰「你同我講，我係識得由2017年嘅香港，穿越去2020年嘅北海道。之後你帶我去酒店休息，放低咗我最鍾意嘅零食，然後……」Yeesa說到這裡，欲言又止。
在場的人也不敢騷擾Yeesa，避免她見到的影像會被中斷。現場只有家聰手錶的響聲。
Yeesa續說：「之後，你喺我手上抄低『940920』呢組數字，同我講我今晚12點就會自動番返香港之後，你就走咗去喇。之後畫面就消失咗。」