【喪屍】《逃城》: 早晨

「起左身未？」唔知過左幾耐，阿二係門外叫我地。

啱啱訓醒嘅我懵左一懵，我發左個夢，夢見自己大學畢業，對前路毫無想法，周圍搵緊工，原來只係發夢。反而打喪屍咁荒謬嘅野，竟然先係真實。

「阿一，大叔，早晨。」阿二有時候莫名地有禮貌。 

順帶一提，本身跟住阿二嘅命名邏輯，肥仔係阿三，大叔係阿四。阿二叫過一次大叔做阿四之後，我同大叔都呆左呆。之後大叔尷尬咁表示，自己年紀大，叫佢大叔就好。 

「早⋯⋯我地訓左幾耐？」點解個天仲係黑嘅？唔通我地攰到訓左成日？ 





「個鐘無電，我都唔知。」阿二遞比我一個唔郁嘅鬧鐘。 

呢個時候，大叔個肚傳黎咕嚕咕嚕嘅肚餓聲，大叔有啲尷尬，但其實我同阿二同時都覺得肚餓了。深究時間問題之前，都係先填飽個肚。 

「得啲餅⋯⋯唔知放左幾耐，希望食唔死。」我地只搵到幾包餅同兩支水，仲有個杯面，無得揀之下都要乾啃。 

驚無下一餐嘅關係，我地唔敢食曬啲野食。本來已經唔多，留低啲再分三份，最後每人得到兩包分裝嘅餅同三分一杯水。講真，食完好似仲餓左。

連向來冷靜嘅阿二，都望住剩低嘅餅同杯面眼露猶豫。阿二明明好想食又忍住左，吞左吞口水就移開目光。 





「你想食就食多少少啦。」大叔見到阿二咁樣，忍唔住出聲。 

其實我都唔反對阿二食多少少，無佢，我地都諗唔到可以上黎人地屋企。而且一個幾靚嘅女仔肚餓又唔敢食野嘅可憐樣，真係好易引起男人嘅不忍。

但阿二只係搖搖頭，堅持要儲低僅有嘅糧食。 

「我地搵下有咩有用嘅野啦！」阿二見大家都食完，開口建議。有時候，轉移注意力係可以令人無咁餓。