無錯，其實呢個係一個追女仔的故事: 9. 魔法師日常之平日

學識魔法 (咁都叫識？) 前後既魔法師, 日常生活係差天共地。
以前毒男基本上係無朝早, 主因係約翰, 彼得班公會友唔放人。
果班人, 課金多過我份糧。
果班人, 係聯服戰既主力。
毒男雖然係全服擊殺榜排名等5, 但戰力榜上唔到十大。
不過, 技術係無問題,
同埋控場魔法師, 就算輸出, 防, 血少DD都唔係大問題。
玫瑰同瑪麗補血補得好準。
而且阿姨都係課金戰士。
反而公會長勇哥無佢地咁癲。




但每次7 VS 7戰同10 VS 10戰, 佢地公會都係頭3名。
 
毒男生日之後呢半個月, 基本上退出第一戰線。
逢星期五、六都係10點下線。
星期日又好似半死咁不在狀態。
不過成班公會友又好似好識做, 提升咗幾個公會友做備用火力。
毒男有時都會幫手帶新人打副本。
不過大部份時間, 都係用咗黎練習魔法,
而且仲玩多咗樣運動：跑酷。
每日清晨時份, 毒男都會換上新買的運動裝, 上天台練習。




有時仲會走上雙鳳街一帶天台。
其他人玩跑酷係搵命搏, 但毒男唔同,
因為佢識風魔法。
佢第一日已經試過18樓跌落街, 雖然係有阿姨拉住,
不過果種感覺仍然感受到, 果種危險既感覺,
所以毒男可以係危險開始時立即化解。
 
跑完酷之後, 毒男會做基本體能訓練, 然後返屋企沖澡,
但佢唔會開水喉,
因為可以練習水火混合魔法。




有時係會控制失準, 輕微燙傷。
通常都會搵燙火膏搽下, 等夜晚阿姨返黎再治療。
毒男學極都學唔到醫療魔法。
阿姨話佢：「你以前有學Bio架？」
毒男會理直氣壯咁答：「我淨係識第8課：Reproduction。」
阿姨都無佢咁好氣, 不過都知佢對植物系統好了解。
所以木魔法同紙魔法都一學就識, 連印刷同調色都無問題。
 
食完晏, 毒男係會溫書。
有時會溫下上堂的內容, 大部份時間係溫本「胡樂兒百科全書」。
本書雖然得25頁, 但毒男當係寶, 鎖入櫃唔俾阿姨發現。
不過其實阿姨係識開鎖魔法, 不過阿姨仲未知有呢本書。
毒男會努係係記憶入面翻查樂兒既資料, 嘗試增加百科全書既內容。
 
暫時有既資料包括：




姓名：胡樂兒
年齡：22
出生日期：10月6日
身高：156cm
三圍：不詳
家人：
父：不詳
母：51歲
弟：17歲
感情狀況：A0
嗜好：睇電視、整蛋糕、聽音樂
喜愛運動：跑步、行山、游泳
最難忘的事：和父親到沙田坳士多食豆腐花
最討厭的事：老鼠
好朋友：不詳




另外有一些相片。
 
下午係毒男最喜歡既活動：返工 (好似聽到有人話：我最鍾意返工)
當然, 醉翁之意不在酒, 返工之意不在做
總之, 呢個時候既魔法師, 係幸福既。