那一天，有女仔嚟咗男校讀書: 第一章:相遇(第三節)

就係咁樣，xx女書院喺今日派咗30個交換生過嚟，之前我哋每班抽一個男仔去xx女書院度，空咗嘅位就俾啲女仔入嚟。唉!可惜啦，我冇俾人抽中，反而我嗰班全班最毒嗰個毒L抽中咗，條友就爽啦(雖然我覺得佢冇可能溝到女)，但係可以俾成班女圍住都真係好難得㗎!唔緊要啦，可以喺男校入面有女同學，已經係一種福份啦!
「大家好，我叫葉倩晴，你哋可以叫我小倩。」
淨係呢個自我介紹，已經令班上所有狗公同毒男神魂顛倒，因為小倩根本就係嗰種喺條街到經過，十個男人有九個都會望返轉頭嘅女仔。
「好啦，由於有新同學，我哋而家會重新掉位。」班主任李老師一講完，班狗公同毒男又開始起哄。唉!佢哋真係太耐冇喺學校見到女啦(除咗老師)。
全班(包括我)立即用「宇宙第一速度」執好所有嘢，之後出去排隊等班主任幫你揀位，今次絕對係我最期待嘅一次掉位。
最後，我冇得坐小倩隔離，反而坐咗喺佢後面，而中子就坐我隔離。一開始我都有啲失望㗎，不過諗深一層，可以坐喺佢後面都幾好㗎，起碼唔係坐到離佢鬼咁遠先啦。

(待續...)