渾渾噩噩咁就過咗一個禮拜

通常第一個禮拜都唔會有D咩事發生

都係放半晝跟住成班兄弟咁去踢波咁囉

話咁快就到第二個禮拜

星期一嘅時候



我終於搞掂返自己果個生理時鐘

可以準時起身慢慢返學

話說我不嬲都唔會係屋企食早餐

我通常都會去學校附近嘅一間麵包舖度買個包食

今日竟然比我好好彩咁搵到有我最鍾意食嘅菠蘿油



可能你哋見到呢度會問

菠蘿油咋喎有幾特別呀

但係呢間真係完全唔同

唔知點解佢啲牛油特別香 而且個包又鬆軟 唔係到到都食到架

可能就係因為佢特別好食 所以我唔係成日都買到



今日竟然俾我搵到

我feel到今日應該會幾好彩

買完包之後我梗係即刻攞出嚟食啦 唔係嘅話等發毛咩

當我諗住好好享受我嘅早餐嘅時候

哎吔

我比人係背脊到撞一撞

撞一撞事小

我屌你成舊牛油跌撚咗出嚟



嗰刻真係陶大宇

邊條蛋散阻撚住呀叔食早餐

我拎住頭望一望

咦  女仔嚟嘅

佢望住我係咁講

女仔:對唔住啊對唔住啊對唔住啊唔好意思呀

我望到佢個樣好似驚到就嚟喊咁 我都唔係幾好意思鬧佢



我:唔緊要啦 好小事姐 你小心D喇

我諗返起 佢果陣時驚到咁 乜原來我咁恐怖架咩

死啦 無啦啦嚇親人添


之後我都無理到繼續返學

不過好地地冇咗個菠蘿油 有D不爽咁啦

返到學校 咩都唔理

訓返陣先



訓咗無耐之後就俾人叫咗落去早會

唔知大家係咪同我一樣

落早會嘅時候 有九成時間都唔會留意係台上面講緊D咩 通常都係同人吹下水咁

早會完咗之後就返返課室

一番到課室 就見到班友仔係咁係度傾 

同學A:唔知陣間係咩人嚟我哋班呢

同學B:希望係靚女啦

同學C:靚女又點 你咪一樣溝唔到



望到咁嘅情況 我就問下坐我隔離嘅文哥

我:文哥 乜我哋會有插班生咩

文哥:插乜撚嘢班生呀 今日開始會有exchange呀嘛 你唔知咩

係喎 認真 我完全無咗件事

交換生又點 我哋咪一樣要照常上堂

無耐之後 我哋嘅班主任Miss Chou 就入咗嚟

Miss Chou:好啦好啦 係出面都聽到你哋把聲喇 唔好再傾計喇 

咁我哋班都會比下面靜下嘅

Miss Chou:咁就乖喇 好啦 而家就請跟住之後會陪我哋一齊上堂半年嘅交換生入黎啦 大家畀啲掌聲啦

係呀冇錯 真係半年

我都唔知點解呢個exchange會咁耐

跟住就有四個人行咗入嚟 兩男兩女 

咦 咪住先 

果個女仔咪就係今朝搞到我冇得食菠蘿油個個

原來佢係交換生

咁跟住果幾個交換生都係自我介紹 然之後就話咩請大家多多指教之類啦

嗰個女仔原來叫Cherry

佢比老師指咗去坐我左手邊個行

佢行過來一見到我就開始又喺度道歉

Cherry:sorry呀 我今朝真係無心架 掛住望個google map 無睇路 搞到你無咗份早餐

我:真係唔緊要呀 咪當減肥囉

Cherry:吓 你咁瘦都要減肥

我:咁係咪唔得吖

Cherry:得嘅 不過我都係補償番比你好啲

我:咁你陣間請我食個三文治咪當無數囉

Cherry:ok

見到我同Cherry咁講嘢

文哥即刻鉗住我

文哥:仆街仔 咁快食咗條女呀

我:好心你就咪撚癲啦



跟住我將今朝嘅事講晒俾佢知

文哥:唔怪得知你今朝好似頹頹地咁啦 不過呢個會唔會係你哋嘅緣份呢 你又可以追多一條女啦喎 

我:你可唔可以唔好咁痴線呀 文哥 一個菠蘿油 又比你吹到 又緣份又盛咁

文哥:你又知唔會

咁你話我又點會估到文哥會咁準先得架
已有 0 人追稿