【校園】【純愛】那天來了一位交換生: 第十三章
去到下個禮拜
等咗咁耐終於來到呢一日
咪住先
點解講到好似大結局feel 咁嘅
是但啦
今日lunchtime會係班際足球嘅決賽
你問我有冇緊張
話冇就一定係呃你嘅
個阿朗咁撚勁
但係都無辦法啦
今日一早返到學校
Cherry就俾咗個三文治比我
Cherry：你今日決賽要加油啊
我：你唔係支持阿朗架咩 點解同我講加油
Cherry：咁而家我想你加油係咪唔得先
我：緊係得啦 女神同我講加油 咁我仲唔出盡奶力去踢咩
Cherry：成日都誇張到死
跟住嗰日成日都係到訓覺
補充體力呀嘛
你識撚咩
終於
終於
終於
重要嘅事要講三次
去到lunchtime
係終局之戰嘅時候
咁出場陣容都無咩點變啦
唔講咁多
即刻開波
嗶
班際足球賽高級組決賽正式開始
比賽一開始
我哋都係猜下波先
正常吖 未入狀態呀嘛
唔通一開波就鳩爆咩
3分鐘嘅時候
我個班其中一個後防斬左交波比我
迎面而來嘅係阿峰同一個後防球員
我一個假身已經過咗一個球員
突然之間 阿峰係我面前落剷
我心諗
痴撚線
硬地都剷波咁癲咩
我緊係唔會比佢得逞啦
一下左腳橫推
再跳一跳
等佢剷空氣
然後繼續奔向對方禁區
阿朗已經係度係咁逼我 諗住用佢嘅身形逼到我飛走
但係佢點都估唔到我之後落嚟做嘅嘢
我首先用右腳腳面橫推一下
阿朗成個人向左移 試圖進一步逼我
點知.....
我喺呢一瞬間即刻用腳內側將粒波拉返去左邊
阿朗呢個時候即刻失去重心
瞬間一字馬咁坐左係度
呢一招就係細哨當年嘅得意絕技 Elastico
我係靠之前係街場日踢夜踢練番嚟嘅招式
呢個時候全場都喺度歡呼
阿朗好似仲要呆撚咗咁
我跟住繼續爆落底線
然之後一個傳中比文哥
文哥好輕鬆托一托粒波就搞掂
1：0
D班開波之後就開始一系列嘅猛攻
傑仔帶住波一直推到禁區邊
文哥就一直係度迫佢
當文哥差唔多成功卡位嘅時候
傑仔用腳外側輕輕一撥
通咗文哥渠
跟住再靈巧咁射近柱
1：1
唉
～又回到最初的起點～
無辦法唯有繼續啦
唔係可以點
無耐之後
上半場結束
我哋都冇咩特別講戰術
專心踢好下半場好過
下半場開始
大家一直都係互相拉鋸著
16分鐘
即係話我得返4分鐘
我係左路接應文哥嘅橫傳
然後一個elastico fake過咗一個球員
然之後再加速衝向禁區
隊友見到都開始走位 想我傳俾佢
但係真係對唔住喇
救世主一定係我
我去到k角位
阿峰即刻衝過來一個箭步諗住阻我去路
我左腳一推
過咗
阿朗係呢個時候出現喺我右手邊 仲想推鳩我
好彩我重心比較低
佢推唔跌我
我用右腳一的 就越過咗阿朗
然後就到傑仔想迫甩我
我首先用elastico幫我攞返少少空間 再爆入去禁區
果時佢同我相距大概半個身位左右
對面嘅龍門已經出緊迎 準備化解我呢一個攻勢
我等
等
等
喺佢訓低嘅時候
好冷靜咁挑一挑粒波
皮球越過龍門
佢雖然伸直隻手想進行撲救
但係我話之你隻手同杜蘭特一樣長吖
皮球著地之後慢慢流向近住 跟住越過白界
2：1
一定入咗
一定入咗
係反勝呀
阿媽 我得咗啦
咁比賽淨返大約兩分鐘
D班仍然不斷進攻
嘗試搵出缺口
但係我哋已經係度摩連奴泊大巴
佢哋嘅攻勢毫無用處
係接近完場前1分鐘
我再次帶波衝向對方禁區
眼見傑仔衝緊埋嚟
跟住我一個插花.....
轟！！！！
我真係呆撚咗
對面其中一個後防球員係我後面一下收山腳式剷波
將我鏟到飛起
痴撚線
呢下真係中晒我小腿上五吋下五吋
做咗十幾年人都未試過咁痛
我淨係鏈住隻腳係度典嚟典去
文哥：屌你 打人去打WWE啦
我果時都好想起身揼柒果條友
但係我真係痛到起唔到身
就係咁我比俾人扶咗我出場
呢個時候球證都吹雞完場
我哋贏咗啦
突然之間有人捉住我隻腳
係Cherry
佢攞咗個冰袋嚟敷我隻腳
佢隻眼好似
喊緊？
Cherry：好心你就小心啲啦 唔好咁搏呀嘛 搞到自己傷晒
我：喂 大佬呀 係嗰條友剷埋嚟 我控制唔到架喎 我應承你下次小心啲啦
Cherry：你係至好呀
我：應承你
佢聽到之後終於到笑返
望住佢幫我敷腳
我望真啲
其實佢都幾靚吖
眼大大
瓜子面
皮膚又白
對人又好
係唔錯嘅
唔知係咪望得佢太入神
佢好似留意到
Cherry：做咩係咁望住我喎
我：見你靚女咪望下囉
Cherry：口花花
我：你咪又係到偷笑
Cherry：唔理你呀
冇幾耐
阿軒佢哋行晒過嚟
強哥：你頭先就勁喇 一扭三仲入埋波
阿朗：我就比你落晒面啦 咁樣elastico 瘀到喊出來
我：咁啱啫
金仔：你食屎啦 咁啱 點呀死得未呀
我：我落地獄之前點都等埋你先落
就係咁
我終於贏咗呢個冠軍返嚟