不知不覺就嚟到12月

 呢一段時間我都冇乜點練歌
    
 因為決賽係12月20號

 但係決賽之前係我哋學校嘅測驗週

 咁始終讀書要緊



 但係奇怪嘅係Cherry佢哋呢班交換生都要一次測驗

 Cherry同我講返話係要睇下佢哋係另一間學校可唔可以學到嘢

 當係評估個類

 有一晚 係我同文哥佢哋打打下Fifa嘅時候

 Cherry突然之間打電話比我



 我即刻同佢哋講話急屎 就走開咗

 兄弟 對唔住

 Cherry:阿豪 你跟住落嚟嗰幾日放咗學之後得唔得閒呀

 我:而家校隊唔使練波 所以基本上日日都得 做咩

 Cherry:我想問下你有無興趣放學之後一齊去圖書館溫書咋嘛



 我:都可以嘅 你想溫到幾點

 Cherry:我諗住搵到大概6點跟住一齊食埋飯 你得唔得呀

 我:我ok呀

 Cherry:咁就到時見啦

 我係咪發緊夢呀

 Cherry佢約我溫書呀

 通常呢啲情節唔係發生係情侶身上架咩

 我諗到呢度即刻拍吓自己塊面 叫醒自己



 佢又鍾意嘅人架啦

 可能人哋純粹想溫書姐

 唔好諗咁多啦

 跟住我又收到個whatsapp

 我望到個短訊之後

 我開心咗成晚

 我對我個計劃嘅信心又大咗



 去到第二日放學嘅時候

 阿軒過咗嚟問我去唔去踢波

 我:唔啦 有嘢做

 係呢個時候Cherry就行咗埋嚟

 Cherry:阿豪 我行得喇

 阿軒:哦 原來約咗阿嫂 咁我唔阻你啦

 我:你諗左去邊呀 我哋去溫書咋

 阿軒:你都溫書? 平時叫你溫書你都屌晒鬼咁架喎



 我:同你溫書 我自己溫仲好過

 阿軒:擺明就人哋叫你先溫啦

 我:都一樣姐

 跟住我同Cherry就去咗圖書館溫書

 話就話溫書其實基本上都係佢溫

 我大部份時間都係望住佢

 咁唔可以怪我架喎



 鬼叫佢靚咩

 靚嘅嘢自然吸睛㗎啦

 溫完書之後 我哋就去咗附近嘅一間茶記食飯 

 我叫咗個乾炒牛河 佢就要西炒飯

 Cherry:乜你好鐘意食乾炒牛河架咩

 我:係呀 你又知嘅

 Cherry:我見你坐低咗之後諗都無諗就叫咗 咁估到你應該都幾鍾意囉

 我:其實我由好細個嘅時候 已經好鍾意食架喇 我好鍾意乾牛河個種鑊氣同油香

 咁跟住落嚟嗰幾日都係咁樣放學溫書食飯

 終於去到星期六

 我諗住可以休息下嘅時候

 Cherry又叫我出嚟溫書

 我心諗大佬呀吊頸都要透氣吖

 但係口裡說不身體卻很誠實

 我都係去咗

 溫書果陣時我都係大部份時間望住佢

 突然Cherry擰過嚟

 Cherry:阿豪 你可唔可以教我......

 果時我同佢面對面

 基本上我個頭伸前少少 就可以錫到佢

 咁我梗係無錫啦

 但係佢塊面就紅晒

 我吞後咗少少

 我:教咩呀

 Cherry個陣先醒返

 Cherry:呢...呢條 我唔識做

 當冇事發生過咁繼續溫書

 溫完書

 原來已經9點咁滯

 我哋就去咗食飯

 食完飯就已經10點

 咁作為男仔就梗係要送女仔返屋企啦

 果時係12月

 唔係講笑真係幾凍

 隻手薑晒

 Cherry:你係咪好凍呀

 我:唔係呀 有少少寒咋嘛

 係女仔面前梗係要扮大隻啦

 但係我呃唔到佢

 因為我講嘢嘅時候

 我個嘴係咁係度震

 Cherry笑一笑

 跟住佢捉住咗我隻手

 放咗係佢件褸袋到

 我第一次拖女仔呀

 但係我隻手凍到冇晒知覺

 完全感受唔到 Cherry隻手

 唔緊要啦 

 有得拖已經好好

 我嗰時好想呢段路可以行成世

 但係每樣嘢總會結束

 去到佢屋企樓下都係要放手

 Cherry臨上去之前

 Cherry:你呀 明知凍就著多件衫啦 又唔係大隻

 我:我其實真係好大隻架

 Cherry:實信你啦 如果你大隻 就唔會震晒咁啦 我捉住你隻手嘅時候 我都嚇一跳啊 真係好凍呀

 我:俾個位我落台都好吖 唔好講到咁盡啦

 Cherry:咁阿豪你真係好大隻呀 得唔得呀

 我:好過無啦

 Cherry:好喇 我要上去啦 你返到去同我講啦

 我:知喇 

 

 我決定咗今晚唔洗手

 








我覺得佢鍾意嗰個係你

 
已有 0 人追稿