咩話?

佢....佢頭先講咩話

Cherry眼中嘅眼淚終於流咗落嚟

Cherry再一次同我講

Cherry: 對唔住



我:做咩無啦啦同我講對唔住呀

我盡量表現到好自然

但係其實我個心裏面驚到仆街

呢種咁嘅劇情如果發生係電視劇或者愛情小說裏面嘅話

除咗係講分手之外



我諗唔到其他結果

我求下你唔好

我越諗越驚

慢慢

我隻眼都開始流咗一滴眼淚



Cherry見到之後即刻伸手幫我抹咗啲眼淚

然之後問我

Cherry:做咩喊呀傻豬

聽到傻豬呢兩隻字之後

我隻眼裡面嘅眼淚就開始控制唔到

眼淚開始決堤流落嚟

我:你唔好離開我 我唔想無咗你

Cherry:無人離開你呀



我:咁你做咩講對唔住呀

Cherry稍為笑咗一笑

Cherry:我講對唔住係因為我覺得我好小氣 同埋唔識體諒你 見到你同第二個女仔一齊 就認定你有第二個 連小小解釋嘅機會都唔比你

Cherry:你可唔可以原諒我啊 我會改...

我未等佢講完

我已經忍唔住攬住佢

我:我好掛住你呀



Cherry緊緊咁攬住我然後好溫柔咁摸我個頭

Cherry:我而家咪係度囉

Cherry:咁你可唔可以原諒我啊

我稍為冷靜咗少少

我摸一摸佢塊面

我:梗係可以啦傻妹

然之後我就錫咗埋去

我而家先明白



有好多嘢

無論令你幾失望都好

只要你見到對方真係有因為咁而努力去做補救

去到個個時候

一句對唔住其實已經好有份量

其他所謂嘅承諾已經再唔係啲乜嘢

我終於都氹返Cherry



當我哋一齊離開運動場嘅時候

Cherry突然之間主動拖住我

我望一望佢

Cherry微笑住咁望住我

oh shit 

我嗰一刻真係成個人溶晒

呢種感覺真係無論幾多次都係咁開心

同我行出咗運動場之後

我擰轉頭

望住呢個我嚟過5次嘅運動場

我諗起每一次比賽嘅時候

果種緊張

果種興奮

努力過後嘅果種喜悅

真係唔係就咁可以用文字話俾你哋聽

呢個運動場亦都見證咗我嘅初戀嘅復合

佢見證著我為咗呢一段感情所付出嘅壓力

多謝你

離開運動場嘅時候已經5點幾

由於運動場距離我哋屋企都幾遠下

所以我同Cherry一齊搭巴士返屋企

上咗巴士之後

我哋揀咗坐喺樓上嘅車頭

我讓咗個窗口位俾佢坐

跟住Cherry突然之間開口

Cherry:你有冇耳機啊

咁對於我呢啲聽歌愛好者

耳機呢啲又點可以少呢

我哋每人分左一邊耳機

跟住佢又伸手要攞我部手機



即係有冇得聽周仔

不過是但啦

有得同Cherry一齊

聽咩都冇所謂啦

「別當你要奮勇血戰 

無論聰穎或愚笨

猜猜情尋 雖不如人 

不影響你笑臉迎人

沒有說過你要戰勝 

留下歡樂便無憾

猜猜情尋 猜猜情尋 

玩輸可以勝過別人

多一餐好教訓」

我真係估唔到佢又係播陳奕迅

我唔知大家仲記唔記得

但係我就記得好清楚

上一次我哋一齊搭巴士嘅時候

我仲記得係去緊Ms Chou屋企食飯

跟住佢播咗陳奕迅嘅無條件

跟住而家佢又播猜情尋

我:乜原來你好鍾意陳奕迅架咩

Cherry:係呀 

我:你有幾鍾意佢先

Cherry:嗯...就好似你有幾鍾意周國賢咁啦



咁佢都真係幾鍾意

佢講完之後就挨咗去我個膊頭度

同時我哋亦都十指緊扣

呢種咁嘅感覺

真係好懷念

雖然佢都唔係嬲咗我好耐

但係呢段時間對我來講通過咗幾十年咁上下

所以經過咗今次之後

我同我自己講我會更加珍惜佢
已有 0 人追稿