高富帥轉校生睇中我？！: 出乎意料

「頂！男神啊！」
「真係名不虛傳喎！」
「好q靚仔啊！！！」




插班生一踏入班房，全場女仔喺度起哄。我跟住班饑渴嘅女人望過去: 蓬鬆嘅捲髮瀏海，眼大得嚟又單眼皮，個鼻高挺，嘴唇微厚又夾雜些少性感，驟眼睇落一米八七到啦，外型冇得再完美。我已經想象到，未過今日佢已經會轉到啲妹豬暈陀陀。






不過，通常靚仔都係狗公渣男，靠外型同甜言蜜語食女，我未見過有例外。所以望左佢幾眼我就繼續沉醉喺自己嘅中史世界，好似比一層玻璃球隔住咁，與世隔絕。




「各位同學，今日我地班嚟左位插班生。」屙屎玲講完又轉向個插班生講:「嚟，介紹吓自己。」






佢揹住個雲石灰GREGORY斜揹袋，兩隻手插住褲袋，慢慢行過去屙屎玲個c位，望完左又望右，好似想食晒成個班房咁，然後終於出聲:「大家好，我係由世倫中學轉校嚟嘅插班生，叫歐諾宏。嚟緊呢兩年就請大家多多指教啦。」




歐諾宏？好似熟口熟面咁，喺邊度見過佢呢？應該係我多心姐。
佢一講完，全班喺度拍手歡呼，尤其嗰班已經開始發花痴嘅女仔。大佬，又唔係前世未見過靚仔，好心佢地比啲矜持。






「好啦好啦，大家靜啲先...諾宏你想坐邊個位，最後嗰行有三個空位，你自己揀坐邊。」




我屑左眼自己後面個空位，冇咩擔心嘅感覺，因為其餘嗰兩個空位隔離都坐住我地嘅校花:最左邊嗰行嗰個係陳詩婷，雖然個樣都冇咩特別，但出晒名好身材，37D加大屎忽，同校草拍過幾次拖;中間嗰行最後個空位隔離係楊麗雅，外型係男人嘅理想型，啱啱好米六，眼大大嘴細細，加上唇膏助攻，令佢個嘴更加似櫻桃小嘴，錫落去嘅話感覺應該幾唔錯。呢個插班生而家應該苦惱緊二揀一揀邊個。




插班生望左去陳詩婷嗰邊，又望左去楊麗雅到，最後視線落左喺我後面張枱到。






「我就坐嗰度啦。」




仆街，咁大整蠱？？？




我預計到嚟緊嘅日子，後面會有成班女圍住佢，而我就唔洗指意安靜咁溫書啦…






正當佢諗住行去我後面個位，喺我身邊經過嗰陣，佢屑左我一眼，面色有啲奇怪，於是我望返佢轉頭...




「吳雪晴？！」「吓...你係...歐諾宏？！」








我地兩個嘅緣份，原來一早已經開始。