呢把低沉而響亮嘅聲,令在場所有人都定格左,而陳詩婷同楊麗雅更加係目瞪口呆嘅狀態,頭先的氣勢洶洶突然煙消雲散。



歐諾宏慢慢行到我左邊,用右手由後面搭住我嘅右膊(你幻想吓個情景先),彎低佢一米八八嘅身驅去令自己同一米六四嘅我平排,將佢塊臉烘埋我塊臉側邊,講笑咁講:「我地兩個冇見咁耐姐,咁快反面唔認我啦?曳啦你。」見到歐諾宏對我咁close,其他人仲唔認定我同佢有嘢?!



咩都唔知嘅陳詩婷眼白白睇住自己嘅獵物認左另一個主人,即係嬲爆爆咁行開左,而楊麗雅就面目猙獰咁望住我冷笑。死賤男歐諾宏,佢見唔到我比人圍攻咩?而家仲火上加油?!見佢玩我玩得咁開心,徹底觸發我嘅怒火,我凶惡咁睥住佢,一邊掙脫一邊對住佢鬧:「你放開我!」唔知佢本身係牛,定食錯大力藥,無論我點掙扎,佢隻手都係緊緊咁扣住我嘅右膊,走都走唔到。見到男神攬住個女仔,課室出面聚集越嚟越多嘅花生友,個個都嚟睇場大龍鳳。





「鈴鈴鈴鈴鈴...」又係鐘聲打救左我。陣間係狗屎明嘅通識堂,見到我地嘈又會記綠紙,所以大家都好安分咁返埋位,淨返難堪嘅我同搭住我嘅歐諾宏留左喺原地。歐諾宏終於暫時放過我,望住我笑瞇瞇咁返埋位。



真係好煩。一直相安無事嘅校園生活,就咁比佢打亂左。





通識堂嗰陣,當我抄緊狗屎明寫緊嘅notes,有團紙從後面拋左落我張枱度。我打開佢,見到上面寫:「懵丙,一陣同我食lunch。」我心諗真係抵佢死,新轉嚟未識到friend。
我翻左吓白眼,將舊紙dump返去後面。



我決定左啦,無論佢同我講啲咩,都唔會理佢。



打左放lunch鐘,我二話不說即刻拉住張欣欣離開班房。而陳詩婷同楊麗雅見歐諾宏落單,即係衝去佢個位獻殷勤。「諾宏,今日係你第一日嚟到,不如等我同你介紹吓學校小食部最受歡迎嘅套餐吖?」「如果你厭下面啲嘢食太多味精,可以食我個飯盒㗎!我屋企個大廚係喺一流嘅法國餐廳請返嚟,啲嘢一定好食。」陳詩婷同楊麗雅出名猴急,歐諾宏一定推都推唔到。更何況,歐諾宏呢啲靚仔習慣比女圍,同女仔食吓飯有咩出奇。





我同張欣欣喺小食部買左個魚蛋撈麵套餐,搵左個位坐低。「喂,你快啲同我講你同歐諾偉有咩淵源啦,我忍住唔問好耐啦!!!」一場老友,唔通欣欣講真係有啲對佢唔住。於是我將十年前嘅事一五一十咁講比佢聽...



十年前,當我地仲喺英才小學讀一年級。
嗰陣我同歐諾宏同班,但大家只係學業上嘅競爭對手,有時佢第一,有時我第一,大家爭嚟爭去,就係為左得琴老師嘅獎品。話雖如此,但係大家都唔算熟。



有一日我傷風,成個人失晒魂,好唔精神。諗住去廁所洗個臉,點知一行到入去就見到有個男仔喺度屙尿...好彩有塊板隔住,見唔到重要部位。
「喂歐諾宏!你做咩入女廁屙尿!你好變態吖!」我指住歐諾宏講。
歐諾宏反左吓白眼講:「小姐,你有見過女廁入面有尿兜咩?」





係喎,點解女廁有尿兜?唔通...
我下意識咁望吓周圍嘅環境:淺藍色嘅牆,用木板隔住嘅尿兜...呢度係...男!廁?!
原來係我自己入錯男廁!真係樣衰到喊出嚟,見到歐諾宏kekeke咁喺度笑我,我塊面即刻紅到熱辣辣,一路後退一路難為情咁講:「對唔住...我以為呢度係女廁...」講完即刻忍唔住跑走左。



就係咁,呢件事就成為我嘅笑柄,比歐諾宏笑足一年懵丙,直到佢小學二年級轉校去名校讀書,我就冇再見過佢。



我點都估唔到嗰陣嘅矮仔歐諾宏,大個左竟然會變男神。我亦都估唔到,過左十年嘅我,竟然會中意左佢...