就係咁,我同左個男神出pool。



到左咁上下要返去,歐諾宏幫我揼左啲垃圾,就拖住我隻手行返去。去到人多嘅地方,我揈甩佢隻手講:「呢度人多。」佢冇理我,又拖返起我隻手講:「有咩所謂。」



喺就嚟返到學校嗰條馬路度,有好多人見到我地。「SHIT!男神比人霸左啦!!!」「痴線點解佢啲口味咁奇怪?!嗰個吳雪晴邊忽吸引?!」「嚟左兩個月就食左條女,不愧係男神。」歐諾宏高調咁公開我地呢段先開始左半個鐘嘅戀情,搞到我一時之間都唔知點應對其他人嘅目光,我怯怯哋咁dup低頭,努力無視身邊嘅人群。





我地啱啱行到入學校就打鐘。歐諾宏一直冇放開我隻手,另一隻手插住褲袋,自信滿滿咁樣拖住我行入課室,唔洗我多講,你都會諗到班上面掀起左一番騷動。林展博同胡樂天好似夾過咁一齊講:「你地一齊左?!」歐諾宏望住我,一邊露出幸福嘅微笑一邊講:「係呀。」陳詩婷即刻喺位到彈左起身,隻眼擘到大一大,好shocked又有啲sad咁講:「諾宏......係真㗎?」歐諾宏點左點頭。楊麗雅又對住佢發脾氣:「究竟佢有咩吸引?你唔揀我地,都要揀呢個話都唔講多一句嘅摺人?」



Um…佢有冇諗過我會hurt。歐諾宏聽到有人用言語攻擊我即刻講:「起碼佢內心一定靚過你地。」於是又烘埋嚟我耳邊講:「唔洗理佢地。」佢拖住我返埋位,張欣欣望到我即刻o晒嘴咁講:「雪晴你......比歐諾宏滿到啦?」我都未應,歐諾宏已經喺後面伸左個頭出嚟講:「係呀,佢而家係我女朋友。」張欣欣即刻捉住我隻手揈嚟揈去咁講:「oh my god I'm proud of you !!!」
「Thx my dear!」我細細聲咁笑住同佢講。但係當我屑到坐張欣欣右手邊嘅顧曉峰望住我冷笑,我即刻尷尷尬尬咁望返自己枱面。





放左學,歐諾宏送我返屋企。去到屋企樓下,我同佢講:「我上去啦。」佢緊緊咁樣攬住我講:「好,今晚我打電話比你。」攬夠左,我先依依不捨咁返上樓。



夜晚九點幾我沖完涼出嚟,電話即刻響。
「喂?」
「做緊咩呀?」
「啱啱先沖完涼。」
「Ic。雪晴,我媽咪想請你嚟我屋企食飯,你聽日晏晝得唔得閒?難得到左星期六,我地可以順便去拍吓拖。」


「吓?!我地拍拖一日都未夠就要見家長?!」
「我阿媽聽到我地一齊好開心,盛情難卻喔~」
「咁......好啦。」



然後,我緊張到成晚都瞓唔到。



/



終於到左第二日。歐諾宏嚟我屋企門口接我,望到我着住平時罕見嘅連身裙,眼神好陶醉咁講:「你打扮起上嚟真係好靚!」


「見家長喎,點都要打扮吓。」



佢帶我落到去,行到嚟一架私家車前面,佢嘅司機好有禮貌咁幫我開車門,一邊講:「歡迎小姐。」突然比人嗌小姐有啲不知所措,我講左句多謝就上左車,心諗:歐諾宏嘅家境應該唔差得去邊。嚟到佢間屋,更加證實左我嘅諗法。

佢屋企係一間位置比較偏僻嘅豪宅,全間屋有兩層,一行到去,美侖美煥嘅吊燈映入眼簾,寬敞嘅大廳比人一種舒適嘅感覺,周圍都有好多大大幅嘅畫像,充滿文藝氣息。歐諾宏媽媽着住一身雍容華貴嘅紫色晚裝,熱情行過嚟招呼我:「歡迎你呀雪晴!姨姨想見你好耐啦!多謝你嚟食飯!」我面紅紅又不失禮貌咁答:「姨姨你好,我要多謝你就真。」佢拖住我隻手行去飯廳講:「嚟嚟嚟,快啲食左午飯先,唔好餓親!」



我跟住佢行到飯枱面前,見識到佢地所謂嘅「午飯」:每人一碟高級牛扒,上面有沙律、薯條同薯蓉,喺出面餐廳食應該要幾百蚊嗰啲。雖然我個樣好鎮定,但係我個心充滿驚訝同緊張感。



歐諾宏媽媽叫我地起動,大家一齊攞起把刀鋸吓鋸吓。歐媽媽食左一啖又開左話題:「雪晴,你知唔知我識左你幾耐?」


「一日?」
「唔係,係十年,喺諾宏把口中識到你。」
我目瞪口呆咁望住佢講:「十年?!」
「你唔知咩?呢個死仔包十年前轉左校就一直求我轉返過嚟,因為佢中意左個女仔......」
「媽!」歐諾宏用埋怨、又帶啲撒嬌嘅語氣同佢講。
「哎呀你咪嘈,」佢不耐煩咁stop左歐諾宏,轉過頭又興致勃勃咁同我講:「佢中意左你十年啦!佢今次轉校過嚟都係因為打探到你喺呢度讀書咋嘛!反正我唔擔心佢嘅成績,你呢間學校banding又幾好,我咪放手比佢轉過嚟囉!」



原來佢過嚟嘅原因,係我。



佢足足......中意左我十年。





呢一刻嘅我,既感動,又開心。



我地望住大家,默默咁樣微笑。