《再追一次初戀》: 回憶

回憶篇

「登登！生日快樂！」雖然只是文字，政宸卻聽出了話語中的感情，彷如一個邀功的小孩，很可愛。 

遊戲裏的家園被特意佈置成派對場所，一群網友聚首一堂為自己慶生，很特別的生日，尤其這是第一個嘉昕和自己過的生日，更顯特別。 

「靚唔靚？我整左好耐架！」嘉昕來電。 

「好靚呀，點整架？」 



「嘻嘻，你鍾意就好！生日快樂！」 

「鍾意呀！好少有人咁有心同我慶生！」學校那幾隻，記得自己生日就算不錯了。 

「你有咩生日願望呀？」

「⋯⋯想拍拖？」政宸半是說笑半是認真地答。

「願望講左就唔靈架啦！睇黎你出pool無望啦！」嘉昕調皮地回，而政宸聽到這個回答，難免小失落。 



「啊⋯⋯咁唯有等下一年啦⋯⋯」政宸笑笑帶過，如果對象不是你，就不想拍拖了。 

「啊！仲未送生日禮物比你！」 

「唔係同我搞左個party啦咩？」

「Party係party，禮物係禮物，唔同架！」嘉昕一頓，「送個女朋友比你做生日禮物好唔好？」雖然故作活潑，但聲線裏掩蓋不住嘉昕的緊張感。不過政宸倒沒工夫發現這些細節了。

「下⋯⋯好⋯⋯好啊⋯⋯唔係，你講嘅係咪我諗嘅意思？」 



「仲可以咩意思啊！應承左就無得反悔架啦！」嘉昕語畢便掛了電話，政宸還暈頭轉腦的，有點驚喜，又有點不知所措。而電話的另一端，嘉昕亦沒有電話中鎮定，臉紅紅的，一頭栽進了被窩。