《那天，我遇見一個奇怪女孩》: 第二章
「乜咁化學㗎？」
上一輩經常會說的一句話，雖然毫無邏輯可言，語法又錯誤，但似乎挺實用。
多數用來形容一件物件容易壞掉。
有時候，也會形容人的生活。
「有冇人同你講過你個名真係好搞笑。」智恆翹起二郎腿，態度輕浮地說。
「有呀，咪你囉契弟。」我不爽地說。
「你諗下，又水又木，淨係睇到個名都聞到浸牛屎味。」智恆恥笑道。
「屌你啦！我唔想㗎囉好冇。」
「仲有，梓楠.........」
未等智恆把話說完，我已經把他的嘴巴牢牢地掩住。
午膳的鐘聲響起，即是地理學會的第一次活動亦準備開始。
「喂，地理學會嗰度你去唔去㗎。」臨離開班房時，我再向智恆確認。
結果，智恆的答案合符預期。
「唔去。」
「......」
我在小食部買了一個咖哩炒烏冬和一包蘋果綠茶，便前往三樓的地理室。
其實我並不知道學校設立地理室的意義是什麼，相比起一般課室，就是多幾個地球儀和一堆參考書。
地理室空無一人，我是第一個到達。
我把長枱搬到地理室中央，然後拉上五、六張椅子。
雖然名義上是「學會」，實際人數只有小貓三數隻，但也不意外，有誰會這麼無聊參加這麼乏味的學會。
當初我和智恆也是被老師以操行分偏低的原因，強迫加入學會。
說什麼參加學會能夠提升自己的品格。
簡直是一派胡言。
片刻之後，終於聽到推門的聲音。
「邊個咁準時！哦...！梓楠.......！」一把嬌嗲的女聲在背後傳出。
「停！唔好講埋嗰個字...」我立刻舉起手掌，示意她停止說話。
「針！」
「.........」
這個調皮的女生叫巧渝，今年中六，是地理學會的主席，常常作出一些古靈精怪的舉動。
曾經有一刻，我以為巧渝喜歡我。
但是，後來我發現她對每個男生都是這樣的，才醒覺原來是我自作多情。
「又攞我個名嚟講笑...」我一臉無奈地注視著巧渝。
「嘻嘻，玩下啫！」巧渝伸一伸脷，便拉開椅子坐下來。
「冇見一個暑假，黑實咗喎！」巧渝用力掐了我的手臂一記。
「嘩痛㗎頂你！」我說。
「超。」巧渝噘起嘴，雙手托著臉頰靠在桌子上。
「Miss Fung呢？」我撕開裝著炒烏冬的塑料袋說。
「唔知佢喎！摵時不嬲都遲到㗎啦！」巧渝輕撥秀髮道。
數分鐘後，其餘二人也到齊，只剩Miss Fung還未出現。
學會的成員只有巧渝、我、智恆，以及兩個中四的毒撚。
終於，在我差不多把整個炒烏冬吞掉之際，Miss Fung終於出現。
「哎sorry sorry，遲咗。」Miss Fung拿著卡其色的飯盒，輕描淡寫地步入地理室。
「咁遲㗎你！我哋等咗好耐喇！」巧渝斜視著Miss Fung說。
此時，一個身材瘦削的女生，正默默跟在Miss Fung的背後。
「咦...？呢位係？」巧渝好奇地問。
「哦，佢係我琴日搵嘅新成員。」Miss Fung淡然地坐下，動作純熟地打開飯盒說。
這女生......怎麼似曾相識。
我眉頭緊皺，仔細地注視著她，而她也一臉茫然地看著我。
「喂！你做咩眼甘甘咁望住人？係咪見人靚女就色心起呀？我呷醋㗎～」巧渝故裝生氣地說。
「唔係呀.....佢......」
「.............」
喔！我記起了！是昨日那個衝出馬路的女生！怪不得這麼熟悉！
「嗯？你咪係...！」她略為驚訝，然後微微張開口看著我。
巧渝一臉迷惘地往我和那女孩身上打量，彷彿不知道發生什麼事。
「你哋識㗎？」巧渝愕然地問。
「呃...其實唔算叫做識嘅...」我搔搔耳朵，尷尷尬尬地說。
那女孩淺淺一笑，便拉開椅子坐下。
「你哋應該識佢㗎啦。」Miss Fung看了那兩個中四的毒撚一眼。
「士...egg...識..！」不愧是毒撚，可以把一個字可以分成幾截來讀。
「不過呀渝同呀楠應該唔識你，你介紹下自己。」Miss Fung揚手道。
她點點頭，便禮貌地自我介紹起來。
「我叫羅雪遙，今年中四，係Miss Fung推薦我入嚟呢度...多多指教。」她微笑道。
羅雪遙......就是昨晚那個奇怪的女生。
「Hello！歡迎你呀！我叫巧渝！係地理學會嘅主席！身高一米六二，至於上圍呢就係三十...」巧渝面露笑容，熱情似火地抓住雪遙的雙手連珠發砲。
「喂...唔好嚇親人啦你...」我拍拍巧渝。
「車......而家有個靚女嚟咗就唔要我啦！你個負心漢...」巧渝扮作流淚的說。
「......」我表示無語。
「唔洗擔心，我同咗雪遙講，地理學會啲人全部都怪怪哋，叫佢有心理準備。」Miss Fung大安旨意地吃著飯說。
「嗯！我有心理準備嘅！你哋唔洗就住我！」雪遙輕輕一笑。
於是，地理學會的第一次聚會正式開始。
由於剛剛放完暑假，大家的話題也是圍繞著假期有什麼娛樂節目。
「我哋睇..睇..睇動漫同埋打...打...打機。」兩名毒撚異口同聲地說。
「我都係咁上下，間中踢下波跑下步。」我攤攤手道。
「好無聊啫你哋！我暑假嗰陣去咗東京shopping，買咗好多護膚品！」巧渝興奮地說。
「仲去旅行？唔洗溫書㗎你...出年就考dse喇喎。」我無奈地說。
「哎吔！唔係成個暑假都喺日本㗎嘛！你個死蠢！」巧渝扭著我的耳朵說。
「痛痛痛痛....！」
「噗，你哋關係好好咁。」此時，雪遙在一旁微笑起來。
「唔..唔係...假象嚟。」我一臉嫌棄地甩開巧渝的手。
「平時呀楠唔係咁㗎，今日見有個靚女喺度先扮同我唔熟！」巧渝立刻說。
「呼！其實我都好想去日本。」雪遙嘆一口氣道。
果然，女生都偏好去日本韓國這些地方旅遊，除了景色優美，可以盡情打卡，還有大量商店街，讓她們瘋狂購物。
「我哋可以一齊去喎！」巧渝激動地抓住雪遙的手說。
此時，雪遙露出少許為難的表情。
「嗯...應該可以嘅...」
「咁約定你㗎喇！」巧渝似乎沒注意到雪遙臉上那個不情願的表情。
如果要跟巧渝旅行，一定什麼自由都沒有，而且她掌控話語權，同行的人肯定沒趣得很。
「人哋都未必想同你去啦...」我快速的看了雪遙一眼，又看著巧渝。
巧渝鬆開雪遙，然後又使勁戳著我的臉。
「哦...定係你想同人哋去呀...」巧渝擺出一副不滿意的表情。
「...............」
我留意到那兩個中四毒撚，不太敢直視雪遙，我便跟其中一個發起悄悄話。
「做咩你哋咁嘅樣？」我輕聲道。
他害羞地瞄了雪遙一眼，又湊到我耳邊。
「雪..雪遙喺...喺我哋form..好受..歡迎..」
「佢係..係..係中...四...女...女.....」
行了，明白，女神是吧。
我把目光放在雪遙身上，她不單是臉蛋好看，而且身材也不錯。
受人歡迎也十分正常。
怎麼以前我就沒發現低form有這麼一個漂亮的女生存在？
哎，不過一級有整整百多人，怎可能每個人都認得。
「呀係呢，點解..你會想入地理學會嘅？」我嘗試跟雪遙對話。
「嗯....我對大自然都幾有興趣...特別係睇自然現象。」雪遙若有所思地說。
「自然現象...？」
是不是火山爆發那些？
竟然有這些愛好，真是看不出。
「叮噹叮噹...叮噹叮噹...」
不經不覺，上課的鐘聲已經響起。
「咁今日係咁先，我會再約你哋。」Miss Fung示意可以解散。
我見雪遙打算獨自離開，便準備上前詢問能否一起走。
誰知，巧渝這個搗蛋鬼拉住了我。
「喔？咁快想出手嗱...呵呵。」巧渝奸笑數聲，然後把我抓緊。
「喂你...！阻q住曬！」回過神來，雪遙已經消失不見。
「呵呵！成功！拜拜！」巧渝對我施展詭計後，也一蹦一跳地離開。
「你老味.......」
地理室只剩下我和Miss Fung，當我也準備離開時，Miss Fung忽然把我喊停。
「楠，你睇住雪遙啦。」
「點解咁講？你驚巧渝嚇親佢？」
「唔係呢個問題，不過遲啲再講，我要趕住上堂。」說罷Miss Fung也離開了。