返小兩日多一皮,諗起都爽呀~

呢句話硬生生將我由從前悲痛嘅回憶扯返出嚟。

不過呢啲嘢我成日都諗架啦,一唔開心就會諗,改唔到。

好平常架姐。

話說好似真係有得諗喎。



「我拒絕。」

自打嘴巴?

冇錯,的而且確係好吸引,但可惜,我一定會令到利潤最大化,如果唔係我讀econ係為咗乜嘢?我又對唔對得住萬食屋嘅各位啊?要走都一定要風風光光咁走!(完美9up)

既然你而家係求我嘅話,我梗係要壓榨下你。

「咁都唔得,你究竟想點呀大佬。」佢已經開始灰灰地。



「五日加二萬,deal?」

「痴線放你五日假仲要加多兩萬,你會唔會有啲獅子開大口呢?」

冇錯,我自己都覺得自己有啲過份,簡直係唔講道理。

「咁阿,唔撈囉,犧牲小小都唔得,第時點做大事啊?允 小 姐。」

佢嬲爆爆咁啤住我,我就做出一個你唔gur咪打我囉嘅表情。



講真佢越嬲我就覺得越過癮。 

白熱化階段!

「三日一萬,死線啦已經,冇得再改!」

「咁我唔撈啦,你搵第二個啦。」你一定中可以推高啲嘅允天月。

我不禁面露一笑,就好似一只老狐狸咁。

「好啊,我搵第二個囉。」

碌柒,今鋪玩大咗,冇諗過佢真係會放棄。

點收科呀大佬,我錯啦唔好唔請我啦。



我已經放棄咗做男人嘅尊嚴,為咗還債,我已經準備好投身於軟飯產業。

你以為我會咁講?

梗係冇可能,咁樣我仲邊有身為男人嘅尊嚴呢?(啱啱先講完0尊。。。)

「反正只要我唔做,你都唔會搵到人架啦,要頂你哩啲大小姐脾氣,難啲囉~」我試圖打擊佢,令到佢回心轉意。

「本小姐都唔稀罕你啦,要搵過有幾難姐。」佢仲好驕傲咁講,認真犀利。

死啦越講越激,應間真係無咗呢份工,我就真係變罪人架啦,害到我阿媽要繼續過勞嘅兇手。。。唔好啦

「你連返屋企都成問題,又住咁遠,人又串又唔係靚(其實幾靚),對住你一個月都未必頂得順啦,除咗我嚟啲一心想打工,做完半年就撇嘅人會有興趣以外,無人肯架,信唔信由你,我唔再作補充啦。」其實應該好多人都想先啱,今鋪真係吹大晒。「你自己諗清楚啦。」反正都係啦,補多句啦,承接返個氣勢。



用激將法​刁難佢,對住啲老謀深算嘅屎忽鬼或者無用,但係。。。

呢位係堂堂無知嘅大小姐,應該可以嘅。

我打心理戰都算係有一手架,職場求生技巧之一。

阿月陷入咗沉思狀態,有一線生機了!

「我...我做好人比多次機會你,四日一萬得唔得?」

「Deal!」見好就收了,到時候出事就後悔都嚟唔切。

講真,嚇到我仆街,差啲就錯失百年一次嘅良機。

「唉...」我意味深長地嘆了一口氣,但已經唔再關有驚無險事,而係因為屋企終於可以擺脫困境,我狠咗呢日好耐,好耐。



由老豆走個一刻起...

「下一站,金鐘...」原來坐坐下就已經到站,而我,係呢場拉鋸戰當中,大獲全勝。

「落車啦阿月。」我向坐係旁邊嘅佢望一望。

「哦~」

其實望真啲,佢都唔係咁差姐,嬌俏嘅面孔,亭亭玉立,加埋168到嘅高挑身形,撇除性格唔講,可以用美若天仙嚟形容。

「望咩呀望,再唔落車閂門啦,快手啦。」

「得啦驚死返唔到去咩,行啦。」



一時望耐咗,搞到自己成個變態佬咁,好彩佢睇唔出我係度做乜。

而家諗返其實我會吾會太衝動呢?(我成日轉軚,因為好唔相信自己嘅決定,驚自己會後悔,傷害到其他人,算係我其中一個壞習慣)

咁樣就好似浪費咗一個少女嘅青春咁,尤其係呢啲大把前途嘅人,中學生涯,正常都係談啲轟轟烈烈嘅愛情先係,佢都有本錢咁做,但而家咁樣做戲,無論幾時都唔應該出現先係。

諗返起我嘅前度,我比唔到幸福佢,係我嘅錯。

我其實一直都好後悔當時咁口不對心咁飛咗佢,明明係全心全意,我就因為自卑,覺得自己窮,配唔起,先會做出呢個咁傻嘅決定...

偏偏我就咁絕話自己鍾意咗第二個...渣男嘅行為

吾知你而家過成點呢...

「阿月。」我停步。

「咩事呀。」佢都跟住我停咗落嚟。

「我覺得其實咁樣做戲真係吾係咁好,我就冇乜所謂,但你唔同,你吾係應該趁呢段時間搵一個你真係愛嘅人咩。你唔應該浪費時間係我身上先係架,咁樣練習嚟都係冇意思,因為我哋嘅所謂拍拖只係唔帶任何感情嘅戲,而唔係互相依靠,付出所有真心嘅果種愛。」我一次過講晒我所有嘅疑慮出嚟。「我頭先咁草率就應承咗你係我嘅錯失,我希望你唔會介意我喺呢一刻反口。」

我面無表情咁講晒以上嘅說話。

佢無回應到我,而係繼續向著出口繼續行。

「你咁樣係咩意思?」我追上去問佢。

「五日試用期,聽日開始,我唔批准你反口,我生平最憎人言過其實,希望你諗清諗楚。」吾知佢口頭禪係咪我生平乜乜乜呢?今日已經聽咗三次呢句嘢。

咁固執架咩...

「但係...」

「唔好但係啦,我話係咁就咁啦,行啦!」

啲有錢人都系咁有性格嘅,十一萬買個假嘅男朋友一個月,仲要放四日有薪假。

五日之後先算啦,到時再推都唔差嘅,最多咪得罪佢架啫。

而家當識咗個新朋友先啦,相處落暫時都無乜嘢嘅。

我重拾返本身落嘅心情,對住佢大嗌:「你識路咩,咪行咁快啦,蕩失路我笑你㗎。」

「賭呀!我識你請我食飯!」

我銀包得番一百蚊咋小姐,不過你放心,我一定唔會輸。

行咗成個圈,佢都係搵吾到去巴士站條路。

「我認輸啦,你快啲帶我去巴士站啦,我仲要練琴呀。」佢用誠懇嘅語氣同我講。

太快放棄了吧⋯⋯

明明就係你自己話要自己搵,你遲到唔關我事喎,反而仲阻住我返屋企休息添。

「你而家差我一餐飯,我記住架啦。」我用帶有恥笑嘅口吻講。

遠在天邊,近在眼前,一轉右其實就到,我再好串咁望一望佢。

佢繼續啤著我,好似好唔忿氣咁,鬼叫你自己咁唔爭氣咩。

佢搵咁耐都搵唔到,講真哩個路痴應該係教唔翻嫁啦。

「係呢架啦,今次我同你一齊搭,但下次吾該認住呢架6號巴士,下次你再無帶錢就靠佢架啦。」

「吾洗啦,到時候再靠你咪得囉哈哈,估唔到你都幾靠得住架喎。」佢若無其事咁講。

其實開google大大應該係人都識先至係合理。

同埋允小姐,小弟我住沙田區架,我唔想日日都因為你搞到咁遲先返到屋企呀大佬...

當然我無講出口,費事又鬧交,我只係輕輕地搖頭,表達我嘅不滿。

「上車啦仲揼,送完你我仲要返屋企架,八點幾喇。」

嘟!嘟!

仆街!

搭巴士唔可以用綠卡,但啱啱張學生卡吾記得增值,有錢入去無錢出返嚟,玩完。

「阿月呀...借十蚊嚟得唔得呀...我八達通負錢呀。」


















 
已有 0 人追稿