那一天我成為了練習男友: 【VIII】解惑

（呢章有少少短，吾好意思呀～因為今日訓耐咗～）

「好攰，返學係一種折磨啊......」

好唔容易俾一大班人撚咗成日，終於有得唞吓氣。

除咗俾人煩同記名之外，仲有Miss Chung嘅加持，成功陰到我抄咗五次《師說》，搞到我今日極燥。

「你放學之後有啲咩做呀？」阿月問。



「今日要返工呀，順便去攞返架單車。」

「所以你今日陪唔到我？」佢皺曬眉頭望住我。

我而家先意識到，練習男友呢份工，原來真係吾係講笑。

「係呀，但之後兩日都吾洗返，我改左間表，所以聽日先得咋。」

「車，好巴閉咩，聽日咪聽日攞，走先啦拜拜！」



「拜拜......」又嬲？女人呢種生物真係好難捉摸呀，好似我做咩都唔滿意嘅。

可能我真係太耐無認真同女仔相處過？

「各位好呀。」行到入萬食屋嘅我同大家打咗聲招呼。

「希神你咁早嘅。」係阿政。

「你仲早過我啦，係度搞緊啲乜？」



「我平時都係會早啲返嚟執下啲要用嘅貨架啦，係你吾知姐，呢單嘢不嬲都係我負責嘅。」

「我以為你淨係識吞樸加添。」呢啲挖苦嘅說話係我同佢獨有嘅相處方式。

「如果吾做呢啲麻煩嘢平時又邊有得咁蛇呀。」佢望一望我，然後問；「搞咩呀，有嘢煩緊？」

睇嚟我嘅憂愁真係已經寫咗係塊面到......

「我......搵到份新工，可能會辭職。」阿政係呢度所有人入面第一個知嘅。

「咁吾係幾好咩，人生係要多啲嘗試先啱架嘛，辭職又唔代表啲咩嘅。」

「吾係話吾好，但工作嘅內容相當奇怪，一時三刻都唔知點同你講好。」唔通同你講我去咗有錢女嘅練習男友咩。

「其實工作，好多時都係睇幾樣野家姐，吾係錢，就係舒適度架啦。最重要都係你嘅意願，同埋你當刻需要啲乜嘢。我大概都知你身處咩處境嘅。講真呢度未必滿足到你需求，不妨認真考慮下好條件啲嘅工作。」阿政冇乜過多嘅私人感情，反而好客觀咁講出佢自己嘅意見。



「你講嘅我都明，但係度都做咗咁耐，有啲吾捨得啫。」諗返大家一齊相處嘅個段日子，係我為數不多感覺都溫暖嘅時候。

「傻仔嚟嘅，吾係到做又吾代表啲乜嘢嘅，你幾時想返嚟，大家都會無任歡迎，有吾係永遠離開，有咩好唔捨得呀。」

「多謝你，阿政。」

果然講出嚟係會舒服啲嘅。

未幾，我就開始收拾心情，投入返落工作度。

畢竟已經冇乜時間了......

今日感覺時間過得特別快，吾知係咪因為太過投入其中，完全忘記咗係學校攰嘅感覺。



「店長，陣間方吾方便傾兩句？」我覺得都係時候要通知店長。

「可以啊，等你執埋啲手尾再講啦。」店長溫柔嘅聲線更令我充滿力量去做埋剩餘嘅工作!

其實都唔係啲咩特別嘢，只係要將啲垃圾掉去後門啫。

我打開後門，自己搞咗句低級gag：「小夫，我要入嚟喇¬」

......

sorry，我知吾好笑。

我閂咗門，背脊挨咗係門後，然後透咗一啖大氣，頓時感覺到疲倦感正係度侵襲緊我嘅身軀，睇嚟今日真係好畀力去做先會攰到咁。

晚風一直輕輕地觸踫我嘅身體，令我感覺好放鬆，真係好想永遠停留係呢個時間段，呢種無憂無慮嘅感覺真好...



「都唞夠啦，係時候入返去啦。」我自言自語道。

「碰！」

有一粒石仔擊中左我身後嘅門。

「吾好意思，無我批准唔走得。」

有條友坐咗係對面嘅石級上面，懶係型咁款，但實質係好撚柒，不過佢本人知吾知就係另外一回事了。

話說吾會係追數佬搵到嚟呢度掛......

「請問......我哋係唔係識嘅？」唯有希望冇事發生啦，首先實行一個扮熟戰術。



「你竟然唔識得本少爺！果然冇睇錯你，你係一個垃圾！」呢位神秘人個腦應該都係有少少問題架啦，懷疑係白卡仔。

阿......吾知我張綠卡佢啱吾啱洗呢？