「我唔得啦...」我摸一摸自己個肚,食都脹晒。

可以肯定今日係食譚仔最飽嘅一日,我未試過可以一餐入面食咁多小食,實在係太幸福了。

簡直就係奢侈體驗卡!

「不如我哋今日走堂去玩啦,好冇呀希神?」

「唔建議咁壞,同埋咁樣咪好明顯囉,我哋一齊唔返去好令人懷疑架喎。」我繼續講:「你父母唔會鬧你咩?」



「佢…佢成日都唔得閒架啦理得佢哋咩,你唔係諗住做乖乖仔掛,請假咪得囉。」

諗諗下,反正等陣又有中文堂,好似走堂抵玩啲喎。

「半日假唔洗家長簽名架。」阿月仲要補飛。

「屌,咁仲諗咩,行啦。」可以逃避大肥婆嘅機會,我又點會咁易放過!

「咁我哋應該去邊?」我問。



「不如我哋去睇戲啦,最近好似幾多嘢睇,你有冇咩想睇。」

我都好耐冇睇戲,通常都係得閒係屋企睇下網上面啲老番或者做netflix寄生族算,慳唔少錢。

「我冇乜所謂阿,我諗咗食咩啦,今次你揀啦。」

佢諗咗一陣,最後決定睇愛情片,幻愛。

呢套我都有些少興趣,始終係為數不多嘅港產片,演員都唔係一向用開嘅個啲人,自然新鮮感大增。



我哋搭巴士去到沙田嘅戲院,至於點解係搭巴士呢,其實係我想呢位大小姐唔好過多依賴uber同的士,希望幫佢係路痴嘅路途上拯救佢。

今次我都入定錢落張學生八達通到,以免又犯下相同嘅錯誤。

「有uber唔搭搭巴士你係咩傻架?」

「你再唔醫好你嘅路痴症狀我九成會辭職,你就乖乖地學下啦。」

「收皮啦,你話辭職就辭職呀,我未up頭你都唔使旨意呀!」

我都無咩好講...

「我唔中意女仔咁粗魯,尤其係你呢啲咁甜嘅女仔~」

「我唔會中你計嘅,口花花咁,你平時都唔係敢講嘢架。」



「我不嬲冇否認你嘅樣貌,我只係否認你咁無理取鬧交嘅性格咋麻。」

「我係咁架啦,你唔係第一日識我㗎!」

「我識咗你三日囉,的確唔係第一日嘅。」

「得啦唔同你講廢話啦,你成日都恰我嘅...快啲行啦就嚟夠鐘啦。」

明明我先係受你氣個個...

由於今日係平日,所以都唔係話好多人會嚟睇戲,十隻手指都數得晒,仲要全部都係情侶嚟,跟顯得我哋有幾格格不入。

至於錢邊個比呢啲問題就唔使多講啦,就算我有錢都係唔會比,因為走堂係佢嘅主意,咁佢比都好合情合理姐。



「肥婆你買咁大捅爆谷做乜阿,啱啱先食飽咋喎。」

「本小姐有幾個胃,唔使你嚟評理,同埋我唔係肥婆阿!」

佢一仗打落我隻手度,搞到我飛咗幾粒爆谷落地。

「咪玩啦成地都係啦!」真係小氣......

我兩手捧住個大爆谷,幾經辛苦終於去到我哋嘅座位。

中間偏後嘅位,靚晒。

我將本身手上嘅爆谷物歸原主,然後靜待電影嘅開始。

除咗我哋,仲有兩對情侶入場睇,一對坐最後個行,一對就坐我地嘅前兩行。



平日睇真係舒服好多嘅。

我再望一望阿月,見到個非常恐怖嘅景象...

套戲都未開始,佢已經食咗差唔多一半嘅爆谷,好得人驚。

睇完啲廣告,終於開始播。

頭半個鐘都係講緊男主角嘅幻愛嘅過程...(不劇透,有興趣自己睇啦,本人認為幻愛非常值得一睇👍🏽)

但我哋再睇多陣之後就冇點再專心去睇呢套戲,因為有啲意外發生咗...

「希神,前面個兩個人做咩係度郁嚟郁去嘅,有啲騷擾我睇戲喎?」阿月突然之間問我。



我探頭一望,見到個女仔坐咗上個男仔到,仲聽到啲好隱約嘅呻吟聲...

講真我都唔知點比反應好,聽就話聽得多姐,但見就真係第一次見。

「佢哋係度做愛做的事...」

「即係點呀?」阿月有啲唔耐煩咁問。

「即係扑嘢阿,你唔好理呢啲嘢啦,比佢哋知道我哋知嘅話會好尷尬架,專心睇戲啦。」

阿月先係愕然,然後有啲面紅咁講:「知道。」

霎時間我哋嘅氣氛都有些少尷尬,因為好難唔去在意呢件事。

有時候去到啲停頓嘅位會聽到前面嘅聲。

「呀~」

我望住阿月,佢又望返我,加埋前面嘅聲音,真係好難頂。

「好難唔去望喎...」阿月係我耳邊細細聲敢講。

「我都覺...」

我哋留意咗好耐好耐,去到套戲差唔多完佢哋先停止。

睇完之後我哋乜都無理直接衝咗出去,因為實在唔敢再去回想啱啱所經歷嘅嘢。

都無望過前面對情侶一眼,始終成件事實在係太難以置信...

「我未試過睇戲睇到咁辛苦架,搞到我都無認真睇場戲!」阿月申訴佢嘅不忿。

我只係默默地點頭,無多講啲咩。

「唔好再諗佢哋啦,我地而家應該做咩好啊你覺得?」

「行下街囉,都冇乜嘢做架啦。」我提議。

「好呀。」

我地收拾好啱啱嘅心情,繼續我哋今日嘅走堂旅程。

我地行咗去GU睇衫,佢隨手就攞咗幾件去試。

唔係我誇張,但佢真係同個衣架無分別,著邊套都好睇,確實養眼。

佢都攞咗幾件比我試。

雖然我話屋企好多u嘅衫唔使試,等佢死都話歧視u記所以要我著下GU咁話喎,最終都係妥協。

「你著呢兩件幾好睇阿,我送比你啦。」

「又送?我假假哋都算係練習男友阿,我唔係軟飯王喎。」

「得啦,我話係咁就係咁啦,到時候你出糧果陣先報答返我啦,你以後仲要同我出街架麻跟係要著得好好睇睇架啦。」

「你話啦老細...」

「叫我阿月。」佢以一個恐怖嘅微笑望住我。

「知道啦...阿月。」

買完衫之後,我哋仲陸陸續續行咗唔同嘅鋪頭,阿月亦不斷買買買,拎到我就嚟手軟。

「你每次出嚟都係咁樣買嘢架?」我對此有啲疑惑。

「八成係啦。」

有錢就是任性。

「又有啲想食甜品添,不如去食甜品啦。」阿月提議。

「真係冇你府。」我冷笑道。

我哋係附近嘅一間甜品舖坐低,我呆呆地望住個餐牌。

四十蚊一個朱古力心太軟加軟雪糕,甜品來講的確唔係話特別貴,但我覺得甜品真係史上最呃錢嘅食物,因為四十蚊已經夠我食一個lunch了。

不過因為真係太耐無食我最愛嘅朱古力類甜品,最後我都係唔爭氣咁又要阿月請我。

我就好介懷嘅,但佢似乎唔當係咩一回事。

可能大家會覺得我好鄉下仔feel,但現實就係咁,我連食個甜品嘅閒錢都冇,除咗有時甜筒特價嘅話或者會買幾支返屋企。

至於阿月就叫咗個芒果西米露,經典配搭。

「今日都幾開心呀,估唔到你咁識同女仔相處喎。」

「我識溝女又同你講咩?」我以輕佻嘅語氣搭佢。

「車,唔好以為口花花咁就係識啦,讚下你就曉飛咁~」

「對唔住囉允大人~小弟會再改善下架啦。」

「你知就好啦。」

我哋講完之後都係度笑,其實同阿月相處唔係一件難事嚟嘅,錯就錯在我哋嘅關係太過扭曲,今日嘅互動其實更加似好朋友多啲。

乜撚嘢練習男友,除咗我同佢之外,仲會有邊個接受呢啲咁荒謬嘅解釋呀。

不過我唔係啲不可一世嘅壞員工,既然都已經洗濕咗個頭,我就會繼續奉陪落去,為咗我阿媽,都係為咗可以快啲令到阿月成為佢自己心目中嘅合格女友,呢一刻我已經下定決心,唔再瞇茫,既然要做,就做到底。

我會信守承諾,亦唔會僭越,咁樣對大家都好,絕對唔可以動真情。

「阿月,我送你返去啦。」食完個甜度十足嘅甜品之後,成個人都精神啲。

「阿,唔記得同你講添,我搬咗屋啦,就係你屋企附近。」

「唔係真事掛?」
已有 0 人追稿