遇到了: 6

6.旅行日-2


進到海洋公園內的阿欣明顯變得興奮，令我禁不住發問。

「其實學校年年都係嚟依到，點解你仲好似咁開心？唔會覺得悶㗎咩？」

「有啲啲㗎，不過今年有啲唔同，所以我特別開心。」

「唔同？有咩唔同？你唔會好似阿豪咁因爲有得睇人著便服所以就開心咁容易滿足？」





「緊係唔會咁簡單啦，不過點解我就唔會同你講，等你估下先啦。」

在我們兩人邊走邊說中，阿豪和阿怡漸漸墮後了數個身位，當然這是我有意為之，同時我也確實對眼前這認識不夠十分鐘的女生有興趣，在不經意間想了解她更多。

「我地去邊到先好呀？」阿怡追上我們率先提出。

本就沒有興趣的我自然不會發表意見，阿豪只要是跟著阿怡就可以，也不會有甚麼主意，於是三人的目光就落在阿欣身上。

「嗯...咁不如上去玩左機動遊戲先，下午先再周圍行下？」她又一次未得到我們的回答就走向海洋列車的隊伍，說可以更快上山，以省下排隊的時間。





列車一到站後，映入眼簾的就是那我逃避了兩年的翻天覆地，其實我不喜歡來海洋公園的其中一個，亦是最重要的原因就是我討厭機動遊戲。當我一回神時發現阿欣已拉住我的手走去等候的隊伍中。

「喂，等陣先，你唔係諗住玩翻天覆地呀？」

「係呀！有咩問題？」

「你地都想玩咩？」我用求救的語氣向身後阿豪兩人提出。與阿豪來了兩年，他自然知道我不會坐到這個能要我命的機器上。

「其實呢，不如...」阿豪嘗試阻止阿欣的熱情。





「我都想玩呀，之前得我同阿欣兩個人，搞到唔敢上去玩，今次有埋你兩個陪我地就唔會咁驚啦！」阿怡說出了我最不想聽到的一句。

「...不如我地快啲去排隊啦。」阿豪果斷地出賣了我。我用口形問候著阿豪時隊伍已不知不覺間輪至我們。

我吞了吞口水，看著他們三人快速選好了位置，我就知道沒有挽回的餘地。我嘆了口氣，理解到歷史書上提到古人行上刑場的感覺。

我慢步走去坐位時用幽怨的眼神盯住阿豪。

「唔洗咁驚喎，好快就完㗎啦，合埋眼一陣就無事。」阿豪無用地安慰我。

於是我們四人以我、阿欣、阿怡、阿豪這樣的排序坐在機器上。

「你真係好驚喎，你額頭都滴緊汗。」在我旁邊的阿欣取笑我。





「邊到有呀，你唔好再笑我啦，搞到我仲驚呀。」我舉手擦一擦額上的汗珠，同時感到機械發動的震動。

「如果你係因為望到啲景物所以驚嘅話，你可以擰過黎望住......」阿欣說到後面時，我已經聽不到其他聲音，只剩下玩家們的尖叫聲。

當我有意識時發現自己已經離開了翻天覆地，雙腳被動地朝著海洋公園中最高的東西走去。

「去...去緊邊呀？」

「嗯？跳樓機囉，機動遊戲依啲野唔可以停㗎，一口氣玩曬去啦！」阿欣興奮地回答我，同時看穿我想逃跑的意圖，一手捉住了我。

就這樣子，我在半推半就下與他們三人把園區內最刺激的機動遊戲都玩過一遍。

「其實都唔係咁得人驚啫？前幾次都唔覺海洋公園咁多野玩，肯定係之前同你條友淨係睇熊貓，乜都唔敢玩所以先覺得悶。等我地仲成日屌年年都要黎海洋公園。」阿豪在女廁門外等候她們時對我說。

「屌你啦，明明係因為有阿怡你先覺得好玩，明明之前你咪又係同我差唔多，最多咪玩下海盗船。」我反駁阿豪打算把學校的錯誤推到我身上的說法。





「咁又唔好淨係話我一個啦，我見到你同阿欣行得好埋喎，係咪咁快就有野啦？係喎！你地中一好似同班，係咪靜靜雞鍾意左人唔出聲，古惑啦你！我都唔講。」

「痴撚線，中一都同佢計都無傾過。今日先係第一次同佢玩，邊有可能鍾意人。」

「屌，咁講即係玩多幾次就會鍾意人啦。」

「喂，行得啦！」阿怡兩人從廁所中出來對我們喊到。

「頭先傾緊咩？傾到叫左幾下都唔應。」阿欣走到我身邊問。

「無野，講下啲無聊野啫。」我那裡敢說我們正在談論你們，而且是不能讓她知道的話題。

玩了大半天的我們決定去填飽肚子，基於海洋公園內餐廳那不是一般學生捨得花費的價錢，我和阿豪提出以麥當勞來解決一餐。





在當時已經出現了肯陪你食麥當勞的女生一定是好女生的說法，只是想不到她們兩人也沒有反對，可能對中學生來說並不會太在意食些甚麼。於是我們隨便點餐後，就在一面咒罵那比搶劫還好賺的價錢，一面把手中的豬柳強塞到口中。