遇到了: 17

17 轉校生

開學的日子總是不好過，久違的早起，繁多的功課，沉悶的課堂等等都足以令學生叫苦連天。雖然如此，我還是要拖著身軀出門。

「早晨...」校長又開始在早會中發表每年一樣的道理，總是離不開提醒學生要努力學習，要和同學好好相處。正當我打著瞌睡時剛好有人拍拍我膊頭，我轉頭看過去發現是阿豪，他用手指指著別班的隊伍，示意我望向排在前段的其中一人。

「見唔見到嗰條女呀？好靚女喎，之前都未見過佢應該係插班生黎。唉，點解啲靚女永遠唔係我地班。」阿豪嘆著氣對我說。

那女生正背向著我，我雖不能看到她的面貌，但我清楚知道她是誰。





「係咩，咁阿怡係咪都唔靚女呀？」我微笑著反問他。

「屌，佢唔計啦，算數唔講，訓導條撚樣行緊過黎。」阿豪一下子選擇放棄話題，然後我們在捱過了校長的長篇大論後才得以回到班房。

開學的第一天總是不用上課，做的不外乎是選班長，派下一些通告等等，我也只能在補眠中等待小息來到，可以走到隔離找阿欣見見她，畢竟也整整兩個月未見面。

期待的鐘聲響起，當我走到A班時一下子就找到阿欣所在，我拿著剛剛從小食部買來的魚蛋遞到她面前。

「做咩咁好死請我食野？」她抬起頭望望我。





「知你鍾意食野嘛。」我隨手拉過張椅子坐下。

「係喎，你知唔知我地班黎左個兩個插班生，個女仔係之前係你樓下茶餐廳嗰個。」她指指在班上一角，正被數個男生圍住的晞月。

「你又話有兩個嘅？仲有個呢？」我看看晞月那一副煩厭的面暗自發笑，同時問阿欣。

阿欣先指尖放到唇邊，示意我不要作聲，再指著她旁邊的座位。

座位上的是個男生，但他卻伏在桌上睡了，使我不能看到他的面，不然我早就能認出他的新面孔。





「你唔講我都唔覺佢係到......」

「佢一早就瞓左覺，搞到我都唔覺多左個同學咁。」阿欣邊食著魚蛋邊回答我。

「第一日轉入黎就瞓足成朝都有嘅。」

「你好意思話人咩，你啱啱會無瞓到？」她帶著望穿一切的笑容問我。

「哈哈，唔好講依啲野，就夠鐘上堂，我走先啦，放學見。」果然阿欣很了解我，即使不在同課室中也能猜得中。

我走出班房後正打算上個廁所才回去班房，卻突然發現身邊靜悄悄地多了一個人。

「點解你學校啲人咁煩，都唔知圍住我問長問短做咩。」晞月一臉怨氣地對我說。

「乜你唔係比人包圍緊咩？佢地見你係女先多人理啫，你見唔到另外個插班生無人理佢咩。」我回答她後也忍不住笑了笑。





「我可唔可以理解做你讚緊我？」

「痴撚線，我邊到有咁講過......」

「話時話你溝到條女未？咁耐之前已經見你溝緊人，點解到左今日仲未得架。」

「你咪理我啦，你搞掂你入面班狗公先啦。」

「洗唔洗幫下你呀？依家我同佢同班喎。」

我也不知道怎樣回答晞月，只好留下個白眼給她，加快腳步走進男廁中。

當我離開走回班房的路上經過A班時，我探頭去內望入。只見阿欣已經入神地聽著黑板前老師的說話，她身邊那男生依舊伏在桌上，動作也未曾有變。反而晞月卻百無聊賴地在櫃桶下玩著手機，仿佛感受到我的視線，抬頭向我看來，再望望阿欣的方向，然後回頭給我一個冷笑，我只好無趣地走過。





當我回到班房坐下時，依舊是我鄰座的阿豪主動提起晞月。

「喂你知唔知新黎果條女好高竇，聽隔離班啲人講，話佢成日無表情又唔講野。不過佢又真係幾靚女，聽講已經有幾條友話想溝人，不過睇死佢地都係收皮架啦。」兩眼發光地說著八卦的阿豪自顧自地對我說。

我聽到他的話後卻想到晞月剛剛對我的抱怨和對著我露出的表情，她並非像別人口中一般冷冰冰，這些事只是對著我才會流露出，這樣想著的我不禁有點優越感。

最後我在和阿豪的談笑間過完了這個不一樣卻又普通的高中第一日。