為左有人陪，今年情人節我搵左個ptgf: 5
巴士站四周圍無人，淨係得我同阿寶兩個，條街好靜，我地都係。
我同阿寶慢慢咁行，佢一直冇講野，我就咁樣跟住佢行。
原來係斜後方望住佢，係昏黃街燈照射下嘅佢多左一份神秘，我忽然衝動咁問佢。
「依家...仲可唔可以比我拖住你？」我伸出手等佢嘅回應。
「阿玉...」阿寶停低低呼我個名。
「可唔可以陪我一陣？」佢冇答我問題，反而問返我轉頭。
「嗯。」我見到佢咁樣講，都冇心情理佢比唔比我拖佢，淨係想知佢要我陪係點解。
我地行多左陣，就係一個公園仔到坐低左，公園入面已經冇曬人，得我同阿寶兩個係張長櫈到坐低。
我冇主動問阿寶發生咩事，因為我相信佢叫得我陪佢就會同我講，我要做嘅係靜靜地陪住佢，直到佢想開口為止。
「點解你唔問我咩事嘅？」阿寶終於開口講。
「因為你想講果陣自然會講，你叫我陪你，唔係叫我黎質問你。」
雖然我一直冇女朋友，但唔代表我唔明女仔諗咩，有時候太主動係會適得其反。
「你份人真係好好，你應該去搵返個女朋友，唔好再搵Ptgf啦。」阿寶擰轉面講。
「我...」我唔知點答佢好。
「你今日咪問我點解會做ptgf，我依家答你，係因為一個男仔，一個我鍾意嘅人。」
我聽到佢依一句，覺得個心痛左一下，好似比人用手握住左，如果依個人真係存在，我相信佢就係阿寶。
「我同佢識左好耐，我都鍾意左佢好耐...」阿寶冇理到我，而係繼續講落去。
「但我一直唔敢開口，我睇住佢不斷同其他女仔一齊，一個又一個，直到佢又一次變返單身果陣，我忍唔住同左佢表白。」
「佢好似一啲都唔驚訝，同埋應承左我，我以為我終於等到佢，但其實唔係。」
「我名義上係佢女朋友，但其實完全唔係。佢從來唔會約我，唔會哄我，唔會主動拖我手，佢淨係想同我扑野，但我唔敢，因為我覺得如果比左佢，佢就會唔要我。」
「我試過發脾氣，試過坐低同佢講，但佢其實唔在乎，佢最後同我講嘅一句係—我根本唔識拍拖，唔識做人女朋友—我明知依句係佢嘅藉口，但係我心入面諗嘅係，如果我拍多幾次拖，有左多啲經驗，佢係咪就會同返我一齊。」
「因為咁，我諗過亂咁搵個人黎一齊，但係我又驚，驚到時變左我傷到其他男仔，於是我諗左個方法。」
「就係做ptgf？」我插嘴問。
「係，我諗住雙方都唔會投入感情，只係一場交易，對方比錢，我比服務，我可以學識點做人女朋友，而且對方又唔會真係當自己拍拖，自然唔會比我hurt到。但點知我第一個客就係你。」
「我？」我苦笑左一下。
我對阿寶黎講可以有幾特別？無論點都唔會及得上佢。
「就係你，你同佢好唔同。」
「你會讚我，讚完仲要自己怕醜。」
「你會連戲都唔睇，全程淨係望住我。」
「你會想同我影相，就好似普通情侶。」
「你會想同我close啲，但又唔敢太過份，如果果陣你唔係話搭膊頭，而係其他野，我一定唔肯。」
「你會因為我隨口一句所以專心咁聽一首你未聽過嘅歌。」
「你會擔心我，想送我返屋企。」
「你會借啲意拖我手。」
「你會話聽同一首歌就好似兩個人相連埋一齊，你知唔知啊，其實我都係咁諗。」
「你會因為我開心，因為我所以笑。」
「你知唔知，你不知不覺間做左好多我未試過嘅野。」
阿寶一早已經流緊眼淚，而我個人好似呆滯左咁，但我感受到視線慢慢模糊。
「我決定左唔會再做ptgf，因為我根本過唔到自己果關，我無辦法將一樣講感情嘅野當做交易，我好慶幸我第一個遇到嘅人係你。多謝你。」
阿寶企左起身，佢任由眼淚沿住臉龐流下，轉身離開我，我望住佢愈行愈遠嘅身影，終於有返反應，即刻彈起身追上佢。
我跑到阿寶背後，捉住左佢隻手，佢冇掙扎，停低左係我面前。
「比個機會我，做我女朋友，唔係ptgf，係真正果隻。比個機會我繼續鍾意你。」我講出我心聲。
「阿玉...有時侯，人同人之間就係咁，你鍾意我，我鍾意佢，佢唔鍾意我，就好似死結咁，總要有個開頭要先可以解開。」阿寶慢慢咁講。
「點解...係我就唔得咩？」我已經睇唔清阿寶個樣。
流出黎嘅眼淚好似就黎浸死我咁，令我慢慢抖唔到氣。
「你比啲時間我，我已經諗通左，但係我冇辦法咁簡單就放低佢，我唔想心入面仲有佢果陣就同你一齊。」
「我...」我唔知可以用咩理由黎反駁阿寶。
「今日你要我做嘅野我都做左，依家掉返轉，你聽我話，玩一個遊戲。」
「乜野遊戲...」
「一個...緣份遊戲。過埋今日，我地唔好再聯絡，但如果有一日我地仲可以撞返對方嘅話，到時候，請你繼續鍾意我，可唔可以？」
「我應承你。」
「咁...拜拜啦，阿玉。」阿寶講完之後，掂起腳尖係我塊面到細細力錫左一啖。
阿寶又一次轉身離開，不過我冇再追上去。
我重新戴上耳機，頭先播左大半的歌再次播放。
分開一千天 天天盼再會面
只怕是你先找到我
但直行直過 天都幫你去躲 躲開不見我
我望住手機彈出黎嘅一張相，一張小丑女cosplays嘅相，下面寫住一句—情人節禮物
我係心入面對自己講—
我會一直鍾意你，直到再見到你。
全文完