交友app嘅萬事屋: 一切嘅開始
一切嘅開始
？/？/？？
其實點解人會選擇去玩交友app？究竟係邊一個人發明呢一樣野？人與人之間唔係就會有正常嘅社交？ 究竟點解阿銀會有玩交友app嘅念頭？ 究竟係佢未返香港隔離之前發生過啲咩事，以下落嚟嘅就會係阿銀嘅故事⋯⋯
冇記錯係阿銀去英國讀書嘅第二年，當時嘅佢已經適應左喺英國嘅生活，融入咗校園嘅生活，唔係話多姿多彩，其實都真係幾悶不過喺嗰邊讀書係冇咩壓力，一年都會返香港三次，見返啲中學同學都好多話題傾，不過係阿銀第二年返去英國讀書嗰陣時，有三位新入嚟嘅同學佢哋都係喺香港過嚟，有一個女仔兩個男仔，一開始阿銀同佢哋都唔係好熟嘅，之後阿銀聽其他人講，個女仔同咗其中一個男仔一齊，其實阿銀都冇話特別在意，因為始終同佢哋唔係好熟，除咗有陣時上堂會同佢哋同一班之外，如果唔係都冇乜點交流，淨係知道個女仔叫Sofia，之後喺下一年，Sofia嘅男朋友就轉左校，之後Sofia同阿銀嘅故事就開始⋯⋯
「喂，阿銀做咗數學功課未啊，下堂就係㗎啦喎，做咗嘅話不如借比我抄，唔該你啦」
「唉，你又未做呀，又俾人鬧㗎啦喎，算啦算啦借俾你抄，怕鬼咗你。」
「你又唔係唔知㗎啦，琴晚搵男朋友講電話講到好夜呀嘛，唔該你啦。」
「記得上數學堂幹事俾返我呀，如果唔係我都冇功課交」
冇錯佢就係數學堂坐我隔離，因為英國嘅數學實在太簡單，喺香港一早已經學過，咁岩佢又坐隔離，所以我哋兩個成日都好快做完，就喺度傾偈，咁日子耐左我哋就變好熟，可能佢男朋友唔係佢身邊，有時佢有啲咩煩惱都會搵吓我，咁我又同佢傾吓，咁好自然地佢就做咗我最好最好嘅朋友。
「喂，我啲礦泉水飲晒啦，不如今日落堂去超市入啲貨啦，你都知啦我一個女仔拎唔到咁多支礦泉水返去，阿銀陪我出去啦」
「都可以嘅，橫掂我都要去入貨，同埋買啲嘢返去煮。」
「今晚煮咩食啊，冇諗過預埋我先？」
「今晚食蕃茄炒蛋，仲有之前食剩嘅雞胸肉，同埋飯囉，你想食嘅我咪煮多少少同埋煮多碗飯」
「好嘢！又唔使食飯堂啲嘢啊，真係好鬼難食啊，日日都食嗰啲食到厭晒，你煮完就打俾我啦。」
係，冇錯佢係一個港女，好地地有水唔飲係都要飲礦泉水，話咩乾淨啲喎，跟住呢又要我煮飯俾佢食喎，不過其實我都唔介意嘅，同埋我都明白佢男朋友唔係佢身邊，如果我唔陪下佢都幾寂寞，同埋我又唔介意做呢啲嘢，咁咪當陪下佢囉。如是者佢有啲咩心事又會搵我講吓有時佢又會喊下咁，有時我都覺得有啲心痛，不過我都好清楚自己講過，佢係有男朋友，我只係當佢一個閨蜜咁，所以有時我都幾開心，雖然佢係唔開心，但係起碼佢都會主動同我講吓，好似可以做到佢一個依靠⋯⋯
「喂傻仔生日快樂呀，那一早買好咗生日禮物比你啦，記得返去宿舍先好拆出嚟睇啊！」
「咁客氣呀，我記得我好似冇同你講過幾時生日個喎，咁都俾你搵到利害啊！」
「啊大佬啊你個生日日期係你個ig名咁明顯，係人都睇到啦。」
「你唔俾係第二啲日期嘅咩，巴閉啦叻啦，咁都俾你搵到我生日日期」
「早啲唞啦聽日仲要返學啊，我返到宿舍再WhatsApp你啦。」
「見你送生日禮物俾我陪你行返去啦」
「好啦，本小姐就容許你一次送我返去啦，見你咁想送我返去！」
「我禮貌上咁做姐你估我好想㗎」
「咁你係咪唔送啊」
「唔係唔係點敢呢，行啦再唔返去俾人鬧啦。」
呢一樣野係發生喺第一年，之後嗰年即係2019年嘅10月，係冇再發生過呢樣野，以佢嘅解釋係佢太忙太多野做，完全唔記得咗，其實嗰陣時我心諗，都冇乜嘢嘅可能佢真係太忙呢，無謂因為少少野而嬲佢啦，同埋我生日姐冇乜大不了啦。不過之後又恢復翻正常，如常嘅生活成日同佢傾吓計吹吓水笑吓，上堂玩手機嗰陣時會share啲搞笑post俾佢睇，仲記得有一次佢笑到出聲俾人收咗手機，跟住就賴鬼我，最後佢仲搶走我部電話，直至到佢攞返部手機先比返我。咁我一個大男人冇理由同佢計㗎嘛，咁咪由得佢玩下囉，冇所謂啦。
跟住有一次我同佢鬧交，冇記錯係因為關於我哋其中一個共同嘅朋友嘅一樣嘢，因為我哋一直保持着唔同嘅意見，嗰個月少咗交流，佢又特登好似避我咁，可能佢唔想因為嗰個朋友破壞左我哋嘅友情掛，所以佢寧願同我講嘢，最後都係忍唔住，直接同佢講清楚，其實之後我哋都覺得點解要為咗另一個人而鬧交，係呢個時候我係打從心底裏欣賞佢，原來佢都係一個可以為咗朋友，可以不顧一切或者作出犧牲嘅人。
但係好景不長，喺2020年嘅3月，武漢肺炎爆發，大家都好擔心忙緊買機票執嘢返香港嘅時候，佢突然之間開始完全唔覆我，唔覆我WhatsApp，唔睇IG dm ，唔覆我電話，因為佢本身係一個比較平易近人嘅人，所以佢同其他比較細嘅學生嘅家長都熟，咁我諗可能佢要幫佢哋搞埋返香港啲嘢，可能又要幫佢哋搶機票，所以佢先會咁忙唔得閒覆我，或者有時間佢都要休息，如是者過咗一個禮拜兩個禮拜，直至到我哋返去嗰日佢都冇再搵過我，係呢段期間我開始係到諗，究竟係咪我做錯啲乜嘢，係咪我太煩唔應該搵佢，我諗極都諗唔明，亦都同我另外一個friend講過呢個情況，佢都話平時見你哋明明好friend，冇理由㗎，點解佢會突然間唔搵你。我自己都喺度諗，其實我唔係過咗條界，冇記錯佢有一次病得好緊要，直情學校嘅醫療室都幫佢唔到，佢要入醫院，因為醫院離學校都有一段距離，所以我有冇得去探佢，等佢返嚟嗰陣時我仲特登學咗煲湯，煲左碗湯俾佢飲吓，唔通佢覺得我哋嘅關係太過火，要畫清返距離？
喺下一篇，究竟點解阿銀會崩潰呢，點解佢咁唔想記得翻以前嘅嘢，30路姐姐就會登場，佢會指導阿銀，而且逼佢認清左事實，故事嘅發展究竟會變成點呢，敬請期待！