為了實現媽媽遺願，我成為了女校男生: 和妹妹的重遇

「Jessie，妳冇事嘛?今日Period到? 」
 
「呀…唔係呀…有少少集中唔到精神…」
 
Ivana望一望程逸風再望一望我紅哂嘅面，就係到偷笑
 
「妳死啦妳!女班長、模範生」
 
「下…做咩事呀?」
 




「十月芥菜啦妳」
 
「邊…邊到有呀…」
 
「妳仲呃我?F.1識到妳而家，坐足妳咁多年隔離我會唔知?」
 
「唔…唔係妳咁諗啦…突然間要同…同個男仔一齊拍擋…我真係…我唔識點問佢拎電話…」
 
「妳真係呢……標準村姑代表，問人拎電話之嘛，叫妳嫁佢咩」
 




「咁…我未試過嘛…」
 
未講完呢句說話，已經聽到走廊有幾個低Form同學嘅笑聲
 
「家姐家姐!!!我地學校黎左個男生呀!!!同妳一樣係F.6架，妳識唔識佢呀?快D介紹俾我地識下丫!!我地班d同學話佢好高好靚仔架，已經有人準備黎越級挑戰啦」雪晴一興奮起上黎，就會捉實我雙手係咁揈
 
「喂~雪晴~咁細個就學人識男仔呀?」
 
「車!係女校之中突然有個男仔出現讀書，係人都想知咩事啦，家姐妳識唔識佢者?」
 




「我…我…」
 
「妳家姐當然識人地啦，仲打算問人地拎電話添啦」
 
「下?家姐妳食錯藥呀?」
 
「錯啦，妳家姐係女班長，而人地呢…就做男班長」
 
「嘩…家姐…近水樓檯喎，幾時介紹姐夫俾我識呀?」
 
「乜…乜野姐夫呀…妳個衰妹咪亂講啦，再亂講唔教妳做功課架!」
 
「Ivana姐姐呀，家姐佢蝦我呀…」
 
「唔緊要!我教妳!」




 
「喂!妳地咪亂講啦….呀…」
 
門外突然出現好多「蝦佬」、「你好」之類嘅說話
 
「總之呢!!家姐妳快D介紹姐夫俾我識啦!!」
 
係雪晴講得好開心之際，有一隻手摸住佢個頭
 
「小妹妹，妳想識我?」佢彎低身，將自己塊臉嘅高度同雪晴塊臉嘅高度變成相同