為了實現媽媽遺願，我成為了女校男生: 黑歷史

「我由細到大……都冇人織過頸巾俾我」
 
「你媽咪都冇?」
 
「佢邊得閒丫…而且…佢都心力交瘁」
 
「我仲好記得果日，上緊數學堂，校長同班主任好急帶左你走，之後你冇返幾日，到你返學時你左邊已經有黑紗」
 
「估唔到妳仲咁好記性喎」
 




「其實我有D野想問你…不過…」
 
「問囉，妳問我會答你」
 
「你中學時發生左咩事?好多同學聚會都唔見你」
 
「我中學嘛……冇左爸爸，我都冇咩開心過，成日都唔想返屋企，經常出去犯事，俾警察拉過好多次」
 
「嗯…」
 




「到我F.2果年終於俾警察拉左準備落charge送上庭，但係個幫辦睇到我係單親，就放過我，改為警司警誡」
 
「咁媽咪走左之後你同家姐之後點呀?」
 
「媽媽走左之後，我地執媽媽遺物時先發現媽媽嘅願望，媽媽獨自照顧我地，我點都要為佢實現，之後家姐升大學，學校知道我地情況，就俾家姐帶埋我入Hall到住，家姐d同學同埋講師教授幫我補習之類，如果唔係我果8A真係咁易拎到咩，我果陣一放學就有部反黑組嘅警車送我返Hall，迫我斷哂所有黑底朋友，然後F.3果年再由保安局出面要教育局幫我換學校，我先可以專心讀書」
 
「但你其他屋企人呢?」
 
「冇架，我地冇咩屋企人，只有學校老師，同埋…」
 




「同埋邊個?」
 
我考慮左陣，決定同雪凝坦白，因為朋友之間唔應該有隱瞞，更何況係雪凝?
 
「妳真係唔好同人講喎」