為了實現媽媽遺願，我成為了女校男生: 男廁的英雄大會

經過半個月密集式治療(真係超密集)，我嘅腳傷已經差唔多完全好返，而且愈來愈接近我同雪凝生日
 
其實我應唔應該同雪凝表白好呢?佢係我最需要人支持果時，完全唔理其他人眼光咁照顧我，的確，係我用柺杖返學嘅日子，佢真係每日都係我身邊，幫我準備午飯、晚飯之類。雪凝的確係一個100分嘅女朋友。所以，我今次捉左詩敏黎問佢意見
 
「下?你咁都要我教你?姐姐都做到咁樣啦喎」
 
「但係始終…我同佢係學校…」
 
「有咩好怕呢?媽咪開左綠燈，姐姐屋企又開綠燈，你怕咩呢?雖然而家有傳你地已經拍緊拖」
 




「妳係邊到聽到架?」
 
「女廁囉!唔通男廁咩，拿!!中期考之後我地學校有個talent show，年年好多奇人異士會上台表演呀之類，對於你呢位有JJ嘅同學，學生會實會搵你上台分享下點解會入黎讀之類架啦，你咪係台上暗示下囉」
 
「咁不如係台上大叫『林雪凝，妳做我女朋友啦』好嗎?」
 
「你敢做又唔怕呀」
 
睇一睇條頸巾，原來已經織好左，係時候搵日子同雪凝表白
 




就係我小息係男洗手間放鬆我嘅幽門括約肌之時，男廁嘅門突然俾人踢開，仇家?冇可能丫，係女校我得罪邊個?
 
「程逸風同學，而家阿姐我問你野，你乖乖地咁答我」
 
「阿咩姐呀熨波洲，妳帶坐成班同學入黎男廁做咩呀?」
 
「你屙完未呀?」
 
「屙完啦，妳踢開我道門，係咪想睇我條J呀?」正想唔拉褲鍊轉身，就嚇到成班雞飛狗走
 




清潔好哂之後「未知各方女中豪傑光臨小舍有何貴幹?」
 
「你呀!!!係咪鍾意Jessie架!!係就同人表白」
 
「對於呢D傳聞我唔方便回答喎」
 
「傳咩聞丫!!我地有污點證人!!」
 
污點證人?邊個?雪晴?
 
「阿哥，我俾班大師姐迫左供呀」但係詩敏個樣一D都唔似係俾人迫供咁喎
 
如果我唔認，我真係唔洗離開個男廁
 
「得啦得啦，我自己識同雪凝解決啦，妳地唔好迫我啦好唔好?」