我拍完佢心口,佢同我依依不捨咁分開,果時我塊面應該係紅過紅蘋果,慢慢抖下條氣,重組返頭先發生咩事
 
「你…做乜…」我呢一句說話未講完,佢又再一次捉實我錫多次,終於係呢個時間我個腦load到發生咩事,佢完全係照copy返小學果一次,即係佢同我表白緊,我唔知好嬲定好笑,其實佢而家叫表白定抽水呢?佢真係好懶好懶呀!!!表白都照抄返以前D橋段!!
 
今次我捉實佢,好唔想俾佢放開我,不過一分鐘之後,我又再次拍佢心口,本小姐又要窒息啦。
 
「喂…你…爭一句野未講喎」
 
「呢個係妳嘅生日禮物黎架喎」
 


「邊…邊算係呀!我唔當係架!」
 
咁樣抽完本小姐水就想過骨? 好難啦
 
然後佢係書包抽出一條深藍色嘅頸巾套係我條頸上邊,我認得係我教佢開針織果條,高低針,即係一開始佢就係織俾我,而唔係織俾佢家姐?
 
「妳呀!傻妹,隻手平時已經好似妳個名咁樣,雪凝咁凍,妳著多件衫,戴返頸巾,唔好俾其他男仔睇蝕哂」佢邊講邊幫我戴頸巾
 
「條頸巾…」我摸住睇,力度不一,花紋唔太靚,明顯就係佢親手織
 


「呀…其實一開始就係想織俾妳」
 
「無啦啦你會諗到?」
 
「上次妳M痛…我覺得妳隻手好凍…所以咪…」
 
「多謝你…第一次有男仔織頸巾俾我…」可能係我易喊…我對眼開始有淚水出黎
 
「雪凝,仲有一樣野」
 


「係…」
 
「我鍾意妳,由三年級第一眼見到妳我就已經鍾意左妳…」
 
「三年級?」
 
「係…當年我仲係好矮,妳讀3C,我讀3D,我地係操場排隊果陣我每次都專登企妳隔離,就係為左爭取望妳,我鍾意妳果陣都唔知妳叫咩名」
 
我扁起個咀「咁…你唔識去問其他同學架咩?」
 
「所以我咪偷睇妳個書包,先知妳叫林雪凝」
 
「之後呢?」
 
「之後我就鍾意妳到而家,差唔多10年,我讀舊果兩間中學都冇追過女仔架」


 
「都唔知你係咪呃我嘅」
 
「咁妳可以做我女朋友嘛?」
 
係我17歲生日當日,我鍾意左10年嘅男仔終於向我表白了