為了實現媽媽遺願，我成為了女校男生: Joint school show(1)

經過上一次壓力事件之後，我將所有事都話俾雪凝知，煩到佢就黎想殺左我。因為我連去左幾多次廁所都話埋俾佢知，咁樣大家打打鬧鬧，其實更開心。
 
終於終於過左大考啦!!!我都決定俾自己休息兩星期左右先開始做past paper
 
暑假之前，我地學校個Joint school show，我都決定左要表演咩啦，今次雪凝破例上台做埋MC，拍住Joanne。而我呢?就同阿熙兩個搞楝篤笑，務求將所有氣氛推到最高峰。
 
「大家好，今次MC又係我呀，我係大家嘅MC Joanne，請大家多多指教」
 
我女神Joanne呀!!!大胸長腿女神呀!!!!
 




「乜龜婆又係妳呀?」我係後台開咪串佢，果下已經有好多掌聲同笑聲
 
Joanne聽到之後忍唔住係後台拉我出黎打
 
「你去死啦!!!!唔好以為Jessie係到我會俾面佢唔打你呀」
 
「大家好，我係大家另一位MC Jessie，請大家多多指教」
 
「喂!!拍手啦!!做咩唔拍手呀?大力d!!!邊個唔俾力我斬佢對手落黎」係觀眾席有一班同學不停迫人拍手
 




呢d係我地成班夾定，咁樣氣氛會好好多，所以我聯同舊校同學搞左呢個小環節出黎
 
「Jessie，好耐冇見妳上台做MC啦，請問妳點解之前唔繼續做呀?妳睇台下好多妳D Fans喎」
 
「唔係，Joanne妳多d fans，妳知嘛，妳係好多友校男同學嘅女神黎架嘛，佢地成日都黎等妳放學喎」
 
「係?點解我唔見人嘅?」
 
「哦，去哂瑪麗急症室掛，乜妳認為有男仔係我地學校門口等放學可以全身而退咩?首先，所有男同學黎我地學校前要上山，中途已經要受到體育老師軍團嘅追趕，有命上到黎就要面對我地學校最強兵器，訓導主任嘅獅哮功，佢嘅威力足以令到所以男同學經脈盡碎，所以妳d fans點上到黎接妳放學呢」
 




「唔係喎…我見妳呢…成日同個男仔一齊放學架喎」
 
「果個呀…佢…對獅哮功係免疫嘅，可能佢受到訓導主任嘅長期磨練呢?」
 
「嗯…都啱嘅，佢連冰山都可以融化左，佢真係幾犀利嘅」Joanne呢句擺明係潤雪凝嘅
 
「我地都係唔好咁講訓導主任啦，一陣全場都中獅哮功就慘啦」
 
「唔緊要嘅，妳一定冇事喎，妳叫訓導主任做奶奶架嘛!!妳係佢新抱丫嘛」
Joanne講完呢句野，引黎全場拍手
 
「訓導主任得一個女架咋，妳唔係唔知呀?佢係我地學校同學喎，係咪呀Jasmine?」雪凝開始想兜
 
「我有個阿哥架!阿嫂」台下傳黎詩敏嘅聲音
 




「唔洗兜啦，訓導主任有個契仔架嘛，係咪呀，新抱仔」
 
「唔講啦唔講啦，有請第一位為大家表演嘅同學啦」雪凝兜唔到了
 
經過幾輪表演後，終於到我出場，係第一次出場，之後我仲有大把機會上場表演