為了實現媽媽遺願，我成為了女校男生: 槍戰

如果講阿b係學校嘅反斗百厭野，最好笑一定係F.7果年佢同Ivana嘅槍戰
 
「啪!」「死啦!程逸風!!!成日話我冇胸丫啦!!!」Ivana拎枝Nerf玩具槍返黎向阿b報復
 
「喂!!咁妳係冇丫嘛!!得果32B」
 
「你仲講!!!」Ivana不停向阿b射子彈
 
之後當日放學，阿b去左銅鑼灣大手入左幾枝Nerf長槍同短槍，仲有大量子彈。果晚佢成晚係屋企上子彈
 




「喂，你做緊咩呀?，你帶玩具返學校玩呀?」
 
「呢個係我同Ivana之間嘅恩怨!!!!」
 
第二日，佢帶住幾枝長槍，腰間插住兩把短槍，成個Rambo咁行入課室
 
「家姐，姐夫佢做咩呀?扮Rambo定未來戰士呀?」
 
「阿嫂，阿哥又痴左邊條線呀?」
 




「佢尋日俾Ivana挑戰，今日返黎報仇」
 
「佢帶哂太陽眼鏡喎，一定好好睇」
 
「嘭!」阿b踢開7B課室道門，立即搵到Ivana
 
「熨波洲!!!妳呢個32B平胸怪!!我今日要報仇!!!」
 
Ivana拎枝短槍出黎之時，阿b已經拎左枝長槍不停向Ivana開槍
 




「喂!!!好啦死人程逸風!!Jessie!!!妳老公呀!!!」
 
「死啦!!!!!」阿b好似未來戰士續集咁，不停向Ivana開槍，佢地兩個係走廊不停開火，子彈橫飛，名副其實嘅『讓子彈飛』
 
Ivana好快不敵阿b，求其走去其中一間課室到避難，點知俾人趕返出黎。阿b用哂一枝槍嘅子彈，立即換第二枝槍
 
「嘭嘭嘭!!!!」Ivana就好似許文強咁身中無數咁多槍，好快阿b用第三枝手動長槍，好似狙擊手咁不停向Ivana開火。期間佢地d流彈誤中好多無辜嘅同學，不過大家都笑得好開心
 
最後Ivana坐左係地下，阿b不停用短槍向佢行刑式開槍
 
「投降啦!!!!你仲恐怖過拉登呀!!!」
 
阿b除低副太陽眼鏡「I’ll be back!!」
 
可惜…佢back唔到




 
半個鐘之後，佢俾奶奶罰企係操場中間，掛住塊牌，寫住『我抵死!我以後唔再蝦女同學』，仲要好似英國御林軍咁，要俾槍禮經過嘅老師
 
「叫左你架啦……咪玩到咁癲」
 
「點解Ivana唔洗罰呀…」
 
「喂!!!影相嘅唔該排隊!!!」Joanne同Ivana係到安排同學影相，而雪晴同Jasmine就幫人渣機，好多同學黎搵阿b影相，包括校長
 
呢次槍戰日後亦成為我地學校傳說之一