我在補習社遇到一個令我難以忘懷的女生。: 三、面談（二）

「自由係有得選擇自己唔鍾意嘅！呀唔係… 自由好似空氣，當窒息嘅時侯我哋先會察覺存唔存在…講出嚟都覺得尷尬。」我內心不斷交戰，但都仲未講出口。
 
「你唔洗諗咁耐，根據第一個諗法答喇。」
 
依個時侯我又feel到塊面好似畀針拮咁，我思考咗一陣。
 
「自由依兩個字唔係真係好似字面咁自由。好似有啲國家你講錯野就要坐監。」
 
「唔……咁你點睇香港。」佢戚起堂眉。
 


「以香港為例，2003年廿三條好大程度限制言論自由，反國教我哋要想有得選擇我哋可以唔想讀咩，雨傘運動我哋想有可以選擇一個民選特首嘅自由，唔同種類嘅自由好似一條條支流咁，慢慢匯入大海就係我覺得最接近自由嘅定義。」我將中學通識讀過嘅野嘔翻晒出嚟。
 
答完其實唔知答咗啲乜，特別係要解釋哩啲概念化嘅用語。
 
「估唔到依家啲大學生都唔係咁廢！都叫有留意吓時事。」佢高興得喜出望外，不斷點頭。
 
「……」我閃閃縮縮望住佢。
 
「攞張身份證同埋證書嚟，幫你影印做個紀錄。」佢伸隻手出嚟示意我畀份文件佢。
 


「哦……」我遞咗份文件畀佢。
 
「你有冇性罪行定罪紀錄？」佢喺printer前面影印緊我嘅資料。
 
「……冇。」由於我之前果一份part-time都冇問我，所以果陣我覺得點解會問咁奇怪，大個咗先發現原來係程序嚟。
 
Patrick背住我講:「時薪就90蚊一個鐘，每星期出一次糧，如果表現得好，每個學期加五蚊，有冇問題？」
 
聽到90蚊梗係冇問題啦，因為我上一份都係搵60蚊一個鐘，表現好唔好依啲都預
咗係門面野呃下我。


 
我:「無問題。幾時可以翻工？」
 
「今日9月4號，小學生頭一星期都無功課㗎喇，9月12號開始返喇，你一星期可以返邊幾日？」佢好似神算子用手指計算日子。
 
「星期一、四、五。」
 
果陣我係year3，星期一day off，星期四放十一點半，星期五就放十二點半，鬼叫晒銀仔啲堂日日都係八半咩。一到晏晝冇堂上就即走，但晏晝其實先係大學生啱啱起身嘅時間。
 
「你係我哋補習社第三個tutor。星期五我多數都唔會喺到，因為要出去上堂，但星期五小學生啲功課會好多，你要有心理準備。」佢遞翻份文件畀我。
 
「好，冇問題。」
 
打後嘅星期五腦細都會留低一百蚊話畀我放工食飯，咁我都覺佢有啲人性，因為星期五嘅補習社真係煉獄嚟。
 


就係咁佢正式成為咗我腦細，果次In咗成個鐘，佢用咗半個鐘同我講咩係民主，香港嘅近代歷史，我諗佢應該係一個對香港政治有研究嘅人。
 
傾完之後我走咗去附近嘅快餐店醫肚，要快靚正梗係去阿活食野啦。平時我通常都係嗌吓焗豬，肉醬意粉，但今日梗係食豪啲。我就叫咗花膠雞湯邊爐，仲加咗碟肥牛。其實九點係阿活食野個時間點真係一流，人唔多，我每次都會揀窗邊坐，一個人靜靜地，貪夠近睇到出面風景。
 
食完飯返到屋企就梗係第一時間攤喺張床，返到去就同呀爸呀媽講下星期開始唔洗畀零用啦～咁佢哋都冇問長問短，因為佢知道我係個唔鍾意畀人問太多野嘅人。