我在補習社遇到一個令我難以忘懷的女生。: 七、同一方向

腦細走嗰陣，其實P4-P6啲功課都完成得七七八八，同埋佢哋都算自動自覺，所以真係名副其實等放工。嗰一刻終於感受到啲人成日話補習老師有幾hea。
 
「Mr. william，我唔識做哩一題。」Kelly行到老師枱指住佢唔識嗰題。
 
「攞嚟睇吓。」我望一望本作業上嘅題目。
 
「英文嚟嘅，做咩唔問Cindy？ 」我一臉疑問，因為根據補習社規定，英文功課要問外籍老師或者腦細。
 
Kelly扁晒嘴:「……我驚啊……」
 


「……唔，原來係tenses。」我望住本作業自言自語。
 
對於tenses我真係冇把握。同埋我份人就係唔做唔錯果啲人，所以就搵咗個藉口。
 
「Kelly, you need to be brave, huh , understand？ 」我做咗奸爸嗲手勢叫佢搵Cindy。
 
「同埋Patrick話英文功課搵佢同Cindy，所以我都教唔到你喇。」我掩飾自己無信心做得啱哩題。
 
內心有聲音喺我腦入面迴響:「師者，所以傳道、受業、解惑也。」
 


見到Kelly唔開心嘅樣內心覺得好自責。
 
「好喇……」Kelly身體顫抖，慢慢行出去搵Cindy。
 
「Miss Cindy……I don’t understand this question. 」Kelly隻手震晒咁揸住本Grammar Workbook。
 
「Oh Kelly～it is ok to ask question. 」Cindy見到Kelly露出令人疼愛嘅神情，突然媽媽上身。
 
我諗平時Kelly都好少問Cindy英文問題。
 


望住Kelly嘅背影，發現細路女諗野真係好簡單。上一秒就話唔想搵，下一秒都係鼓起勇氣。
 
有驚無險到咗七點半，我果班學生都走晒，我都準備執自己野打卡走人。
 
「Miss Cindy, I am leaving the office.」我打開房門同Cindy講。
 
「Oh, Thanks for your effort today. Bye. 」Cindy抬頭望住我笑。
 
「Bye~」
 
經過咗classroom A，掙扎應唔應該同Ellie講拜拜好。
 
我喺Ａ班班房門口前面來回踱步，掙扎緊應唔應該入去。
 
聲音Ａ:「唔洗講喇，人哋班房仲有兩個學生喺到。」


 
聲音B:「你今日第一日返工唔係連拜拜都唔講咁冇禮貌？ 」
 
內心兩把聲音不斷糾纏。
 
我份人就係咁，大大小小嘅事內心都會有好兩面嘅諗法，好多事內心把聲都會左右我做野嘅決定，成日都會搞到我overthinking，通常諗到自己個頭有啲痛先會停止。依一點係我最唔鍾意自己嘅哋方。
 
但我同阿腳或者屋企人講野果陣內心把聲音就好少出現，我諗大概意思係我可以同一個人真正咁暢所欲言，所以我就同阿腳咁friend。
 
之後，我都會用聽唔聽到內心把聲音依個標準，嚟決定可唔可以同嗰個人做朋友。掙扎咗咁耐我都係決定咗同佢講。
 
「篤篤。」我敲一敲門。
 
「Miss Ellie，我走先喇，辛苦晒。」我雙手合十。
 


「？？？？？ 」佢呆咗一秒然後微笑。
 
「拜拜Mr. William。」佢向我揮手。
 
話說佢果隻呆，係會融化人嘅天然呆。
 
返完工咁就一定要搵阿活醫肚喇，今日返工叫咗呀媽唔洗煮我飯。
 
食完阿活個焗豬飯真係成個人特別舒服，野食就好似係比返工人士一種慰勞。
 
今日我仲對自己冇教Kelly grammar件事耿耿於懷，所以食飯嘅時侯即刻上網搵下啲grammar練習刷下題目。
 
食完阿活，經過天橋諗住搭巴士返屋企果陣，見到行係我前面嗰個女仔有啲熟，再望下佢衣著，恤衫，紮咗條馬尾，牛仔褲，綠色Stan Smith。
 
電腦顯示係Ellie嘅結果係99.9%。


 
唔知點解我發現係佢嘅時侯有啲緊張，可能係我驚撞到佢唔知要講咩好。於是我特登放慢腳步，慢慢喺後面跟蹤佢。
 
佢行到去巴士站，我仲喺天橋上面眺望著等緊車嘅佢。
 
過咗五分鐘，望住佢上咗一架689號巴士。
 
其實我平時返屋企一係搭480，一係搭689號巴士，因為兩架巴士都順路。
 
望住佢上車，我先安心行去巴士站。我份人就係鍾意做哩啲無謂野獲取安全感。
 
等巴士途中忽然諗起Ellie:「咁以後放工咪有機會撞到？」
 
聲音A:「你諗咁多做咩姐，你不嬲鍾意一個人靜靜地搭車。」
 


聲音B:「以後有人同你搭車傾計都幾好啊，係時侯要變下喇。」
 
內心入面嘅劇場又開始上映。