我在補習社遇到一個令我難以忘懷的女生。: 十一、發熱肌肉貼

「你今日返3點半，Cindy會開門比你。」+9434 0634傳了一條訊息給你。
 
「ok。」
 
由於我今日12點半放學，食埋個飯係學校圖書館hea到2點就搭車返去。
 
行去補習社經過百佳，腦海中忽然浮現一把細路女嘅聲音:「Mr. William, 今日有冇漢堡包糖食？ 」
 
聲音A:「唔好買喇，你又唔係鍾意食。」
 


聲音B:「12蚊姐，班細路又開心。」
 
內心掙扎後決定喺百佳買咗漢堡包糖去補習社，買完之後就趕返補習社。
 
「叮噹。」我㩒門鐘。
 
「hello，William.」打開門比我果個Ellie，佢好似零舍精神咁。
 
佢上身穿着白色tee，下身係一條蓬鬆長裙，而且今日放咗頭髮落嚟，個樣即刻成熟咗。
 


「Hello，Miss Ellie. 」我好有禮貌點點頭。
 
入到去補習社我如常去打卡位打個卡先。今日返嘅係Cindy，我主動同佢打招呼:「Hi Cindy. 」
 
「Hi William. 」Cindy好熱情同我打招呼。
 
「喂！」有隻手突然放喺膊頭上，我份人對哩啲出奇不意嘅動作好敏感，我嚇到個膊頭用力後縮，然後慢慢擰轉頭。
 
「哈哈哈。」Ellie捧腹大笑。
 


「嚇死人咩。」我扮汪阿姐把聲掩飾自己出洋相。
 
「你個樣好傻仔。」Ellie個嘴就嚟笑到同個鼻哥窿平排。
 
我唔憤氣：「有邊個比人嚇個樣唔傻仔㗎。」
 
「你又啱喎，有啲野比你。」佢摷一摷tote bag。
 
我有啲錯愕:「做咩冇啦啦比野我？？」
 
「多謝你上次教我同埋請我食糖。」Ellie雙手遞上兩包藥貼比我。
 
「……好小事姐。」我唔係幾好意思接上。
 
心中有十萬個問號，因為我覺得哩啲野微不足道，而且喺係職場打好關係嘅手段，點解佢會咁上心。


 
Ellie好自然咁解釋: 「我每次出去攞野都見到你用手鏈住個膊頭，條頸又成日側埋一邊。」
 
「咁你都睇到……」佢咁細心嘅舉動使得我有股暖意湧上心頭。
 
「依兩塊野你貼係酸痛嘅位喇，今日星期五有排挨! 」Ellie做出用手臂做出奸爸嗲動作。
 
我靦腆地點點頭:「多謝。」
 
之後佢返翻去classroom A做野，我就走入廁所貼佢果兩塊野，因為我個膊頭真係好酸。
 
我撕開咗塊野聞到少少中藥味，好彩我對哩啲味唔係好抗拒，跟手就一野撻落個膊頭。
 
貼完果吓發現冇咩感覺，心諗都唔知係唔係比Ellie呃咗。之後我就攞啲功課同默書入班房對。
 


過咗十五分鐘，塊肌肉貼開始發熱。
 
「啊……」我忍唔住嘆口氣，一股股熱力開始流向全身。
 
估唔到塊野真係幾堅，因為feel到個膊頭真係鬆晒，哩份禮物真係正中下懷，估唔到佢咁體貼。
 
對咗一個鐘，啲學生都陸陸續續返晒嚟。
 
Kelly如常衝入classroom B:「Mr. William，今日……」
 
我即刻打斷佢:「冇。」
 
佢扁一扁嘴就返埋位做功課。
 
補習社其中一個規矩就係學生去廁所要舉手，由於佢哋通常嚟補習兩個半鐘，所以走之前點都會去次廁所。


 
我襯佢哋每個人去廁所嘅時侯偷偷地放漢堡包糖係佢哋筆袋，不過後來發現哩個方法係大錯特錯。
 
男同學A見到突如其來嘅糖果好驚訝:「喂，你哋筆袋有冇漢堡包糖。」
 
同學B、C異口同聲:「有啊，係咪你請我哋食？ 」
 
男同學A:「我今日都冇買糖。」
 
我:「咳咳……安靜。」
 
佢哋聽到後即刻收歛咗，b班果然乖啲。
 
男同學A舉手問我:「Ｍr. William，我哋可唔可以依家食？ 」
 


我:「食完記得掉去垃圾桶就得。」
 
Kristy同Mary喺旁邊陰陰嘴笑打開個筆袋。而Kelly就倒晒筆袋啲野出嚟:「點解我冇糖嘅。」
 
咪就係佢哋個個都去過廁所，得你未去，我當然冇咁講喇。
 
我作個大話：「你唔聽話咪冇囉。」
 
跟住見到佢個樣好唔開心。
 
「你去廁所或者出去小息先喇，一陣就會有魔法變兩包比你㗎喇。」我同Kelly講。
 
佢好聽話出咗去小息。
 
跟住班房其餘五個同學就睇我展示哩個魔法，眾人叫囂:「Mr. William你偏心，點解佢有兩包我哋得一包。」
 
「噓……細聲啲，邊個話你哋包糖我送㗎？ 」我故作鎮定。
 
過咗五分鐘，Kelly入翻嚟好開心見到兩包糖。
 
我扮唔知:「咳咳……唔好講野，食完快啲溫書做功課。」
 
但原來Kelly小息果陣同咗一樣放小息classroom A嘅kace講咗哩個奇蹟。
 
A班嘅kace過咗一陣就帶埋隔離班埋Casper過嚟乞糖食。
 
Kace擺出一個滿心歡喜嘅樣，伸隻手板出嚟問我:「Mr. William, 我啲糖呢？」
 
「……」我喺書包攞咗兩包糖叫佢哋收埋先好返classroom A。
 
事實證明咗我一開始光明正大咁比佢哋可能會好啲。