我在補習社遇到一個令我難以忘懷的女生。: 十九、老細責罵

之後嗰個星期日我就同阿腳講果日喺宿舍發生單野，佢打死都唔信，仲話如果係真話，我就已經用盡一世人嘅運氣。
 
「真㗎。」我好誠懇咁講。
 
「痴線，你講到好似啲甜故咁，樓下有精神科專科睇，一陣打完波去排隊喇。」佢繼續射波冇理我講。
 
「……唉，唔講喇。」我灰晒機。
 
佢挑釁我:「你玩HORSE嬴到我咪信囉。」
 


我講嘅真係事實嚟，冇半點虛言，如果係大話就天打雷劈。
 
我抱怨:「大佬你又整埋啲大風車，又拉框爆籃，點同你鬥。」
 
「渣ga。」阿腳講完之後好輕鬆做咗個大風車反手上籃。
------------------------------------------------------------------------------------------------------------------
咁又過咗一個星期。
 
我返去又同腦細講:「我今個星期五都返唔到。」
 


Patrick冒火三丈:「有冇搞錯，上個星期又話返到。」
 
我死死氣dup低頭:「唔好意思，下個星期一定返到，如果我再講返唔到就炒咗我喇。」
 
腦細開始扯火:「你話㗎，一開始講清楚咪好，係要搞到咁麻煩，我都唔知臨時咁急Michael得唔得閒。」
 
Cindy:「Patrick, are you ok？」
 
我九十度躹躬:「好對唔住。」
 


腦細望住電腦:「得喇，返埋去做野。」
 
跟住我隱約聽到Patrick同Cindy講我個人好冇交帶，搞到佢係咁煩到其他tutor果啲野之類。
 
嗰日我搞到好冇心機，睇住答案對功課都對到錯晒。
 
因為老細真係好好人，每次有咩錯佢都冇當面出聲屌過我，又比心機教我做野。我愈諗就愈灰。
 
我死死氣行返入B班班房。
 
「Mr. William, 你唔開心啊？ 」Mary見到我垂頭喪氣就行埋嚟安慰我
 
「冇，繼續做野喇。」
 
估唔到一個細路女都識主動關心人，有時大人明知大家都需要情緒安慰，但就死都要扮冇事唔渲泄情緒，當有大事嚟嘅就壓力爆煲。


 
嗰日班房氣氛好死寂，學生可能留意到我冇乜聲氣，所以佢哋唔敢傾計。
 
星期四好彩嗰日Patrick冇返，Cindy見到我仲係死咕咕咁，就講笑話腦細成日都發火:「it is piece of cake～」
 
Cindy講完之後真係喺雪櫃攞咗件西餅比我食，聽完佢咁講心情的確舒暢咗啲。
 
食完之後我返去classroom B做野順便同Michael講聲多謝。
 
我向佢九十度鞠躬:「唔該晒你幫我頂咗今個星期五。」
 
Michael好好先生上身:「好小事姐，你有冇野啊，我都有比腦細鬧過，唔洗咁上心。」
 
唔知點解呢刻覺得同Michael距離好遙遠，佢就好似一道光，我點都唔會追上咁。