我在補習社遇到一個令我難以忘懷的女生。: 二十二、再見

好快就踏入十月中，腦細終於都比我返星期五，咁我梗係記得買漢堡包糖比班細佬啦。
 
「叮噹。」我㩒門鐘。
 
「咔。」補習門被打開。
 
「……hello。」Ellie樣子有啲靦腆。
 
「hello，Miss Ellie. 」我點點頭。
 


之前見到佢嘅時侯，個嘴都係向上翹，但今次見到佢面無表情。
 
咁之後都係例牌對功課，改練習，改默書。
 
Mary、Kelly望到我好驚訝:「點解Mr. William你今日會返嚟嘅？ 」
 
我:「得閒咪返嚟囉，定係你哋掛住Mr. Michael？」
 
Kelly:「唔係呀，Mr. Michael都唔會請我食野嘅。」
 


我聽到即刻扮野:「乜我會請你食野咩？ 」
 
Kelly露齒笑得好燦爛:「我知你會嘅。」
 
「睇吓你乖唔乖喇。」
 
於是每個學生臨走前我都請漢堡包糖比佢哋食。
 
由於今日Cindy話有party，所以傍晚時侯就走咗。
 


到咗七點半，classroom B嘅人已經走晒，classroom A仲有kace同Casper未走。我出去攞練習答案對果陣見到kace打電話叫屋企人接佢走。
 
「喂，請你食包糖好唔好。」我問kace。
 
佢興奮到跳起:「好呀!」
 
「嘻嘻。」佢即刻撕開包裝紙。
 
「同你講樣野呀，Miss Ellie今日成日都㩒住個肚，又成日皺眉，好似好唔舒服咁。」kace一路食糖一路同我講。
 
跟住我即刻諗到樣野！
 
「kace，我落去買啲野先，你媽咪冇咁快到㗎可？ 」我烏低身望住佢。
 
「佢要二十分鐘之後先到呀。」


 
「咁一陣我落去買完野你幫我開門得唔得呀？ 」我好誠懇問佢。
 
「但係Mr. Patrick話學生唔比開門喎。」kace哩個時侯扮扭計，左右擺動身體。
 
我口噏噏:「呀，你條友今日又突然咁醒。」
 
「我唔同Mr. Patrick講佢咪唔知道囉。」我伸出右手手指尾出嘗試賄賂佢。
 
「唔…好喇。」佢思考一陣，然後勾一勾我手指尾，果然細路仔都係容易上當。
 
於是我就落去買咗啲野上嚟，喺我返上嚟果陣，原來同kace媽咪同一架𨋢，但我諗佢應該唔認得我。
 
我心諗:「伯母，你個女真係好生性呀。」
 


一上九樓就見到Kace好醒目咁搵舊木zip住條門罅。
 
你咁醒目下星期真係要請晒成包糖你食。
 
「今日Patrick同Cindy都喺七點走咗喇，kace今日做晒功課，溫咗中文默書。」我同佢呀媽交代佢個女今日做咗啲咩。
 
「哈哈，原來你係呀SIR，啱啱係𨋢唔記得同你打招呼tim，唔好意思呀。Kace佢今日乖唔乖呀。」
 
我保持微笑:「好乖，上堂好少同隔離位講野。」
 
「好唔該晒你，我哋走先喇，拜拜。」佢幫kace攞住個書包。
 
「拜拜。」我揮揮手。
 
Kace匿笑:「拜拜Mr. William. 」


 
佢呀媽走咗之後，我就放咗袋野食喺鮮紅色櫃文件夾隔離，仲要搵張memo紙寫住，「多謝Ellie老師教導，小小心意。」
 
因為就算佢對完練習或者未對完都會經過嗰個櫃，所以佢一定會睇到果袋野。