我在補習社遇到一個令我難以忘懷的女生。: 二十九、不為人知的辛酸

「……」我唔係好識安慰人，仲要係一個比我大20幾年嘅人，突然間氣氛變得好沉重。
 
佢點起支煙，好大力吸住煙嘴，鼻孔慢慢噴出煙，煙絲慢慢飄向滿佈石屎跡嘅天花。
 
其實我自己對煙味有少少反感，因為嗰陣味真係好難聞，但唔知點解呢刻我望住佢嘅pat羊咩鬚同埋佢失落嘅眼神，我竟然會合埋眼呼吸周圍嘅空氣，嗰刻嘅煙味我唔覺得討厭，甚至喺煙味間了解到佢嘅感受。
 
「支煙喺哩度點起，吐出嘅時侯就消失喺空氣入面，煩惱只可以收埋喺依度。」佢望住牆講。
 
我感覺到佢應該唔係煩惱關於錄音嘅野，好似有另外一啲心事，但佢冇講出嚟。
 


可能人大個咗，煙同酒就喺心事嘅最大朋友。
 
臨走前佢叮囑我:「你唔好同任何學生同tutor講我食煙。你返去先喇，如果冇晒學生，你同Michael都放工走人喇。」
 
「ok……咁你行到？ 」我比佢影響到有啲情緒失落。
 
佢企起身行咗兩步樓梯比我睇。
 
返到班房，得返Michael同Cindy喺到。
 


Michael好驚訝:「原來你未走㗎？ 」
 
「未呀，依家執野走，Patrick WhatsApp我話如果你冇野做都可以走喇。」
 
「哦……不過點解你身上咁大煙味嘅？ 」佢身體傾前聞一聞我件衫。
 
「啱啱喺後樓梯dum垃圾，果度好鬼大煙。」我好唔自然咁解釋。
 
「你dum咗半個鐘垃圾？」佢雙眼擘大望住我。
 


「係呀，haha。」我敷衍佢。
 
Michael好尷尬:「……好喇，咁我走先喇。」
 
過多十分鐘我都走人。
 
喺返去搭巴士果段路，我個腦都喺啱啱老細係後樓梯食煙嘅晝面。佢嘅生活究竟承受咗幾多壓力。
 
聲音A:「可能你遲啲都係咁㗎喇，人人皆有困難之處。」
 
聲音B:「你煩惱人哋個煩惱，你自己就冇煩惱咩？ 」
 
聲音B點醒咗我一樣野，由於聽日個星期五輪到Michael返工，即係我有兩個星期冇得見Ellie。
 
點解又會無啦啦諗起佢。


 
喺巴士站等車嘅時侯嚟咗架73B巴士，我竟然下意識上咗去，當我想比錢時，先發現個價錢同480號同689號巴士唔同，但車門已經閂埋咗。
 
我心入面怪責自己:「點解我會痴線到上錯車㗎。」
 
上到巴士上層隨便搵咗個位坐，然後就開始反思自己係咪真係要改一改自己講小大話嘅習慣。諗諗吓野突然個腦突然間陰住陰住痛。
 
我用食指同中指指腹按一按耳仔對上嘅太陽穴，感覺終於好咗啲。