我在補習社遇到一個令我難以忘懷的女生。: 四十一、談月
傾傾吓都差唔多十點，喺海濱散步嘅人都愈嚟愈少。
「行啦，行啦，再坐個屎忽就痛喇。」我用船手佬嘅tone同佢講。
「好啊，行完就返去咯，我呀媽留咗飯比我。」Ellie收拾緊自己嘅物品。
今晚月光好靚，好似掛喺天上嘅一盞燈，可惜係一個半月，旁邊亦冇星星相伴。就好似我以前中學果陣咁，每日都覺得好孤獨，可能關我本身性格孤僻事。
「你做咩望住個月亮呀？」Ellie望住我之後一齊向天上仰望。
「我好似搵到自己咁。」我嘅眼球繼續鎖定喺盞燈。
「你知唔知每個月亮都有佢哋嘅故事？」Ellie企喺我旁邊講。
「唔知啊，願聞其詳。」我望住佢用手輕輕撥一撥自己耳仔。
Ellie突然變得認真:「咳咳……依個係一個好淒美嘅愛情故事。月亮嘅形狀變化都係一個規律，每月嘅頭十日，月亮係一道好淺嘅彎月，隨著日子過去，展露嘅月光就會愈多，好似一對戀人由啱啱相識到拍拖，關係一點點進步；到月中，月亮嘅形狀就會漸漸變成滿月，依個時期就好似一對戀人進入甜蜜期，雙方關係去到哩個階段就到達頂峰；到月尾，月亮又會由月牙變成殘月，雙方進入磨合期，關係開始疏離；最後每個月嘅最後一日，月亮又會消失，一對戀人再冇交集，雙方從此變成陌生人。」
我嘲笑佢:「你似講緊經唔係講故事喎。」
「妖！講啲咁感性嘅野都唔知你有冇聽。」Ellie突然發脾氣搣我手臂。
「呀！好撚痛呀，我投降喇。」我喺公園中心狂嚎。
「下次仲會唔會窒我？」佢更加大力搣我。
「唔會，以後都唔會呀！」我嘗試擺脫佢隻手。
「算你乖喇。」Ellie放開手。
我比佢搣完之後隻手臂紅晒，不過我喺佢面前梗係扮唔痛啦。行行吓我哋見到有半個人咁高嘅聖誕老人同幾隻鹿仔。
「不如我哋一齊影相？」Ellie遞咗佢部手機比我。
「做咩啊？」我冇接住部手機。
講真毒撚邊會自拍，一開前置鏡頭見到自己個樣仲邊有心機影相。
「影相囉！你揸機自拍。」
「我…我唔識自拍喎。」我嚇到標晒汗，因為我覺得自拍都係一個social嘅技能，係需要學習。
一睇就知, 我係完全唔識自拍, 當我揸機嘅時侯, 就會變成一座銅像, 全身變得彊硬無比。
「你唔識自拍點溝女啊，啲女仔揸機影相會顯得面大㗎！」Ellie已經企咗喺我身後。
佢咁講又好似幾有道理，加上比佢串我唔識溝女，激起我嘅鬥心，我鼓起勇氣開咗自拍鏡嘗試伸長隻右手，但就算我點就角度都好，都唔可以影晒所有景物同人入鏡頭。
「你再揸高少少咪得囉。」Ellie開始唔耐煩。
搞咗好耐終於就到個角度，但我揸高少少隻拇指又㩒唔到影相個掣，㩒音量掣影相果陣就手震。
「你唔得都係比我嚟喇。」Ellie嘗試攞翻自己部手機。
「唔得，我點都要影到一張收貨嘅！」
好彩當時我嘅固執係有用，下定決心好快就影到一張冇炒車嘅相。不過果張相我笑到成個傻西咁。
「你真係笑到成個智障咁呀～haha。」Ellie望住張相喪笑。
「……」我唔知比咩反應好。
「你有冇ig? 我想post張相上ig story。」
其實阿腳之前都有問我做咩唔開個ig，就算冇咩人follow，都可以上ig睇吓女呀，何樂而不為呢。但我又唔影相，睇女上咸網都有得睇啦，而且有WhatsApp公事私事都可以聯絡到，開ig真係好多餘。
「冇啊。」
「吓！你冇ig？你係咪古代人嚟㗎？」Ellie十足十肥媽講「痴線㗎」嘅語氣。
我好輕挑講咗句：「有咩咁出奇？」
「我幫你影張相，你翻去用張相開翻個account喇。」Ellie叫我企喺鹿仔同聖誕老人中間。
「咔擦。」我努力撐起面部肌肉維持笑容，做咗個最經典嘅Yeah手勢。
「嘩～你個樣做咩死老豆咁款，試吓笑得開心啲啦。」lily講完之後做出調皮鬼臉。
佢扮鬥雞眼嘅樣突然戳中我嘅笑點，喺佢整蠱之下,我嘅嘴角已經輕輕上揚。
「咁咪靚仔囉。」lily捉緊機會按下快門。
「點啊，你覺得影成點啊？」佢打開圖片庫比睇返嗰三張相，我睇到三張都影得差唔多就求其揀咗第一張相。
Ellie好滿意點頭:「我都覺得影得幾好，影到你個人幾高，哩張相你仲要係笑得表較自然，就換哩張做ig icon喇。」
「你也不想這樣 但別講出真相 各自纏著你才會馨香。」Ellie手機鈴聲播住應該係容祖兒嘅歌。
原來Ellie鍾意容祖兒。
「得啦，我返緊嚟啦，有冇留飯比我？」
「嗯，好喇，拜拜。」
「屋企人催啊？」我等佢收線後講。
「係啊......」Ellie顯得有啲唔好意思。
「咁返去咯。」我雙手插袋, 輕輕從口中呼出一口氣。
「嗯。咁你返到去記得開ig喎！仲要第一時間加我。」Ellie行行吓突然停低，雙手扣在手袋。
「得啦，唔好成個阿媽咁囉嗦啦。」我將條頸伸後，做出一個好摟打嘅表情。
「都係唔好啦，我依家望實你，快啲同我整！Ellie一手搶走我部手機, 然後好似追債咁, 不停問我嘅個人資料。
「你有車到啦。」我提醒佢一㗎689號巴士喺路口出現。
「咁之後嗰啲野你自己填埋啦。」Ellie將手機還比我，匆忙地走到巴士站排隊。
「得啦，拜拜。」
「拜拜。」