我在補習社遇到一個令我難以忘懷的女生。: 五十、新年新氣象（二）

「你係咪諗住買完套衫日日都咁着？」阿腳飲住杯低糖綠茶問我。
 
我理所當然:「梗係喇，買完唔着咪好晒。」
 
阿腳嘆氣:「你見啲女仔係咪日日都着裙？」
 
「都有㗎，我見有啲靚女一年四季都着裙好似唔驚凍咁。」我嚼緊嚿雞翼答佢。
 
「咁你靚唔靚仔？」佢好似比我搞到好頭痛。
 


我好疑惑:「你想講咩啊？」
 
阿腳語重心長:「靚仔或者靚女着咩衫都無咩所謂，因為人哋目光都會放喺佢個樣到，如果一個普通人想surprise人最簡單一定從衣著入手喇。」
 
我摸一摸下巴:「你講野好似幾有道理！咁我應該點做啊大師。」
 
「一陣買多條褲喇，咁最少有兩個組合，而且又可以襯吓其他衫。」
 
「又買？唔想攞住袋野行嚟行去。」其實我原來打算食埋個tea就返屋企。
 


「唉～Ellie都想見到你靚靚仔仔㗎~」佢又喺度扮Ellie。
 
「屌你！我覺得自己依家充滿力量，大師請指點小弟迷津。」我好似撒亞人瞬間充滿力量！
 
之後阿腳帶咗我去一間專賣牛仔褲嘅鋪頭。
 
「牛仔褲最百搭喇，好難襯得唔好睇。」阿腳攞咗幾條褲喺手到比較。
 
唔知係咪我哋睇得太耐都冇試，有個好高大嘅sales行咗過嚟。
 


「有冇睇啱邊款？」sales用好雄厚嘅聲線問。
 
「我行開一陣睇自己野先，你慢慢睇。」阿腳放低條牛仔褲離開店鋪。
 
我有啲緊張問:「Um……有冇話邊啲推薦吓？」
 
「睇吓你個身形先。」個sales行咗去我後面攞咗把尺度一度我隻腳嘅長度。
 
「你個身形比例接近四六身，不過隻腳偏幼，Regular fit顯得隻腳冇咁幼，而依家冬天着深色會比較大路啲。」佢攞咗條深籃色有少少窿嘅牛仔褲比我。
 
「……」我聽到一頭霧水。
 
「你攞入去fitting room試吓。」佢幫我打開道門。
 
我低著頭:「好……」


 
我着上身，發現個質地真係好舒服，幾貼皮膚但唔會悶住悶住，而且都幾有特色。唔知係咪因為果日着咗件黑色冷衫，發現望落幾自然。我仲要喺fitting room擺pose影咗幾張相留底，原來自己都唔係咁差，唔知fitting room啲鏡同普通果啲係咪有分別。
 
普通人買衫通常只要夠70%鍾意就會買，但今日我覺得自己有90%鍾意，所以試完我就即刻買咗。
 
買完就諗住行出門口打比阿腳問佢喺邊。
 
「嘩，行咗個圈你就買完喇。」佢喺隔離鋪頭行過嚟。
 
「洗唔洗比你過吓目？」我準備喺個袋攞條牛仔褲出嚟。
 
「你咁有信心唔睇喇。」
 
之後我哋就各自返咗去。果晚差唔多買咗成千幾蚊，一返到去就攞晒啲衫去襯，
好彩都覺得不過不失姐。


 
由於我屋企得一廳一房，所以我要換衫嘅話就只可以喺廳換。
 
阿媽喺房行出嚟笑到嘴角含春咁:「嘩～邊個搞到我個仔要買衫呀。溝女呀？」
 
「新年買新衫姐，之前返工有錢咪洗吓囉。」其實阿媽一早講中，不過就係唔想比佢當面踢爆我。
 
「阿媽都做過後生，明嘅，邊個女仔呀？。換個斯斯文文嘅形象幾好呀，唔洗日日着同一套衫。」阿媽好似老懷安慰咁。
 
「返工返學着姐～」我繼續迴避呀媽嘅問題。
 
「唉～唔阻你發姣喇，我返入房睇劇先。」