《足印》-從幼稚園開始，對你的心意原來一直是愛情-: 序章

「仲有…盧樂天。你哋四個，放學留一留低去103室，留堂。」
 
「知道…」該死，還是不合格嗎…
 
「好，咁今日呢堂就係咁多，落堂。起立。」
 
「Goodbye and thank you Mr. Yeung.」
 
剛剛下課的是數學科，是我最討厭的科目。討厭的原因我自己也不太清楚，就像是先有雞蛋還是先有小雞的問題一樣，我也不知道自己是因為討厭數學而成績差，還是因為數學成績差而討厭這個科目。
 


怎樣也好，今天要留堂…先去跟她交代一聲吧。
 
「阿柔。」我輕拍那個正在跟朋友聊天的女生肩膀。
 
「嗯？天仔，做咩啊？」她回過頭來答我。
 
「冇啊…」我撓撓頭，有點不好意思的說：「我俾楊sir罰留堂啊，畀條鎖匙你先，你放學返屋企先啦。」
 
「喔~又俾人罰，上堂唔專心啊你！」她一邊甜笑著、一邊用小食指輕碰我的鼻尖。
 


「唔係啊…我估係我個數學補測又唔合格，所以先要留堂架啫…」我把家中鎖匙放到她手上，「諗住今次應該可以合格架嘛…」
 
「哈哈哈，天仔你仲係咁，對數學咁唔擅長都有嘅你！」她接下我的鎖匙，「今晚幫你補下習啦~」
 
「你唔想洗碗咋~鬼馬呀你…」我看一看手錶時間，發覺小息快結束了，「我返班房先喇，晏啲見。」
 
「拜拜~」她輕推了我背脊一下，便回過頭來繼續跟她的兩個好姊妹聊天。
 
「哎唷唷~」其中一名姊妹托了一托眼鏡，「你哋發展得咁快架咩~」
 


「仲畀埋鎖匙你上人屋企喎~」另一名姊妹也在帶點奸笑的和應。
 
「哎呀呀，你哋又唔係唔知我同天仔係青梅竹馬，」她雙手各放在兩位好朋友肩上輕輕的搖著，「好心你哋咁大個人就唔好咁多幻想啦！」
 
走到班房門口的我眼角瞧到這個景象，彷彿回想起一點童年時的回憶，我輕輕微笑一下，便慢慢走回自己班房。
 
對了，還未作個自我介紹。我叫盧樂天，今年16歲，正就讀中五。沒有特別嗜好，沒有甚麼優點，也沒有甚麼一技之長；成績中等，討厭數學。簡單來說就是個普通的宅男？
 
剛剛接下我鎖匙的女生叫林芷柔，跟我從小便認識，由幼稚園到現在中學都跟我就讀同一所學校，可以說是人們口中常說的青梅竹馬吧？跟我的性格特點很不同，她人相對外向，成績很好，擅長的事也有很多，說是十項全能也不誇張。啊…對了，還有就是人很漂亮，是我們級中的三大級花之一，另外兩個就是剛才阿柔的姊妹。
 
「阿天啊…」我一回到自己座位，坐在我一旁的男生就向我問道：「你到底點樣埋到嗰三個女神堆架…」
 
「玩嘢咩阿揚…你又唔係唔知我同阿柔由細識到大…」每一次察覺到他內心的抱怨，我都總是回覆這一句，都快變成一句敷衍專用的對白。
 
他是王梓揚，由中一至現在中五都跟我同班。我們學校分班制度簡單，不論初中高中都是根據成績來分班，A班精英班，如此類推。這傢伙連續五年都跟我一樣是C班，可見他的成績跟我一樣中中挺挺、不太高也不太低。可能因為成績相近，加上五年來間中的相處，不知不覺間成為了我的好兄弟。


 
「唔係喎唔係喎…」阿揚鬼鬼祟祟的看看周圍，確認過沒人在附近才伸頭向我耳邊輕說：「我啱啱去廁所經過A班見到你畀咗條鎖匙佢架喎，仲唔係想約人上屋企…！？」
 
「痴撚線。你都知我阿爸長期喺大陸返工架啦，咁今日阿媽又約咗親戚食飯，佢琴晚咪叫阿柔嚟同我一齊食囉，」我稍微用力拍在阿揚後腦，「唔好諗多。」
 
「唉，阿天你就好啦，有個女神青梅竹馬，我都想有一個啊…你識唔識劉佩詩啊？嗰個林芷柔個姊妹呢，佢笑起上嚟好甜架，如果我同佢都係青梅竹馬嘅話你話幾好呢係咪啊？」
 
「……」
 
神經病。
 
「鈴鈴鈴鈴鈴…」最後一課的下課鐘聲終於響起，總算可以放學了。…本應是這樣。
 
「呵~~終於放學，悶鬼死人。喂阿天，執嘢走咯。」打著呵欠的阿揚，伸著懶腰向我說。
 


「頂你啊，我要留堂啊。」我又稍用力的送他一肘，「你走先啦，聽日見。」
 
「係喎…啱啱瞓到冇咗回事添，sor啊！咁我走先，聽日見。」
 
「嗯，拜。」如是者，我收拾好書包後也向103室的方向走去。
 
走到樓梯口的時候，給我巧遇到同樣正在離開的阿柔和她的兩位好姊妹。…她們真的是「糖黐豆」嗎？我每次在學校範圍內見到她們其中一個，另外兩個必定在旁。
 
「唷，阿柔。」我輕拍她的頭。
 
「天仔？你留完堂喇？」…這個回應我倒是沒想過。
 
「緊係唔係啦，而家先準備去咋。你自己一個返屋企都小心。」我苦笑一聲。
 
「得喇得喇~成日當人哋係細路女！」阿柔又再用自己的小食指輕碰我的鼻尖，「走先喇我！你留完堂都快啲返嚟啊天仔，拜拜！」


 
「知喇，拜拜。」向她揮手道別後，我都轉身面向103室，準備入內。
 
「哎唷唷，拜拜喇男朋友仔~」「放心啦，我哋幫你睇實柔柔，一定安全！」
「哎呀你兩個好煩啊快啲行啦！」
 
……你們三個有顧過我感受嗎？
 
與三大級花同時近距離對話……會令我成為中五所有男生公敵的。
 
「楊sir。」我輕力敲敲門。
 
「入嚟。閂門。坐底。」裏面傳出楊sir的聲音。
 
「係…」我坐在椅子上，等待楊sir下一個指示，十足一個到大公司面試、聽候發落的應徵者。


 
「盧同學，你係第一個到。」他輕輕托了一托眼鏡，「知唔知點解我要叫你留堂？」
 
「啊…因為…數學補測唔合格？」應該…只有這個原因吧？
 
「嗯。相信你都知道DSE達標要有至少3322嘅成績，你都已經中五，唔係得返好多時間。如果盧同學你仲想要一張大學嘅基本入場卷，數學嘅問題真係要好好直視。」楊sir邊說邊拿出一張試卷，「今日嘅留堂做完佢就走得，不過至少要有50%，唔過嘅話聽日繼續留堂。」
 
「知道楊sir…」…殺了我吧。
 
「咁就即刻開始，唔限時，open book。努力。」
 
我一翻開試卷，發現可以毫不思考便懂得填上的，就只有我的名字和學號。我抬頭一看時鐘，再低頭一看書本中密密麻麻的各種算式，心中粗略估計了一下要逐條題目嘗試代入公式的時間。…甚麼不設時限，應該不到六時都做不完吧。
 
在我一邊苦惱答題時，我的另外三位留堂戰友亦相繼到達，並在楊sir的指示下與我一樣開始答題。縱使我們的抵達時間都不同，我相信此刻的我們四人還是有個共通點，就是面對這份該死的試卷的心情。
 
…老實說，這是甚麼鬼啊。
 
經過一段時間的一番掙扎，我總算把整份考題都完成，還反覆檢查了一兩次，盡量減少明天要再來這裏答題的機率。可能因為我最早到達吧，我是最先走到楊sir桌前交卷的一個。
 
「嗯，56%。做得幾好，聽日唔洗再留堂。」楊sir輕拍我的肩膀，「下次數學測驗加油，盧同學。」
 
「知道楊sir。」我跟他點頭示好後便起行回家了。
 
該死的數學題，真的一直做到六點才完成…