《足印》-從幼稚園開始，對你的心意原來一直是愛情-: 03
「我頂…原本諗住放學去練波架嘛…」阿揚一重新坐下便開始了他的抱怨，「個死老嘢又會咁啱叫中我都有架…」
「細聲啲…」我苦笑一聲，「俾佢聽到留多你幾日就慘。」
「唉…阿天你都答錯我咪唔使自己一個留堂囉…」…你想我怎麼回答你呢？
「實有機會~」隨便敷衍一句算了。
「鈴鈴鈴鈴鈴…」終於等到你了，美妙的放學鐘聲。
至於阿揚…抱歉了，你就切身體會下我於昨天同樣時間的心情吧。
「星期五最後一堂咁樣同我臨尾香，個死老嘢真係…」哈哈，他還在抱怨著，「唉頂…我去103先喇，走先。拜~」
「拜拜~星期一見。」說著我也拿起書包，準備回家。
「啊…盧同學？唔好意思啊…想問下你得唔得閒？」…誰？
「嗯？」我回過頭一看，這男生是我班的，好像姓潘？但我與他明明不認識…「叫我？」
「係啊…」他撓撓頭，「唔知你記唔記得琴日留堂呢…我係第二個到嗰一個啊，我叫潘進峰。」
有點印象。
「記得~搵我做咩？」
「係咁嘅，我想問下你啲數學係點樣進步架？雖然咁講可能有啲冒犯…但係琴日我哋明明先因為補測唔合格而要留堂…係囉，你明唔明我想講咩啊…？」他有點不好意思地問道。
「傻啦，唔洗覺得唔好意思，但係我數學依然仲係好差喎，哈哈…」自知之明我還是有的。
「話唔係咁講啊盧同學，啱啱你俾楊sir叫出去做條唔簡單嘅題目，見你諗咗一陣就識做，所以我想請教下你短時間內令數學進步嘅方法同秘訣。唔知你得唔得閒呢？」
「喔~可以嘅，不過講真一句唔好對我咁有期望喎，我都係個數學白痴…」見他盛意拳拳，自己又沒甚麼急事，答應他好了，「啊仲有，叫我阿天就得，唔好太見外。」
「好，阿天你都叫我阿峰就得。」
我和阿峰一起走到飯堂的長桌，坐下便開始討論有關數學的問題。阿峰的數學資質跟我差不多，老實說就是和我一樣是個數學白痴。可是不得不說，他認真的態度還是令我頗為尊敬的。可能因為這個原因吧，我也盡自己所能認真的講解，希望他可以有所得著。…而且總不能間接的誤人子弟吧。
阿峰一直好學的發問，我也逐一的回答。為甚麼我懂得回答？因為昨天阿柔跟我所說的種種技巧和解題方法我也是有認真聽入耳的，始終儘管我不想承認，數學科也是必修科之一呢…而且我也不可以白白浪費阿柔的一番心意。
「總之都係老套一句，記住乜嘢情況要對應返邊啲公式，再多啲實戰、做多啲數，我估點都會有啲基本嘅進步嘅…」我一手拍拍阿峰肩膀、一手繼續執拾文具，「一齊加油啦。」
「真係唔該晒你…用咗你咁多時間添，」阿峰有點不好意思的對我說，「唔好意思啊阿天。」
「唔好咁講，大考都就到，而且兩個人討論點都好過一個人自己溫習嘅~」老實說，我也獲益不少呢。人們常說小組的學習進度相比起個人的會高出不少，真是說得沒有錯。
「好…係呢阿天，方唔方便同我交換個電話？」阿峰收拾書包途中突然問我一句，「咁樣如果我喺屋企唔識做數都可以問下你呀嘛，哈哈。」
如是者，我便跟阿峰交換了電話號碼。可能因為自己為人自卑內向，我平常其實很少會願意跟其他人交換聯絡方式。手機的聯絡人除了父母之外，就只有阿柔阿揚等人，加起上來都不過十人。只是剛剛跟阿峰兩人討論數學題的兩個多小時相處中，可以看出他認真希望數學取得進步的求學態度。我個人從心底裏尊敬這類人，可能因為自己都還未可以完全做得到吧。…而且，作為剛認識不久的朋友，他是少有不對我抱有奇異目光的人。
「係呢阿天，你急唔急住返屋企？唔趕嘅話請你食個下午茶？」我和阿峰剛踏出校門不久，他便向我問到。
「呃…我唔趕時間啊，但係唔係咁好意思喎。」
「嚟啦，當係你幫咗我一個大忙，等我簡簡單單請你食餐飯啦，」阿峰搭著我肩膀，「下午茶餐好平架啫，你唔賞面我就真係唔好意思喇…」
既然是別人一番心意…那就恭敬不如從命吧。
「嚟兩位靚仔~兩碗墨丸河，兩杯凍奶茶~」
「唔該~」阿峰笑著回應伙計，繼續跟我說：「阿天你試下，呢間茶餐廳我成日嚟，又抵食又好食。」
味道真的不錯。
我和阿峰雖然剛相識不久，但很快便熟絡起來。大概是因為同是數學白痴，加上我們之間都有共同話題，還有最重要的：大家都是男人老狗的關係吧。我們邊吃邊聊，於旁人眼中就像相識多年的好朋友一樣。
「哎食飽…係呢阿天，其實同班咁耐我想問…啊！」阿峰話說到一半，突然小聲叫了一下。
「Oh no, sorry! Are you okay?」原來是一個身材姣好的外國美女撞到阿峰了。呵呵，某程度上他也挺幸運的吧？雖然我對外國女生沒興趣就是了。
「It’s okay, don’t worry about it. I’m fine.」阿峰說罷則繼續面向我，繼續剛剛的問題：「係呢阿天，其實同班咁耐我有個問題想問下你。」
…如果那個金髮美女撞到的是阿揚，以我認識的他，他不嘗試問出美女的電話也至少會請求跟她握個手，說甚麼外國人大多思想開放、不會介意。但面前的阿峰卻完全無動於衷…難不成他喜歡男生？
「你即管問咗先，不過我未必答~」真的，別向我告白…我喜歡女生。
「哈哈，其實都唔係咩事。只係想問下你面上嗰噠嘢係咩嚟架？」阿峰一手托著頭，彷彿一副正在沉思的樣子，一手指著我的右邊臉，「墨痣都冇咁大粒喎…」