《足印》-從幼稚園開始，對你的心意原來一直是愛情-: 05
「咪玩，邊有可能夠你高分，傻妹。」我學阿柔的招牌動作，輕力戳了一戳她的鼻尖。
「哈哈，天仔努力啲可能得呢~」阿柔說著慢慢的站起來，向廚房方向走去，「我都係個普通人嚟架咋，又唔係超人~」
「咦，阿柔你去廚房做咩？」都差不多十點，她應該已經吃過晚飯才對…
「唔話你知~」阿柔對我單一單眼、伸出舌頭笑著說：「天仔繼續做功課，唔準入嚟偷睇啊！」
真是的…古靈精怪。
由於阿柔進了廚房不知道在幹甚麼，沙發上也只餘下我自己一個在做數學題。與剛剛相比，最大的分別無疑是答題的速度。要是阿柔在旁，每當我遇到難題時，她都會給我一些提示，一步一步的引導我去正確的答案；而現在我只能自己慢慢嘗試不同的公式，只望可以幸運的猜中解題方法，好讓我盡快逃離這個數字地獄。…說來難為情，這道題我做了差不多二十分鐘才終於完成。
「呼…」我深深呼出一口氣，繼而大字型的躺在沙發上。總算解脫了。
「做完喇天仔？」阿柔應該聽見了我的深呼吸，從廚房中小聲喊了一句。
「係啊…做咗好耐終於做完…」真的累死人。
「哈哈，辛苦你喇天仔~」阿柔繼續由廚房內說：「你抖陣先啦，好快有得食！」
食？傻妹在做些甚麼甜品嗎？
「咩嚟架~」
「哎呀呀，等多一陣你咪知囉，唔準心急！小驚喜嚟架！」阿柔笑著回應。
老實說我本來正準備站起來入去瞧瞧阿柔到底在弄些甚麼，不過既然她說是個驚喜就打消了這個念頭，繼續躺在沙發上休息。免得讓阿柔不開心吧。
「登登~」過了一會兒，廚房中再次傳出阿柔的聲音，「搞掂喇！天仔你合埋眼先！」
「哈哈，乜嘢咁大陣仗啊~合埋咗喇！」奇怪，我還未生日呢。
「喀…喀…」這是…瓷碗放在桌上的聲音？
「天仔，擘大眼睇下~」阿柔一手輕輕搖著我的肩膀。
…是芒果布甸！我自小便很喜歡的一道甜品！
「嘩…」我雙眼像發了光一樣，「點解冇啦啦整畀我食嘅，我記得阿柔你話過工序好麻煩架喎…」
「嘻嘻嘻…當係獎勵天仔你呢幾日嘅改變啦！」阿柔把一匙布甸放到我口邊，「嚟，試下味先！」
芒果酸酸甜甜的味道刺激著我的味蕾、布甸入口即溶的快感充斥於我的大腦，我又再一次品嚐到阿柔製作的這些只應天上有的天宮佳餚。真的…阿柔你到底為何如此擅於烹飪呢？
「嘩，好好味啊！」完全沒帶半點虛假。
「嘻嘻，天仔鍾意食就好~」阿柔一邊笑說著、一邊自己嚐一口，「嗯…！」
我見阿柔吃得一臉笑容，臉頰鼓起兩邊、閉著眼睛滿意的點點頭，使我想起了一些童年回憶。當時還只有三、四歲，還在就讀幼稚園的我和阿柔，一臉幸福的樣子、互相餵著彼此吃著林姨姨所製的芒果布甸。那個天真無邪、不用為學業苦惱的童年時代，真的很懷念呢。
「阿柔，我都餵你食。」我捏捏阿柔鼓起的臉頰，微笑的說。
「吓！？」阿柔的臉起初變得紅紅的，不過後來也甜笑著的點點頭，「嗯！」
我們就這樣你一口、我一口的互相餵著大家吃布甸，童年時的情景彷彿與現在重壘。
「好唔好食啊？」我拿著紙巾替阿柔擦擦黏住嘴角的布甸漬。
「哎呀呀，又當人哋係細路女！」阿柔雙手撐腰、嘟起嘴唇的說：「哼，我整嘅緊係好食啦！」
「係喇係喇，柔柔大廚~」我摸摸阿柔的頭。
「嘻嘻，見天仔有改變先獎勵你咋~」阿柔用小手指輕碰我的鼻尖，她的招牌動作。
「係喎係喎，你係指啲咩改變啊？」剛剛太專注於美食當中，都忘記了問阿柔的意思。
「呵呵…咪指天仔你嘅上進心囉！」阿柔甜甜的笑著，續說道：「你呢兩日擺喺數學嘅心機我有睇到架！雖然你啊，可能好多時都係求其代條公式入去解題就算，不過我睇得出你至少有擺心機落去嘅！呢啲細微嘅小事可能你自己都冇留意到啦，但係作為旁觀者嘅我係睇得好清楚架！」
「喔…」原來阿柔是這樣想的…
「哈哈仲有仲有~今日放學我見到天仔你同個同學落咗飯堂討論數學喎！呢個係好習慣嚟架，多一個人同你一齊思考、一齊分析、一齊討論，咁樣學習成效會高好多架！」阿柔雙手輕輕捏著我的臉頰，笑說：「呢個好習慣要盡量保持住啊，知唔知道啊！」
「哈哈，原來你放學見到我架？」我躺在沙發上，「我盡量試下啦~你知啦，我咁懶~」
「嘻嘻，可能今次係天仔你轉變嘅第一步呢~」阿柔也躺在沙發上，一臉認真的說：「一個人要轉變係好難架，尤其係要嘗試踏出未知嘅第一步。不過啊，只要勇敢踏出呢一少步，咁就一定會慢慢有所改變嘅！」
「你講得咁認真，我就即管努力試下啦~」我笑著拍拍阿柔的頭。
「你係至好啊！有咩唔識都可以問我架，我會盡力幫你架~」阿柔笑得甜甜的說。
「係嘅林老師~」
「又口花花啊你~」阿柔又用小食指輕碰我的鼻尖，「天仔你抖陣先啦，我去洗碗先。」
「我洗，」我捉住阿柔的手，輕輕將她拉回沙發上，自己則站了起來，「阿柔你玩陣電話抖陣先。」
「…」阿柔呆了一呆，隨即打趣的把手背放在我額上，「嘩天仔你唔舒服啊？發燒？」
「緊係唔係，」我輕力彈了一彈阿柔額頭，回身走向廚房，「你啱啱整布甸辛苦。」
「呵呵~世界變喇，天仔都變得似個男人呢~」阿柔自己默默的甜笑著。
嘗試踏出第一步、嘗試作出改變…是這樣嗎？