《足印》-從幼稚園開始，對你的心意原來一直是愛情-: 16
群組：~三人姊妹花~ 成員：你，張曉彤，劉佩詩。
林芷柔：「詩詩彤彤！關於星期四個露營呢，我問咗天仔意見，佢話佢都有興趣喎！不過佢話我哋三個女仔，佢就得一個男仔所以怕羞喎~所以我建議佢都叫兩個朋友一齊去！唔知你哋兩個會唔會介意呢？ʕ •̀ o •́ ʔ」21：37
林芷柔：「阿詩阿彤你哋如果真係介意就照直講，唔洗勉強。(天仔字)」21：38
張曉彤：「我冇問題啊柔柔~」21：42
張曉彤：「天仔都唔使擔心，我唔介意~」21：42
劉佩詩：「柔柔我都OK！天仔唔使諗多，我都真心冇問題~」21：44
林芷柔：「愛你們！‧ω‧」21：45
「嗱！自己睇！」阿柔把手機遞到我面前。
「喔…係唔係真係唔介意架…？」我仍有一點擔心。
「緊係啦，」阿柔拍拍我的頭，「都話我哋好隨和！」
「好啦好啦，我聽日返學再問下我兩位朋友。」我做出一個OK的手勢，同時問道：「係喎，我哋去邊度露營？」
「東龍島營地！」阿柔舉起大拇指，「我哋已經抽中咗個營地架喇~」
「九龍島營地？」…九龍半島？
「東龍島啊傻佬！東南西北個東！」阿柔戳住我的臉頰說：「蠢~」
「哈哈，啱啱聽唔清楚添…」我邊笑著邊問：「係呢，你啱啱話抽中咗…？營地要抽架咩？」
「係啊，嗰度有十個政府營地，因為有好多露營人士，要抽中先有得喺嗰度紮營架~」阿柔一本正經的向我解釋道，「如果抽唔中就要去隔離嗰個大草地度紮營架喇，不過就會多啲人、地方迫啲，可能冇咁舒服咯~」
「喔…」原來是這樣的。
「係喎！記得同你朋友講，叫佢哋唔洗特登買帳篷喎。」阿柔提醒我，舉著大拇指的說：「因為彤彤會帶兩個帳篷去，佢成日同屋企人露營架，所以有兩個帳篷！」
「明白明白，咁仲有冇話要帶啲咩咁架？」我問。
「等我諗諗先吓…」阿柔想著想著就伏了在我的肩上，「乾糧同水就唔少得啦~仲有就係要自己帶枕頭同棉被，又可以帶啲公仔麵，再買啲食材等等…仲有燒烤包同燒烤叉就可以嗰日先去買…」
「喔…咁仲可以帶埋啤牌同羽毛球之類去，可以用嚟消閒~」
「醒目喎~我一時間都醒唔起添！」阿柔又捏住我了我的臉頰說。
「使乜講。」我也輕輕彈了阿柔額頭一下。
待老媽洗完碗洗完澡出來，已是大約十時半。我們三人一起坐著沙發上，老媽在看電視，我和阿柔則是在看手機。雖然彼此都沒有常常發出聲音，卻有一種窩心的感覺。彷彿…我們就是真正的一家人一樣。
由於林姨姨林叔叔二人常年在外國工作，年紀還小的阿柔自小便經常寄宿於我家中。我老爸跟林叔叔是自小的好兄弟，因此林家也很放心的讓阿柔寄宿，而我家亦一直十分歡迎。
小時候，為了讓還是小孩的我和阿柔能夠有充足的睡眠，老媽總是要我們十時前上床睡覺。…雖然正確來說是要阿柔上床睡覺，因為我是睡在舖了床褥的地上。
那個時候的我們星期一至五早午半天都用了在上學，接近黃昏的時候則會一起坐在沙發上做功課，晚上吃過老媽製作的晚飯後都會像現在般一起躺在沙發上玩耍。當老媽都洗完碗洗完澡出來，她也會坐上沙發看電視。
可能因為日子久了，我們都習慣了三個人這樣的一起躺坐在沙發上。縱使大家都各自專注於自己的事、沒有多發聲，卻不會感到尷尬，取而代之的反而是這一種窩心自然的感覺。
「呵…」我邊伸著懶腰、邊打了個呵欠。
「攰就早啲瞓啦，」阿柔聽到後便戳了戳我的側臉，「傻佬~」
「未攰…晏多陣…」我還想看一會手機呢。
「聽話啦，今日咁早起身~」阿柔一手抽走我的手機，「瞓咗晏覺都唔代表唔會攰嘅~」
「畀返我！」說罷我便使出一式太極擒拿手！
「擋！」阿柔也馬上使出一招四兩撥千斤，敏捷的撥開我的攻擊！
「唉。」老媽在一旁苦笑一聲，心中像是在說著一句「冇你哋兩個咁好氣~」
跟阿柔胡鬧了一輪，本來還未太疲累的我都開始慢慢感到疲倦，又打了一個長長的呵欠，阿柔則在一旁取笑著我。
「都話咗你攰架啦~又唔聽我講去瞓覺~」阿柔捏住我的臉頰說著，說罷自己也打了一個呵欠。
「你自己咪一樣~」我也學阿柔輕輕的捏住她的臉。
「所以我而家就去刷牙準備瞓覺~」阿柔邊說邊站起來走向浴室，「唔似得你個傻佬明明又攰又眼瞓都唔去瞓~」
我苦笑一下，便繼續躺在沙發上，打算等阿柔出來後便進去刷牙梳洗。
「呵呵，你都會開始改變呢。」一旁的老媽突然說道。
「嗯…？你指…？」我不明所以。
「我講緊你自身嘅轉變啊。」
「哈，冇乜人可以叫得郁你個仔我架喎。」我這麼懶惰。
「有一個嘅，」老媽微笑著說：「你自己唔知啫。」
「下話。」我淺笑。
「天仔！我刷完喇，到你喇~」浴室內傳來阿柔的聲音，「我返房瞓先喇~」
「嚟~」說罷我也動身走向浴室。
老媽你也真是的，你說的是誰我又怎會不知道呢？
作為母親的你都對我的懶散沒有辦法，那個作為年幼知己的她卻可以。
不過，大概也只有她一個可以做得到吧。
對吧？阿柔。