《足印》-從幼稚園開始，對你的心意原來一直是愛情-: 20
我從露營營地慢慢往洗手間的方向走去。兩者之距也不是很遠，僅僅相隔一條馬路。
我走到洗手間前的公共洗手台，低下頭的洗著臉。
看著鏡子中反照著的自己，我才發現剛剛自己一直在大力的喘著氣。
我走到一旁的一排椅子坐下，看著自己的雙手，正在微微的顫抖著…
…到底這是甚麼感覺？
「臉色好差喎，苦口苦臉咁。」…誰？
我轉頭一看，發現是阿彤。
「喔…阿彤你都嚟去廁所…？」我勉強擠出一個微笑，問。
「同佢哋講就係，」阿彤笑說：「我係嚟睇下你。」
「呃…睇我…？」我不明所以。
「你啱啱好奇怪。」阿彤直說。
「呃…有咩奇怪…？」
「見到柔柔同阿峰傾計唔開心呢？」阿彤說罷便坐在我旁邊。
「呃…邊有…」我撓撓頭。
「真係冇？」阿彤把頭伸到我面前問。
「呃…」我的視線無意中從阿彤的雙瞳中移開了。
「穿煲喇你~你講大話嘅時候目光會移開。」…她怎知道的？「我點解會知？正常我就緊係唔會知啦，柔柔有一次同我講架。」阿彤就像讀出我心中所想，續說道。
「喔…」既然阿彤也知道我這個改不掉的小習慣，也沒有必要繼續騙她吧。「嗯…不過唔係唔開心，而係…點講好呢，我都唔係好識得形容…」
「少少唔舒服嘅感覺？」阿彤托著下腮的問。
「…類似。」
「介唔介意講多啲我聽？睇下我幫唔幫到你？」阿彤搭搭我肩膀，「放心喎，我唔會講出去。」
我見阿彤真心的想幫助自己，也就把自己的想法一一告訴她。包括自己對青梅竹馬的想法，以及每次看到有男生向阿柔告白時內心中的不安。
「就係咁喇…」我嘆了口氣，「我到而家都唔係好明白到底呢種係咩感覺。」
「嗯…」雖然阿彤剛剛一直盯著地上看，但我感覺到她有在用心的聆聽。「我可唔可以問你個問題…？要誠實答。」
「嗯…你問。」我點點頭的說。
「天仔你鍾意柔柔？」阿彤盯著我的雙眼問。
「呃…」我還是頭一次思考這問題。
「講真話就得。」
「我諗…應該唔算…？」我撓撓頭，「我一直都當阿柔係妹妹咁看待…」
「真係？好，咁我換個角度問你。」阿彤繼續問道：「你覺得阿峰份人點？」
「呃……有上進心…？肯去努力…？」我如實說出自己對阿峰的第一印象。
「如果哥哥見到自己妹妹搵到個咁嘅好男仔，唔係應該會覺得開心、感到放心咩？」阿彤對我戚著眼皮的說：「咁點解你會覺得唔舒服？」
「……」我一時間無言以對。
「你話青梅竹馬唔等於初戀情人，的確講得冇錯，」阿彤先是點點頭，之後再看著我，「不過邊個話初戀情人唔可以係青梅竹馬呢？」
「呃…」
「好好面對自己內心嘅諗法，唔好到有一日佢真係離開咗先識得後悔。」阿彤握起我的手，「唔好太過介意柔柔嘅諗法，最重要係你自己點諗。如果你真係鍾意柔柔嘅，記住一定要好好裝備一下自己，同時都唔好操之過急。畀多啲自信自己，當去到時機真係成熟嘅嗰一刻，鼓起勇氣畀一個安心佢、畀一個承諾佢。」
「…」我低頭沉思，看著自己的雙手。
「相比起阿峰，我同天仔你嘅交情仲要深一啲。」阿彤邊站起來邊拍著我的肩膀，「所以如果你真係鍾意柔柔嘅話，唔好輸啊。」
我聽著阿彤的話，不自覺的握緊了拳頭。
「嗯…」
…到底一直以來，我對你的感覺是甚麼？
我…一直喜歡著你嗎？
「返去喇~去太耐廁所佢哋會擔心~」阿彤笑說的慢慢走回營地。
「阿彤！」聽見我聲音的她站在原地停了下來，「多謝你。」
阿彤沒有回身面向我，只是右手輕輕舉起大拇指後便繼續前行。
雖然我仍未搞清楚內心的想法，可是看著阿彤逐漸遠去的背影，不知道為何，內心好像至少不再脆弱。
「天仔你去咁耐嘅…？」阿柔見我回來後馬上走過來扶住我，「有冇事啊你，係咪肚痛啊…？」
「冇事喇，」我輕撫阿柔的頭髮，「放心啦傻妹。」
「哎呀呀，又當人哋係細路女…」阿柔的臉紅了一下，隨即伸頭到我耳邊說：「喂吔…詩詩彤彤佢哋喺度架…」
「哈哈，你怕羞？」我笑說。
「哎呀呀…打死你啊…！」阿柔說完便笑著的作勢對我拳打腳踢。
燒烤過後，阿柔和阿彤二人建議到沙灘沿著海邊走走，觀賞美景之餘亦可消滯。我和阿峰都舉手贊成，而剛剛吃得太多的阿揚和有點疲倦的阿詩則留下來休息，順便看守我們的物品。
從營地走了約五分鐘，我們四人便走到了東龍島的海旁。曾與家人到此露營過一次的阿彤說，由於東龍島位於香港中心的最東南方，也就是說香港地圖的正右下角，所以如果從這裏的海旁看出去的話，映入眼簾的就會是太平洋的海景。
「嘩彤彤…呢度望出去就係太平洋嚟喇？真係一望無際呢…」
「係啊~呢度望出去就一直望到水平線架喇~好靚呀呢柔柔？」
阿柔的手牽著阿彤一揮一揮的，就像兩個小女孩一樣走在我和阿峰面前。
「阿天你冇事呀嘛？」阿峰拍著我的肩膀問道。
「去完廁所冇事啦，放心~」對了，他們都以為我是肚子痛所以上了這麼久的廁所。
「喂喂天仔阿峰！過嚟一齊影張相啊~」阿柔的聲音從前面傳來，我們也一起走上前。