《足印》-從幼稚園開始，對你的心意原來一直是愛情-: 23

「喀喀喀…」我敲敲門，說：「柔柔我係天仔啊，我入得嚟嘛…？」
 
我沒有聽見阿柔的回應，只聽到房間內傳來陣陣哭泣聲，便打算推門進去，卻發現房門被阿柔鎖上了。
 
「我坐喺門出面啊，」我邊說邊靠著門坐在地上，「柔柔可以嘅時候再開門畀我入嚟啊…！」
 
過了一陣子，阿柔還是沒有打開門，但哭泣的聲音依然不斷傳出。在我不知所措的時候，我想起了已經離去的小飛，忽然想到一個方法，便馬上嘗試實行。
 
盧樂天：「( ﾟ▽ﾟ)/」16：56
 


我不知道這個方法能否成功，不過總要先嘗試一下。過了一陣子，阿柔總算回覆我了。
 
林芷柔：「咩嚟架…？」16：59
 
盧樂天：「小飛托我同柔柔你講架。」17：00
 
林芷柔：「唔明…」17：00
 
盧樂天：「柔柔開門畀我入嚟先再講，好唔好…？」17：01
 


過了一會，阿柔總算解開了門鎖。我也推門走了進去，與阿柔一起坐在床上。
 
「柔柔你見點啊…」我拍拍阿柔的肩膀說：「仲係好唔開心啊…？」
 
「嗯…」阿柔哭得雙眼都稍稍腫起來了。「天仔…你冇唔開心咩…？」
 
「緊係有啦，我都好唔開心架。」我苦笑一下，隨即摸著阿柔的頭說：「但係我都唔想再見到柔柔喊喇，想氹返你開心先啊。可唔可以話我知點解咁唔開心啊…？」
 
「嗚…我累死咗佢…」阿柔說著眼淚又不自覺的落下，緊抱著我說：「我累死咗小飛啊…！」
 


「唔係柔柔嘅錯嚟架，」我拿著桌上的紙巾，一邊為阿柔擦眼淚一邊說：「係一場意外啊。意外意外，意料之外啊！意外冇人想架！」
 
「但係…但係如果我冇大力扔個波，小飛就唔會跑咁遠啦…」雖然我一直在為阿柔擦走眼淚，新一輪的眼淚依然不斷湧出。
 
「柔柔啊，」我依然慢慢的為阿柔擦著眼淚，「如果小飛知道你咁樣怪責自己，佢都唔會開心架。」
 
「點解…？」阿柔呆呆的、面目無神的看著我，「同埋啱啱…你話小飛托你同我講嗰一句，係咩意思…？」
 
「記唔記得小飛佢都好鍾意顏文字？」我一邊說、一邊把手機中那個小飛曾經不為意輸入的顏文字遞給阿柔看，「呢個啊~」
 
「( ﾟ▽ﾟ)/」
 
「嘻嘻…我記得啊…」阿柔回到家中一段時間，總算是有了第一個笑容。
 
「咁柔柔你知唔知道…」我繼續輕撫著阿柔的頭，「小飛佢想講啲咩啊？」


 
阿柔想了想，隨即搖搖頭。
 
「小飛話，如果柔柔唔開心，小飛佢都會唔開心；」我舉起大拇指笑說：「只要柔柔開心返呢，小飛佢先會開心囉~」
 
我說的話，當然不是小飛托我說的了，而是我剛剛自己想出來的。不過就算小飛真的向我托話，我也不會聽得懂吧…我又不是動物傳心師。
 
要舒解阿柔此刻的情緒，總要先讓她重拾笑容吧？希望阿柔你，不會在意我這個善意的謊言。
 
「唓…天仔你自己作出嚟嘅…」呃…這麼快就露餡兒了。
 
「哈哈…柔柔你咁叻嘅…」我不好意思的笑說。
 
「緊係啦，我識咗你幾耐喎…」阿柔輕輕戳了戳我的額頭，「不過你咁講完，我好似真係釋懷咗一啲…」
 


「釋懷係好事嚟架，雖然小飛離開咗，不過我哋都會一直記得佢架嘛！」我雙手搭住阿柔肩膀的說：「同埋啊，可能而家小飛喺天堂生活得好開心呢~柔柔你話係唔係？」
 
「…」阿柔先是呆了一會，之後終於展露久違的燦爛笑容，「嗯！咁嘅話，我哋兩個都唔可以唔記得小飛架！天仔你要應承我啊…！」
 
「一定會記住小飛，我應承柔柔，」我勾住阿柔的尾指的說：「一定唔會唔記得！」
 
「你話架！一言為定！」阿柔笑得甜甜的戳了一戳我的臉頰。
 
若是平常的我，我會假裝生氣的反擊。
 
不過，這次就算了。
 
不知道為何，重新看到你甜甜的笑容後，我內心的傷痛也開始舒解起來了呢。
 
自那天之後，阿柔每次輸入都會加上顏文字。


 
無論是跟所有人傳訊息、或是在網上打卡、或是在小時候很喜歡玩的部落格的自我簡介，阿柔總會習慣在每一句的句末加上一個顏文字符號。
 
這個背後的原因，應該也只有我和阿詩阿彤三人知道。
 
我想，這大概是阿柔一直想念著小飛的證明吧。 
「仲係會感到自責啊…？」我坐在沙灘，輕撫著伏在我肩上的阿柔的頭。
 
「嗯…間唔中諗返起小飛就會…」經過我一番努力和兩張紙巾，阿柔的眼淚總算是止下來了。
 
「諗起小飛冇問題架，我哋都講過唔會忘記佢架嘛~」我淺笑。
 
「但係我間唔中都仲會亂咁諗，覺得係我…累死咗佢。」阿柔苦笑。
 
「你又咁諗啦，」我輕力的彈了阿柔額頭一下，「小飛在天之靈都知道係一場意外嚟架，佢唔會怪你架。」


 
「講就咁講啫…」阿柔依然一副沒精打采的樣子。
 
「你試諗諗如果小飛而家喺我哋面前，」我指著前方的沙地，「小飛見到主人咁唔開心，佢又會唔會開心呢？」
 
「…」阿柔呆呆的看著我。
 
「你都知架…小飛佢好有靈性架，」我邊撫著阿柔的頭邊說：「佢一眼就會睇得出自己主人唔開心架喇~」
 
「…咁又係，小飛佢又真係一隻好有靈性嘅狗仔。」阿柔微笑的答道。